Xalq-iqtidar birliyi sabitliyin qarantıdır

Bakı:

12 °C

71 %

4 m/s

Əlaqə

AZ RU EN

Ana səhifə / YAP xəbərləri / Xalq-iqtidar birliyi sabitliyin qarantıdır

Xalq-iqtidar birliyi sabitliyin qarantıdır

24.11.2025 [13:10]

Meydanəli Yolçiyev

YAP Daşkəsən rayon təşkilatının sədri

Müstəqilliyin ilk illərində Azərbaycan ictimai-siyasi böhranla üzləşmiş və dağıdıcı proseslərin qarşısını almaq üçün yeni addımlar atmaq zərurətə çevrilmişdir. Bu mürəkkəb şəraitdə tanınmış ziyalılar ölkənin gələcəyini düşünərək Yeni Azərbaycan Partiyasının yaradılması təşəbbüsünü irəli sürmüşlər.

21 noyabr 1992-ci il tarixində Naxçıvanda keçirilmiş YAP-ın təsis konfransı bu təşəbbüsün reallaşdığı, ölkənin siyasi arenasında yeni mərhələnin başladığı əlamətdar hadisə kimi yadda qalmışdır. Belə ki, xalqın istəyini nəzərə alaraq Ulu Öndər Heydər Əliyevə müraciət edən məşhur “91-lər”in cəsarətli addımları nəticəsində dağıdıcı proseslərin qarşısı alınmış, Azərbaycanın görkəmli ziyalıları, tanınmış insanlar və nüfuzlu şəxslər Ümummilli Liderdən yeni yaradılacaq siyasi partiyaya rəhbərlik etməsini xahiş etmişlər. Ulu Öndər qeyd etmişdir ki, Yeni Azərbaycan Partiyasının yaradılması obyektiv zərurətdən doğur və belə partiya Azərbaycanın siyasi-ictimai həyatında fəal iştirak edərək müstəqil dövlətin möhkəmləndirilməsində və inkişafında tarixi rol oynaya bilər.

Təsis konfransı zamanı partiyanın Nizamnaməsi və Proqramı qəbul edilmiş, Ulu Öndər Heydər Əliyev yekdilliklə partiyanın Sədri seçilmişdir. Eyni zamanda, Siyasi Şura, İdarə Heyəti və Sədrin müavinləri müəyyən edilmiş, Yeni Azərbaycan Partiyası müstəqil Azərbaycanın tarixində üzərinə böyük tarixi missiya götürmüşdür.

Qısa müddət ərzində Ulu Öndər Heydər Əliyevin rəhbərlik etdiki YAP cəmiyyətin aparıcı siyasi qüvvəsinə çevrilmiş, ölkədə siyasi sabitliyin və davamlı inkişafın təminatçısı kimi çıxış etmişdir. Partiya müxalifət dövründə də konstruktiv mövqe sərgiləmiş və demokratik siyasi mədəniyyətin inkişafına xidmət etmişdir.

Ulu Öndər Heydər Əliyev Azərbaycan tarixində misilsiz xidmətlər göstərmiş Ümummilli Lider kimi yaddaşlara həkk olunub. Heydər Əliyev dövlət quruculuğu sahəsində genişmiqyaslı islahatlar həyata keçirərək ölkənin iqtisadiyyatının dirçəlişinə, sosial sahələrin inkişafına və qanunun aliliyinin təmin olunmasına əvəzsiz töhfələr verib. Ulu Öndərin təşəbbüsü ilə həyata keçirilən infrastruktur layihələri, sənaye və kənd təsərrüfatının modernləşdirilməsi proqramları ölkənin dayanıqlı inkişafının təməlini qoymuşdur. Eyni zamanda, Heydər Əliyev milli birliyi möhkəmləndirməyə xüsusi diqqət göstərmiş, xalqın müxtəlif təbəqələri arasında həmrəyliyi təmin etmişdir. Xarici siyasətdə müstəqil və balanslı mövqe tutmaqla Azərbaycanın beynəlxalq arenada nüfuzunu artırmış, strateji tərəfdaşlıq və regional əməkdaşlıq imkanlarını genişləndirmişdir. Təhsil, elm və mədəniyyət sahələrində apardığı islahatlar gənc nəsillərin inkişafı, milli irsin qorunması və dünya ilə inteqrasiyanın təmin olunmasına xidmət etmişdir. Onun uzaqgörən siyasəti və həyata keçirdiyi strateji layihələr ölkənin müasir inkişafının möhkəm təməlini qoymuş, gələcək nəsillər üçün örnək prinsiplər yaratmışdır.

