COVID-19 bəşəriyyəti təhdid edən ciddi sağlamlıq problemidir

Bakı:

29 °C

51 %

2 m/s

Əlaqə

AZ RU EN

Ana səhifə / Sosial / COVID-19 bəşəriyyəti təhdid edən ciddi sağlamlıq problemidir

COVID-19 bəşəriyyəti təhdid edən ciddi sağlamlıq problemidir

05.12.2020 [00:12]

Həkim-mütəxəssislər hər kəsi məsuliyyətli olmağa və müəyyən olunmuş bütün qaydalara əməl etməyə çağırırlar

Son günlər ölkəmizdə yeni növ koronavirus (COVID-19) infeksiyasına yoluxanların sayının kəskin artımı böyük narahatlıq doğurur. Düzdür, dövlət tərəfindən COVID-19-un geniş yayılmasının qarşısının alınması, vətəndaşların təhlükəsizliyi və sağlamlığının qorunması üçün lazımi tədbirlər görülür. Lakin bütün dünyada olduğu kimi, Azərbaycanda da bu xəstəliyə yoluxma halları davam etməkdədir. Təbii ki, bu mübarizənin ön sıralarında həkimlər və tibb işçiləri gedirlər. Gecə-gündüz bu virusa qarşı mübarizə aparan tibb işçiləri günümüzün əsl qəhrəmanlarıdır. Bəs görəsən, fədakar həkimlərimiz virusdan özlərini necə qoruyurlar? Məhz onların virusdan qorunmaq üsulları sadə vətəndaşlara da yol göstərir.

İlk həmsöhbətimiz - Azərbaycan Tibb Universitetinin Ağciyər xəstəlikləri kafedrasının müdiri, dosent Rafiq Bayramov “Hər zaman qeyd etdiyim kimi, koronavirus və digər infeksiyalara qarşı mübarizənin əsas yollarından biri qorunmaqdır. Bununla yanaşı, orqanizmimin müqavimətini artırmağa, düzgün qidalanmağa, xüsusilə də vitamin C ilə zəngin olan qidalar qəbul etməyə çalışıram. Eləcə də yuxu rejiminə riayət edirəm. Gün ərzində təmiz hava almağa və yürüyüş etməyə önəm verirəm” deyib.

“Öncə onu deyim ki, həkimlərimiz dəfələrlə koronavirus ilə bağlı ictimaiyyətə xəbərdarlıq edirlər, COVID-19 infeksiyası ilə bağlı vətəndaşları diqqətli olmağa çağırırlar”. Bu fikirləri isə qəzetimizə açıqlamasında Kliniki Tibbi Mərkəzin baş direktor müavini, Yeni Azərbaycan Partiyası (YAP) Qadınlar Şurasının sədr müavini, partiyanın Nərimanov rayon təşkilatı Qadınlar Şurasının sədri Məhəbbət İbrahimova deyib.

Həkimin sözlərinə görə, bu aralar xüsusilə Vitamin C və zülallarla zəngin qidalar - meyvə-tərəvəzlər qəbul etməyə çalışır: “Bildiyiniz kimi, həkim peşəsi olduqca fədakarlıq tələb edir. Biz də sevə-sevə peşəmizi icra edirik. Bununla yanaşı, müntəzəm olaraq COVID-19 xəstələrinin müalicəsi ilə məşğul olduğumuz üçün sağlamlığımızın da qeydinə qalmalıyıq. Yəni, özümüzü maksimum qorumağa çalışırıq. Qaydalara əməl edir, eyni zamanda çalışıram ki, hər dəfə immuniteti gücləndirən qidalar qəbul edim. Həmçinin gün ərzində 2-3 litrə qədər maye qəbul etməyə çalışıram. Hər kəsə də bunu tövsiyə edirəm”.

5 nömrəli Uşaq poliklinikasında həkim - pediatrı Könül Əliyeva isə hazırda könüllü şəkildə koronaviruslu xəstələrin müalicəsi ilə məşğul olur. O da digər həmkarları kimi bu savaşda qalib çıxmaq, xəstələrin həyatını xilas etmək üçün əlindən gələni etdiyini deyir: “Həkim heyəti olaraq müayinə-müalicə məsələlərini əlimizdən gəldiyi qədər layiqli yerinə yetirməyə çalışırıq. Həqiqətən də, bu şəraitdə çalışmağın nə demək olduğunu, ancaq həkimlər bilə bilər. Onu da deyim ki, virusdan qorunmaq üçün səhər saat 9-11 arası açıq havada gəzirəm. Mövsümi xəstəlikləri də nəzərə alaraq, Vitamin C və sink tərkibli vitaminlər qəbul edirəm. Hər kəsə tövsiyyəm odur ki, axşam 6-dan sonra yemək yeməyin. Çünki mədə-bağırsaq o saatlarda dolu olanda narahatlıq yaradır”.

“Hər kəsə tövsiyəm budur ki, bütün bunlardan əlavə gecə yatmamışdan öncə antiseptik məhlullarla qarqara etməyi də unutmayın. Ən əsası, doyunca yatmağa çalışın”, - deyə həkim sonda əlavə edib.

Azərbaycan Tibb Universitetinin Daxili Xəstəliklər kafedrasının əməkdaşı Könül İsmayılova isə deyib ki, tibbi maska taxmaqla, məsafə saxlamaqla və əl gigiyenasına əməl etməklə bu virusla mübarizə aparır: “Hər yerə tibbi maska ilə gedirəm, məsafə saxlayıram, spirtdən istifadə edirəm və tez-tez əllərimi yuyuram. Bu tədbirlərə hamı düzgün əməl etsə, çox xeyrini görmüş olarıq”.

MÜŞFİQƏ

Paylaş:

Baxılıb: 663 dəfə