Azərbaycan jurnalistlərinə 2018-ci il üçün “Beynəlxalq media vəsiqəsi” təqdim edilib

Bakı:

31 °C

51 %

11 m/s

Əlaqə

AZ RU EN

Ana səhifə / Sosial / Azərbaycan jurnalistlərinə 2018-ci il üçün “Beynəlxalq media vəsiqəsi” təqdim edilib

Azərbaycan jurnalistlərinə 2018-ci il üçün “Beynəlxalq media vəsiqəsi” təqdim edilib

07.03.2018 [09:45]

Azərbaycanın bir qrup jurnalistinə Beynəlxalq Jurnalistlər Federasiyasının (BJF) təsis etdiyi “Beynəlxalq media vəsiqəsi” (İnternational Press Card) təqdim edilib.
AZƏRTAC xəbər verir ki, təqdimat mərasimi BJF-nin Azərbaycan üzrə yerli üzv təşkilatı olan Jurnalistlərin Həmkarlar İttifaqının (JuHİ) ofisində baş tutub.
JuHİ sədri Müşfiq Ələsgərli bildirib ki, “Beynəlxalq media vəsiqəsi” jurnalistlər üçün dünyanın bütün ölkələrində qəbul edilən tanıtım nişanıdır. Vəsiqəni alan jurnalist onu təqdim etməklə istənilən ölkədə informasiya toplamaq hüququ qazanır. “Bununla yanaşı, kartın digər mühüm statusları da var. Vəsiqə sahibi olan jurnalist riskli bölgələrə səfər edərkən, - öncədən məlumat vermək şərti ilə, - BJF və onun yerli üzv təşkilatı tərəfindən nəzarətə götürülür. Bu halda təhlükə ilə üzləşən: təqib edilən, əsir-girov götürülən, xəsarət alan, informasiya əldə etmək hüququ pozulan vəsiqə sahibinin vəziyyətdən çıxması üçün BJF lazımi dəstək göstərir”, - deyə Müşfiq Ələsgərli bildirib.
M.Ələsgərli qeyd edib ki, BJF-nin riskli durumlarla üzləşən vəsiqə sahiblərinə mövcud durumdan çıxmaq üçün göstərdiyi yardıma risk yaradan qruplarla danışıqlar aparmaq, hüquqa söykənən təsir mexanizmlərindən istifadə etmək, maddi və mənəvi dəstək vermək kimi müxtəlif addımlar daxildir: “Eyni zamanda, BJF vəsiqə sahiblərini texnoloji inkişafa uyğun olaraq daim yenilənən təhlükəsizlik qaydaları ilə tanış və təmin edir ki, bu da jurnalistlərə risklərdən yayınmaq üçün istiqamət verir”.
Məlumat üçün bildirək ki, “Beynəlxalq media vəsiqəsi” BJF-yə fərdi müraciətlərlə deyil, ölkələr üzrə BJF-nin yerli üzv təşkilatlarının zəmanəti əsasında verilir. Vəsiqəni əldə etmək üçün müəyyənləşdirilən şərtlərə jurnalistika sahəsində fasiləsiz fəaliyyət göstərmək, peşəkar qaydaları bilmək, BJF-nin müəlliflik etdiyi “Jurnalistlər üçün Etik Kodeks”ə hörmətlə yanaşmaq, BJF-nin yerli təmsilçi təşkilatı ilə sıx əməkdaşlıq etmək və s. daxildir.
2018-ci ildə “Beynəlxalq media vəsiqəsi” BJF-nin Azərbaycan üzrə təmsilçisi olan Jurnalistlərin Həmkarlar İttifaqının üzvlərinə: Bakı Dövlət Universitetinin jurnalistika fakültəsinin dekanı Vüqar Zifəroğluna, İTV-nin departament rəhbəri Anar Yusifoğluna, “Kaspi” qəzetinin əməkdaşı Xəyalə Məmmədovaya, Aznews.az xəbər portalının əməkdaşı Elgün Mənsimova, “Yeni Azərbaycan” qəzetinin şöbə redaktoru Nadir Azəriyə, “Azərbaycan” qəzetinin müxbiri Məhərrəm Səfərliyə, “Kaspi” qəzetinin əməkdaşı Bəxtiyar Məmmədliyə, “Manevr.az” xəbər portalının əməkdaşı Zülfiyə Qurbanovaya, “The Business time” qəzetinin redaktoru Nəzirə Nurullayevaya və Əməkdar jurnalist Azər Həsrətə verilib.

Paylaş:

Baxılıb: 622 dəfə