Azərbaycanda yeni tədris ilində 165 minə yaxın uşaq birinci sinfə gedəcək

Bakı:

22 °C

43 %

3 m/s

Əlaqə

AZ RU EN

Ana səhifə / Sosial / Azərbaycanda yeni tədris ilində 165 minə yaxın uşaq birinci sinfə gedəcək

Azərbaycanda yeni tədris ilində 165 minə yaxın uşaq birinci sinfə gedəcək

09.09.2017 [11:33]

Ölkəmizdə yeni dərs ilinin başlanmasına artıq sayılı günlər qalıb. Bu il də Bilik Günündə təhsil ocaqları qapılarını şagirdlərin və tələbələrin üzünə açmağa hazırlaşır. Onların arasında ilk dəfə məktəbə gedəcək balacaların sevincinin isə həddi-hüdudu yoxdur. Bəs bu il ümumilikdə neçə uşaq birinci sinfə gedəcək?
Təhsil Nazirliyinin mətbuat xidmətindən qəzetimizə verilən məlumata görə, Azərbaycanda 2017-2018-ci tədris ilində birinci sinfə gedəcək uşaqların sayı 164 min 945 nəfər təşkil edir. Ötən il isə bu göstərici 164 min 33 nəfər olub.
Nazirlikdən həmçinin bildiriblər ki, bu il 71 məktəb binası inşa edilib. Bunun 61-i modul tipli məktəblərdir. İlin sonunadək respublikanın 44 rayonunda 100 azkomplektli və qəza vəziyyətində olan kənd məktəbləri modul tipli məktəb binaları ilə əvəz ediləcək.
Bundan başqa, 12 məktəb binası əsaslı təmir olunub, 460 məktəbdə cari təmir işləri görülüb, 24 məktəb binasında isə cari təmir işləri davam etdirilir. Həmçinin bir xüsusi məktəb, uşaq və gənclər üçün məktəb və idman-sağlamlıq kompleksi tikilib. Üç kampus və ali məktəb korpusu tikilib və əsaslı təmir olunub.
Yeri gəlmişkən, ötən tədris ilindən başlayaraq Azərbaycanın orta məktəblərində 5 yaşlı uşaqlar üçün məktəbə hazırlıq qrupları fəaliyyətə başlayıb. Bakı Şəhəri üzrə Təhsil İdarəsindən (BŞTİ) verilən məlumata görə, hazırda məktəbəhazırlıq qruplarına qəbul üçün 15 minədək uşağın qeydiyyatı aparılıb. Belə ki, növbəti tədris ilində BŞTİ-nin tabeliyindəki 266 ümumtəhsil müəssisəsində məktəbəhazırlıq qruplarında məşğələlər oktyabrın 2-dən fəaliyyət göstərəcək. Səkkiz ay davam edəcək məşğələlər mayın 31-də başa çatacaq. Məktəbəhazırlıq qruplarını bitirən uşaqlara isə sertifikat təqdim olunacaq.
Məlumat üçün bildirək ki, məktəbəhazırlıq qruplarının əsas məqsədi uşaqların tədrisə hazırlıqlı başlaması, dərs prosesinə öncədən alışması, onlarda müəyyən bilik və bacarıqların formalaşdırılmasından ibarətdir. Həftədə dörd gün fəaliyyət göstərəcək məktəbəhazırlıq qruplarında “Ətraf aləmlə tanışlıq”, “Savad təliminə hazırlıq və nitq inkişafı”, “Bədii təfəkkürün inkişafı”, “Məntiqi və riyazi təfəkkürün inkişafı”, “Təsviri fəaliyyət”, “Musiqi” və “Fiziki mədəniyyət” dərs məşğələləri tədris ediləcək. Gün ərzində təşkil olunacaq üç məşğələnin hər birinin müddəti 30 dəqiqə, məşğələlərarası fasilə isə on dəqiqə müəyyənləşdirilib. Məktəbəhazırlıq qruplarında təhsil alan uşaqlar üçün ev tapşırıqları nəzərdə tutulmur, qiymət yazılmır. Onlar tədris vəsaitləri ilə dövlət hesabına təmin edilirlər.
Onu da qeyd edək ki, ötən tədris ilindən fərqli olaraq, bu il məktəbəhazırlıq qruplarına uşaqların 65 faizinin cəlb olunması nəzərdə tutulur. Keçən tədris ilində isə bu rəqəm 55 faiz olub. Bu il ayrılan əlavə 10 faiz yer əsasən Bakıətrafı qəsəbələri əhatə edəcək.
Müşfiqə BAYRAMLI

Paylaş:

Baxılıb: 523 dəfə