Tarixi varislik və zəfərin təcəssümü

Bakı:

8 °C

93 %

10 m/s

Əlaqə

AZ RU EN

Ana səhifə / YAP xəbərləri / Tarixi varislik və zəfərin təcəssümü

Tarixi varislik və zəfərin təcəssümü

02.02.2026 [15:12]

Azərbaycan dövlətinin gənclər siyasəti bu gün özünün ən yüksək inkişaf mərhələsini yaşayır. Bu uğurlu yolun təməli Ümummilli Lider Heydər Əliyev tərəfindən hələ 1990-cı illərin ortalarında atılmışdır. Ulu Öndərin 26 iyul 1994-cü il tarixli Fərmanı ilə Gənclər və İdman Nazirliyinin yaradılması, dövlətin gənclərlə iş sahəsindəki fəaliyyətini vahid mərkəzdən əlaqələndirməyə imkan verdi. Heydər Əliyevin "Bizim xalqımızın gələcəyi gənclərdir" fəlsəfəsi gənc nəslin həm fiziki, həm də intellektual baxımdan formalaşmasını prioritet hədəfə çevirdi. Məhz onun uzaqgörənliyi sayəsində 1997-ci ildə 2 fevral - Azərbaycan Gəncləri Günü elan edildi ki, bu da Avropa və MDB məkanında bir ilk idi. Bu strateji kursu yeni müstəvidə davam etdirən Prezident İlham Əliyev gənclərin potensialını ölkənin ümumi inkişafına yönəltməyi bacardı. Dövlət başçısının təşəbbüsü ilə keçirilən "Yüksəliş" müsabiqəsi gənc kadrların idarəetmədə irəli çəkilməsi siyasətinin ən parlaq təzahürüdür. Bu gün Azərbaycan gənci təkcə icraçı deyil, həm də qərar qəbul edən mühüm kadr kimi yetişir. Gənclərin İnkişaf və Karyera Mərkəzlərinin (GİKM) şəbəkəsinin bölgələri əhatə etməsi, gənclərin paytaxtla yanaşı regionlarda da sosiallaşmasına və müasir bacarıqlara yiyələnməsinə şərait yaradır. Gənclər siyasətinin ən mühüm qollarından biri də təhsil faktorudur. "Gənclərin xaricdə təhsilinə dair Dövlət Proqramları" çərçivəsində minlərlə azərbaycanlı gənc dünyanın ən nüfuzlu universitetlərində biliklərə yiyələnərək ölkəmizə qayıtmış və Dördüncü Sənaye İnqilabı dövrünün tələblərinə uyğun rəqabətqabiliyyətli mütəxəssis kimi fəaliyyətə başlamışdır. Bununla yanaşı, ölkədə geniş vüsət alan könüllülər hərəkatı gənclərin vətəndaş məsuliyyətini artırmış, onlarda komanda işi və sosial xidmət mədəniyyətini formalaşdırmışdır. ASAN xidmətdən başlayan və bütün sahələri bürüyən bu hərəkat müasir Azərbaycan gəncliyinin simasına çevrilmişdir. Lakin Azərbaycan gəncliyinin ən böyük və şərəfli imtahanı 44 günlük Vətən müharibəsi oldu. Məhz müstəqillik dövründə yetişən, vətənpərvərlik ruhu ilə tərbiyə alan rəşadətli gənclərimiz Ali Baş Komandanın ətrafında "Dəmir yumruq" kimi birləşərək işğala son qoydular. Rəşadətli Azərbaycan Ordusunun sıralarında vuruşan gənclərimiz öz adlarını xalqımızın ən yeni tarixinə qızıl hərflərlə yazdılar. Şəhidlərimizin və qazilərimizin göstərdiyi rəşadət sübut etdi ki, Azərbaycan gənci üçün Vətən və bayraq hər şeydən ucadır. Yekun olaraq qeyd etmək lazımdır ki, Heydər Əliyev Fondunun genişmiqyaslı layihələri və dövlətin gənclərə yönəlik hərtərəfli qayğısı sayəsində bu gün Azərbaycan gəncliyi beynəlxalq arenada ölkəmizi layiqincə təmsil edir. Bu günün gənci həm yüksək texnoloji biliklərə malik modern bir fərd, həm də öz kökünə, milli dəyərlərinə bağlı sadiq bir vətəndaşdır. Dövlətin yaratdığı geniş imkanlar və gənclərin əzmi Azərbaycanın gələcəyinin daha parlaq olacağının ən böyük təminatıdır.

Nicat Quliyev

YAP Laçın rayon təşkilatının məsləhətçisi

Paylaş:

Baxılıb: 43 dəfə