Gənclər Günü: Ulu Öndər Heydər Əliyevin Strateji Baxışının Təzahürü

Bakı:

19 °C

61 %

3 m/s

Əlaqə

AZ RU EN

Ana səhifə / YAP xəbərləri / Gənclər Günü: Ulu Öndər Heydər Əliyevin Strateji Baxışının Təzahürü

Gənclər Günü: Ulu Öndər Heydər Əliyevin Strateji Baxışının Təzahürü

02.02.2026 [12:50]

Azərbaycanda 2 Fevral – Gənclər Günü təkcə təqvimdə bir tarix deyil, dövlətin gəncliyə münasibətinin, gənclərin cəmiyyət həyatında rolunun və gələcəyə baxışın rəmzidir. Bu gün Ümummilli Lider Heydər Əliyevin 1997-ci il 1 fevral tarixli sərəncamı ilə təsis edilib və 1997-ci ildən etibarən rəsmi şəkildə qeyd olunur. Əsası isə 1996-cı il fevralın 2-də keçirilən I Azərbaycan Gəncləri Forumu ilə qoyulub. Həmin Forum Azərbaycanın gənclər siyasətində yeni mərhələnin başlanğıcı kimi yadda qaldı və bu tarix sonradan Gənclər Gününün ideya dayağına çevrildi.

Müstəqilliyimizin ilk illəri ağır sosial-iqtisadi çağırışlar, müharibə şəraiti, eləcə də müxtəlif ideoloji təsir cəhdləri ilə müşayiət olunurdu. Belə bir mühitdə gənclərin enerjisini və potensialını milli maraqların müdafiəsinə yönəltmək, onları vətənpərvərlik ruhunda formalaşdırmaq strateji əhəmiyyət daşıyırdı. Ümummilli Liderin aydın strategiyası məhz bu ehtiyacı görür, gənclərin gələcək inkişaf üçün təşkilatlanmasına və hazırlanmasına zəmin yaradırdı. I Forumda gənclər qarşısında müəyyənləşdirilən tarixi vəzifələr bu xəttin məntiqi davamı oldu: gənclik ölkənin sabahı deyil, elə bu günü idi.

2 Fevralın əhəmiyyəti bir neçə istiqamətdə ölçülür. Birincisi, bu gün dövlət qayğısının institutlaşmasını göstərir: gənclərin problemlərinə diqqət çəkmək, onların inkişafına dəstək vermək, milli-mənəvi dəyərlərə bağlı, savadlı və təşəbbüskar nəsil yetişdirmək məqsədi daşıyır. İkincisi, 2 Fevral MDB və Şərqi Avropa məkanında ilk dəfə məhz Azərbaycanda qeyd olunan Gənclər Günü kimi tarixə düşüb. Bu fakt gənclər siyasətinin regionda öncüllüyünü vurğulayır və Azərbaycanın bu sahədə təşəbbüskar olduğunu göstərir.

Gənclər siyasətinin davamlılığında 2003-cü ildən sonrakı dövr ayrıca mərhələdir. Prezident İlham Əliyevin rəhbərliyi ilə mövcud ənənələr əsasında siyasət daha da təkmilləşdirildi: gənclərlə bağlı dövlət proqramları qəbul olundu, 2007-ci il “Gənclər ili” elan edildi, 2011-ci ildə Gənclər Fondu yaradıldı, 2013-cü ildə “Gənclər üçün Prezident Mükafatı” təsis olundu, Azərbaycan gənclərinin İnkişaf Strategiyası təsdiqləndi. Bu addımlar bir hədəfə xidmət edirdi: gənclərin bilik, bacarıq və təşəbbüslərini ölkənin dayanıqlı inkişafına çevirmək.

Gənclər siyasətində milli və dövlətçilik maraqlarının prioritet olması 44 günlük Vətən müharibəsində özünü xüsusilə göstərdi. Döyüş meydanında, arxa cəbhədə, informasiya məkanında baş verən proseslər sübut etdi ki, gənclərin vətənpərvərlik ruhunda yetişməsi strateji üstünlükdür. Gənclərin cəsarəti, hazırlığı və birliyi Qələbəyə aparan əsas amillərdən biri kimi qiymətləndirilir. Bu, eyni zamanda, dövlətin illərlə apardığı gənclər siyasətinin real nəticəsidir.

2 Fevral münasibətilə keçirilən tədbirlər də bu ideyanı gücləndirir. Xüsusən Gülüstan sarayında təşkil olunan Gənclər Forumu kimi platformalarda gənc sahibkarlar, dövlət proqramlarının iştirakçıları, Vətən müharibəsi iştirakçıları, şəhid ailələrinin gənc üzvləri, sosial inklüziv fəaliyyətdə fərqlənən gənclər bir araya gəlir. Bu, dövlət–gənclik dialoqunun canlı nümunəsidir: problemlər səslənir, təkliflər irəli sürülür, strategiyalar müzakirə olunur.

Bu gün Gənclər Günü bizə bir daha xatırladır: gənclərə yatırım – gələcəyə yatırılan ən dəyərli sərmayədir. Müasir dünyada təhsil, innovasiya, rəqəmsal bacarıqlar, milli-mənəvi dəyərlərin qorunması, sosial məsuliyyət və vətəndaş fəallığı gənclərin fəaliyyət gündəminin əsas xəttini təşkil etməlidir. Gənclər bu imkanlardan istifadə etdikcə, Azərbaycan daha güclü, daha rəqabətqabiliyyətli və daha dayanıqlı olacaq.

2 Fevral – Gənclər Günü münasibətilə hər bir gəncə çağırış sadədir: biliklə güclən, milli dəyərlərə söykən, cəmiyyət üçün faydalı ol, dövlətə və Vətənə xidmət et. Çünki bir nəsil dəyişir, Azərbaycan dəyişir və bu dəyişimin mərkəzində gənclik dayanır.

Abbas Pənahov,

Yeni Azərbaycan Partiyası

Nəsimi rayon təşkilatının sədr müavini

Paylaş:

Baxılıb: 369 dəfə