Boğaz ağrısı xəstəlikləri artır...

Bakı:

11 °C

93 %

2 m/s

Əlaqə

AZ RU EN

Ana səhifə / Sosial / Boğaz ağrısı xəstəlikləri artır...

Boğaz ağrısı xəstəlikləri artır...

08.02.2024 [13:08]

Qrip, yoxsa digər infeksiyalar?

Son günlər infeksion xəstəliklərə yoluxma sayında artım müşahidə olunmaqdadır. Məlumdur ki, havaların soyuq olması zamanı qripə yoluxma aktivləşir. Lakin son zamanlar insanlar arasında yayılan xəstəliyin simptomları qripdən fərqlidir. Belə ki, həm uşaqlar, həm də böyüklər arasında boğaz ağrısı, qızdırma, halsızlıq əlamətləri ilə müşayiət olunan virus infeksiyalarına yoluxma daha çoxdur.

Virus infeksiyalarını fərqləndirmək üçün...

İnfeksionist-həkim Vüqar Cavadzadənin “Yeni Azərbaycan”a açıqlamasına görə, qrip ilə digər virus infeksiyalarını fərqləndirmək üçün mütləq şəkildə laborator müayinə olmalıdır: “İndi təkcə koronavirus deyil, digər kəskin respirator virus infeksiyalarının da sayı artmaqdadır. Hər zamankı kimi həm respirator sinsitial viruslar, adenoviruslar, həm də qrip kimi infeksiyalara yoluxmada artım müşahidə olunur”.

COVİD həmişə bizimlə olacaq

İnfeksionist qeyd edib ki, iki-üç il bundan əvvəlki vəziyyətə baxanda pandemiyaya qalib gəlsək də, COVİD-19 xəstəlik kimi həmişə bizimlə olacaq: “Biz bunu əvvəl də deyirdik. Bir çox fərqli respirator viruslar var ki, hər zaman payız-qış mövsümündə insanlar arasında yayılır. Onların hamısına qrip deyirik, lakin onların arasında müxtəlif viruslar var. COVİD-19 xəstəliyi də həmin sıraya qoşulacaq və demək olar ki, artıq qoşulub. Ümumdünya Səhiyyə Təşkilatı da respirator xəstəliklərin, o cümlədən COVİD-19 və qrip xəstəliklərinin son vaxtlar artmasını nəzərə alaraq tövsiyələr verib. Kəskin respirator virus xəstəlikləri hər ilin payız-qış mövsümündə artır. Onların arasında hər mövsümdə hansısa virus daha dominant olur. Yada salsaq ki, pandemiya vaxtı qrip virusu demək olar ki, yox idi, ancaq COVİD var idi. Ola bilər ki, o vaxt özünü göstərməyən viruslar indi üzə çıxır. Bu, hər zaman olub və təəssüf ki, bu şəkildə də davam edəcək. Ona görə də qabaqlayıcı tədbirlər görməli və həmin proseslərə hazır olmalıyıq”.

Boğaz ağrılarının 80 faizinin səbəbi...

Həkim boğaz ağrısından şikayət edən xəstələrin çox olduğunu təsdiqləyib: “Boğaz ağrısı boğaz nahiyəsində yaranan, udqunma zamanı artan, quruluq və qıcıqlanma hissiyyatı ilə müşayiət olunan bir haldır. Boğaz ağrılarının 80 faizinin səbəbi kəskin və xroniki faringit, laringit və tonzillitlərdir, digər 20 faiz hallarda bir çox xəstəliklər də boğaz ağrısı şəklində özünü büruzə verə bilər. Boğaz ağrılarına adətən virus və bakteriyalar səbəb olur. Boğazın hansı hissəsinin iltihablanmasından asılı olaraq, boğaz iltihabı faringit, laringit və ya tonzillit adlanır. Udlağın arxa divarının iltihabı faringit, qırtlağın iltihabı laringit, damaq badamcıqlarınn iltihabı isə tonzillit adlanır”.

Boğaz ağrısının müalicəsi...

İnfeksionistin sözlərinə görə, boğaz ağrısını azaltmaq üçün bol maye qəbulu, isti çay, bitki dəmləmələri məsləhət görülür: “Boğazdakı bakterial və virus mənşəli infeksiyalara qarşı ilk növbədə ağız boşluğunun antiseptik təsirli preparatlarla qarqara edilməsi lazımdır. Bu tip qarqaralar virus və bakteriyaların selikli qişaya daxil olaraq yuxarı tənəffüs yollarında xəstəlik törətməsinin qarşısını alır. İltihab əleyhinə və yerli anestetik təsir edir, ağız boşluğu və udlaqda qızartı və ağrını aradan qaldırır”.

Yeganə BAYRAMOVA

Paylaş:

Baxılıb: 613 dəfə