Vəkillər Kollegiyası Rəyasət Heyətinin iclasında bir sıra qərarlar qəbul olunub

Bakı:

22 °C

88 %

9 m/s

Əlaqə

AZ RU EN

Ana səhifə / Sosial / Vəkillər Kollegiyası Rəyasət Heyətinin iclasında bir sıra qərarlar qəbul olunub

Vəkillər Kollegiyası Rəyasət Heyətinin iclasında bir sıra qərarlar qəbul olunub

26.07.2018 [10:40]

İyulun 25-də Vəkillər Kollegiyasının Rəyasət Heyətinin növbəti iclası keçirilib.
Vəkillər Kollegiyasının Rəyasət Heyətindən AZƏRTAC-a bildiriblər ki, iclasda Vəkillər Kollegiyasının sədri Anar Bağırov son dövrlər qurum tərəfindən görülən işlər barədə məlumat verib. Xüsusilə vəkilliyə qəbul prosesinin yekunlaşdırılması, yeni vəkillərin müvafiq qurumlara göndərilməsi, onların iş prosesinə yaxından cəlb edilməsi məsələləri müzakirə olunub, vəkil qurumları tərəfindən təqdim edilmiş növbətçilik cədvəlləri təsdiqlənib.
Sonra Vəkillərin İntizam Komissiyasının sədri Şahmar Məmmədov tərəfindən “Vəkil qurumları və fərdi qaydada fəaliyyət göstərən vəkillər tərəfindən növbəlilik üzrə dövlət hesabına hüquqi yardımın həyata keçirilməsi” qaydalarına dair layihənin təqdimatı keçirilib. Bildirilib ki, Rəyasət Heyətinin üzvləri ən qısa zamanda layihəyə dair təkliflərini Kollegiyanın aparatına təqdim etməlidirlər.
İclasda yeni vəkil qurumlarının təsis edilməsi, başqa vəkil qurumuna keçmək, fərdi qaydada fəaliyyət göstərmək və vəkilliyə qəbul üzrə müraciətlərə baxılıb, bir sıra vəkillərin mükafatlandırılması haqqında qərarlar qəbul olunub. Həmçinin vəkillər barəsində başlanılmış 10 intizam icraatı üzrə Vəkillərin İntizam Komissiyasının rəylərinə baxılaraq, peşə borcunun həyata keçirilməsi ilə bağlı qanunvericilik aktlarının tələblərinin, vəkillərin davranış qaydaları haqqında əsasnamənin, o cümlədən vəkil etikası normalarının pozuntusu ilə əlaqədar iki vəkilə töhmət verilib, bir vəkilin fəaliyyəti dayandırılıb. Habelə bir vəkilin Vəkillər Kollegiyası üzvlüyünə xitam verilməsi ilə bağlı məhkəməyə müraciət edilməsi barədə qərar qəbul olunub. Digər işlər üzrə isə pozuntu aşkar edilmədiyi üçün intizam icraatına xitam verilib.
Bundan başqa, iclasda Vəkillər Kollegiyası üzvlərinin peşə fəaliyyəti zamanı yol verdikləri nöqsanlar, onlardan şikayətlər və digər məsələlərlə bağlı Vəkillər Kollegiyası Rəyasət Heyətinin “Qaynar xətti”nin yaradılması barədə qərar qəbul olunub.
Tədbirdə iyulun 30-da - Vəkillərin Peşə Bayramı Günündə Vəkillər Kollegiyası Rəyasət Heyəti üzvlərinin Bakıda yerləşən ahıllar evlərindən birini ziyarət etməsi və oradakı sakinlərə ödənişsiz hüquqi yardım göstərilməsi barədə qərar qəbul edilib. Bütün vəkil qurumlarına isə həmin tarixdə gün ərzində qurumlara müraciət edənlərə pulsuz hüquqi yardım göstərilməsi tövsiyə olunub.
Sonda Kollegiyanın fəaliyyətinə dair digər məsələlər ətrafında müzakirələr aparılıb, müvafiq qərarlar qəbul olunub.

Paylaş:

Baxılıb: 643 dəfə