Kürdəmirdə 563 məcburi köçkün ailəsi üçün salınan yeni yaşayış kompleksi istifadəyə verilib

Bakı:

26 °C

65 %

5 m/s

Əlaqə

AZ RU EN

Ana səhifə / Sosial / Kürdəmirdə 563 məcburi köçkün ailəsi üçün salınan yeni yaşayış kompleksi istifadəyə verilib

Kürdəmirdə 563 məcburi köçkün ailəsi üçün salınan yeni yaşayış kompleksi istifadəyə verilib

29.12.2019 [10:01]

Dekabrın 28-də Dünya Azərbaycanlılarının Həmrəylik Günü və Yeni il bayramı ərəfəsində Kürdəmirdə məcburi köçkünlər üçün salınan yeni yaşayış kompleksi istifadəyə verilib. Açılış mərasimində Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev, Kürdəmir Rayon İcra Hakimiyyətinin başçısı Ceyhun Cəfərov və Məcburi Köçkünlərin Sosial İnkişaf Fondunun direktoru Mahir Abbaszadə iştirak ediblər.
AZƏRTAC-ın bölgə müxbiri xəbər verir ki, bütün zəruri sosial-texniki infrastrukturu olan məhəllənin tikintisi “Qaçqınların və məcburi köçkünlərin yaşayış şəraitinin yaxşılaşdırılması və məşğulluğunun artırılması üzrə Dövlət Proqramı”nda nəzərdə tutulan tədbirlər çərçivəsində aparılıb.
Kompleksin istifadəyə verilməsi məqsədilə keçirilən mərasimdə çıxış edən Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev yeni mənzillərin sahiblərini təbrik edərək, bu gün ölkəmizdə məcburi köçkünlərin məişət şəraitinin yaxşılaşdırılmasının prioritet məsələ olduğunu bildirib, Prezident İlham Əliyevin bu sahəyə diqqət və qayğısından danışıb. Bu kateqoriyadan olan vətəndaşların həyat şəraitinin daha da yaxşılaşdırılması üçün qəbul edilən qərarların, imzalanan Fərman və sərəncamların icrası ilə bağlı geniş məlumat verən komitə sədri bu işlərin davamlı olacağını vurğulayıb.
Tədbirdə çıxış edən rayon icra hakimiyyətinin başçısı Ceyhun Cəfərov Prezident İlham Əliyevin rəhbərliyi ilə vətəndaşların, o cümlədən qaçqın və məcburi köçkünlərin həyat şəraitinin yaxşılaşdırılması istiqamətində həyata keçirilən tədbirlərdən danışıb, Kürdəmirdə məskunlaşan məcburi köçkünlərin yeni il ərəfəsində yeni mənzillə təmin edilməsini dövlətin onlara ən qiymətli hədiyyəsi olduğunu bildirib.
Tədbirdə Laçın rayonundan olan məcburi köçkünlər Bulud Quliyev, Əliağa Həsənov mənzillə təmin olunduqlarından hədsiz sevindiklərini deyib, bu sevinci onlara bəxş etdiyi üçün Prezident İlham Əliyevə minnətdarlıq ediblər.
Sonra tədbirdə iştirak edən qonaqlar Füzuli rayonundan olan məcburi köçkün Tahir Həsənovla yeni mənzilində görüşüb, yaradılan şəraitlə tanış olublar.
Qeyd edək ki, yeni yaşayış məhəlləsi Azərbaycan Respublikasının Məcburi Köçkünlərin Sosial İnkişaf Fondu tərəfindən layihələndirilib və tikilib. Ayrılmış 13 hektar torpaq sahəsində tikinti işlərinə 2019-cu ilin may ayında başlanılıb.
Yeni yaşayış kompleksində hər biri 4 mərtəbəli olmaqla, 17 yaşayış binası inşa edilib. Kompleksə daxil olan mənzillərdən 44-ü birotaqlı, 236-sı ikiotaqlı, 228-i üçotaqlı, 56-sı dördotaqlıdır. Bundan başqa, yaşayış kompleksində 432 şagird yerlik məktəb, 140 yerlik uşaq bağçası, inzibati bina, klub-icma mərkəzi, ATS binası və həkim məntəqəsi tikilib, müvafiq mühəndis-kommunikasiya şəbəkələri yaradılıb, abadlıq və yaşıllaşdırma işləri görülüb.
Bu kompleksdə Kürdəmir rayonu ərazisindəki yataqxanalarda və digər inzibati binalarda müvəqqəti məskunlaşan məcburi köçkünlər yaşayacaq.
Kompleksin elektrik təchizatını təmin etmək məqsədi ilə “Kürdəmir” yarımstansiyasında yenidənqurma işləri aparılıb, 1,2 kilometr uzunluğunda ikidövrəli elektrik veriliş xətti çəkilib. Bundan əlavə, kompleksin ərazisində 1 ədəd transformator məntəqəsi tikilib və 2 ədəd transformator quraşdırılıb. Sahədaxili elektrik təchizatı üzrə 18,52 kilometr uzunluğunda kabel xətləri çəkilib və kompleksin ərazisinin işıqlandırılması təmin edilib.
İçməli su təchizatını təmin etmək üçün 0,366 kilometr uzunluğunda boru kəməri çəkilib, 2 ədəd (içməli su) su anbarı, 2 ədəd yanğın su anbarı, nasosxana və nəzarətçi binası tikilib. Ərazidə 3,43 kilometr sahədaxili içməli və yanğın su şəbəkəsi tikilib və 10 ədəd yanğın hidrantları quraşdırılıb. Qaz təchizatını təmin etmək məqsədi ilə 31,529 kilometr uzunluğunda xətt çəkilib.
Sosial təyinatlı obyektlərin istilik təchizatı üçün müxtəlif diametrli polad borulardan 0,816 kilometr uzunluğunda istilik xətləri çəkilib. Mənzillərin qızdırılması və isti su üçün mənzillərdə 564 ədəd kombi tipli su qızdırıcıları quraşdırılıb.

Paylaş:

Baxılıb: 494 dəfə