2005-ci il martın 26-da keçirilmiş Yeni Azərbaycan Partiyasının III qurultayında partiyanın yeni Sədri Azərbaycan Respublikasının Prezidenti İlham Əliyev seçilmişdir. YAP ölkədə demokratik, hüquqi, dünyəvi dövlət və azad vətəndaş cəmiyyəti naminə xalqımızı ümumi siyasi ideya ətrafında birləşdirir. Bu partiya Cənubi Qafqazın ən böyük siyasi təşkilatı kimi fəaliyyət göstərir.

Vətən müharibəsi Azərbaycan tarixində həm milli qürur, həm də şanlı Zəfərin təntənəsi kimi xüsusi yer tutur. 2020-ci ilin sentyabrında Ermənistan silahlı qüvvələrinin təxribatları və işğalçılıq siyasətinə qarşı Azərbaycan Ordusu qətiyyətlə əks-hücum əməliyyatlarına başladı. Qısa müddət ərzində həyata keçirilən strateji əməliyyatlar nəticəsində işğal altında olan torpaqlarımızın böyük hissəsi azad edildi. Bu tarixi Qələbə həm də xalqın həmrəyliyini, ordunun gücünü və dövlətin qətiyyətini bütün dünyaya nümayiş etdirdi. Həmin amillər ölkəmiz üçün yeni inkişaf mərhələsinin başlanğıcını oldu, beynəlxalq mövqelərimizi möhkəmləndirdi və azad edilmiş ərazilərdə bərpa, tikinti və sosial-iqtisadi inkişaf üçün geniş imkanlar yaratdı.

2021-ci il 5 mart tarixində keçirilmiş VII qurultayda Yeni Azərbaycan Partiyasının yeni Nizamnaməsi, İdarə Heyəti, Təftiş Komissiyası və Veteranlar Şurası təsdiq edilmiş, Azərbaycanın Birinci vitse-prezidenti Mehriban Əliyeva partiya Sədrinin birinci müavini təyin edilmişdir. YAP-ın VII qurultayında qəbul olunmuş qərarlar partiyanın müasir çağırışlara uyğun fəaliyyətini müəyyən etmiş, siyasi dialoqun inkişafı və milli həmrəyliyin möhkəmləndirilməsi istiqamətində yeni mərhələ başlanmışdır.

2023-cü il sentyabrın 19-20-də Azərbaycan Ordusu Qarabağ iqtisadi rayonunda separatçıların törətdiyi təxribatlara cavab olaraq lokal xarakterli antiterror tədbirləri həyata keçirdi. Bir gün davam edən bu əməliyyat nəticəsində qondarma rejim özünü buraxmaq məcburiyyətində qaldı və Azərbaycan ərazilərində dövlət suverenliyi tam bərpa olundu. Bu, xalqımızın onilliklər boyu gözlədiyi tarixi ədalətin bərpası, müstəqil dövlətimizin gücünün və qüdrətinin təntənəsi idi.

Yeni Azərbaycan Partiyasının strateji istiqamətləri Heydər Əliyev yolu, müstəqillik, dövlətçilik, qanunun aliliyi, konstruktiv əməkdaşlıq, sosial ədalət, multikultural cəmiyyət və demokratik ənənələrin inkişafı kimi sahələri əhatə edir. Partiyanın əsas hədəfləri arasında Ulu Öndər irsinin təbliği, güclü iqtisadiyyat, inklüziv cəmiyyət, şəffaflıq, vətəndaş həmrəyliyi, milli maraqlar və işğaldan azad olunmuş ərazilərə Böyük Qayıdış yer alır.

Tarixi zəfərlərdən sonra keçirilmiş prezident, parlament və bələdiyyə seçkilərində YAP-ın qələbələri partiyaya olan yüksək etimadın göstəricisi olmuşdur. Yeni Azərbaycan Partiyası həm tarixi missiyanı uğurla davam etdirir, həm də Azərbaycanın müasir dövrünün çağırışlarına adekvat siyasi addımlarla gələcəyə inamla addımlayır.

Paylaş:

Baxılıb: 166 dəfə