Slovakiya və Azərbaycan dost ölkələrdir və strateji tərəfdaşlardır

Bakı:

2 °C

87 %

10 m/s

Əlaqə

AZ RU EN

Ana səhifə / YAP xəbərləri / Slovakiya və Azərbaycan dost ölkələrdir və strateji tərəfdaşlardır

Slovakiya və Azərbaycan dost ölkələrdir və strateji tərəfdaşlardır

15.12.2025 [23:15]

Dekabrın 8-də Bratislavada Azərbaycan Prezidenti cənab İlham Əliyevin və Slovakiya Prezidenti Peter Pelleqrininin mətbuata verdikləri bəyanatlar iki ölkə arasında münasibətlərinin yeni strateji mərhələyə qədəm qoyduğunu bir daha nümayiş etdirdi. Cənab Prezident İlham Əliyevin bəyanatında səsləndirdiyi fikirlər Azərbaycanın təkcə ikitərəfli münasibətlərdə deyil, həm də qlobal geosiyasi proseslərdə oynadığı müstəsna rolu vurğulamış oldu. Dövlət başçısının “Slovakiya və Azərbaycan dost ölkələrdir və strateji tərəfdaşlardır” sözləri, tərəflər arasında artıq yüksək səviyyədə oturuşmuş qarşılıqlı siyasi etimadı təsdiqləyir. Eyni zamanda da Prezident Pelleqrininin “iki ölkə arasında Strateji Tərəfdaşlıq haqqında Bəyannamənin ötən il imzalanması münasibətləri daha yüksək səviyyəyə qaldırdı” fikri, əslində, bu gün formalaşan çoxtərəfli əməkdaşlıq arxitekturasının mahiyyətini tam ifadə edir. Bu gün Slovakiya Azərbaycanı Cənubi Qafqazın ən etibarlı tərəfdaşı kimi qəbul edir və əməkdaşlığın dərinləşdirilməsi qarşılıqlı marağa, qarşılıqlı etimada əsaslanır. Bu baxımdan Slovakiya Prezidentinin “gələcəkdə daha sıx əməkdaşlıq edəcəyik” mesajı da yalnız siyasi jest deyil, həm də real iqtisadi və təhlükəsizlik perspektivlərinin konkret ifadəsidir. Bratislavada keçirilən görüş göstərdi ki, iki ölkə arasında strateji tərəfdaşlıq kağız üzərində deyil, praktik və davamlı məzmunla zənginləşir və bu dinamik inkişaf regionda sabitlik və əməkdaşlıq mühitinin güclənməsinə xidmət edir. Cənab Prezident İlham Əliyevin Azərbaycanın Şərq ilə Qərb arasında mühüm körpü rolunu icra etməsi, nəqliyyat və logistika infrastrukturuna qoyulan sərmayələrin Orta Dəhlizi ən etibarlı marşruta çevirməsi barədə fikirləri isə əməkdaşlığın yeni istiqamətlərini açır. Orta Asiyanı Avropa ilə birləşdirən ən təhlükəsiz yolun məhz Azərbaycan üzərindən keçməsi Slovakiya üçün də strateji əhəmiyyət daşıyır və dövlət başçımızın qeyd etdiyi kimi, bu potensial iki ölkə arasında iqtisadi əlaqələrin genişləndirilməsi üçün geniş imkanlar yaradır. Gələcək illərdə nəqliyyat, logistika və yüksək texnologiyalar üzrə birgə layihələrin həyata keçirilməsi həm Azərbaycan-Slovakiya tərəfdaşlığını daha da möhkəmləndirəcək, həm də Avrasiyanın yeni iqtisadi məkanında iki ölkənin rolunu daha da artıracaq. Bratislava bəyanatları göstərdi ki, bu tərəfdaşlıq yalnız bu günün deyil, həm də uzunmüddətli strateji gələcəyin məntiqi və ardıcıl seçimidir.

Arifə Abbasova

YAP Tovuz rayon təşkilatının məsləhətçisi

Paylaş:

Baxılıb: 284 dəfə