Milli yaddaşın rəmzi: Xocalı Soyqırımı Memorialı

Bakı:

17 °C

82 %

2 m/s

Əlaqə

AZ RU EN

Ana səhifə / YAP xəbərləri / Milli yaddaşın rəmzi: Xocalı Soyqırımı Memorialı

Milli yaddaşın rəmzi: Xocalı Soyqırımı Memorialı

03.03.2026 [14:20]

Azərbaycan xalqının XX əsrdə üzləşdiyi ən dəhşətli faciələrdən biri olan Xocalı Soyqırımı milli yaddaşımızda əbədi iz buraxmışdır. 1992-ci ilin fevralında dinc əhaliyə qarşı törədilmiş bu ağır cinayət yalnız azərbaycanlılara deyil, bütövlükdə bəşəriyyətə qarşı yönəlmiş vəhşilik aktı olmuşdur. Bu faciənin unudulmaması, qurbanların xatirəsinin əbədiləşdirilməsi və tarixi ədalətin bərpası Azərbaycan dövlətinin əsas prioritetlərindən biri kimi daim diqqət mərkəzində saxlanılır.

Məhz bu məqsədlə inşa edilən Xocalı Soyqırımı Memorial Kompleksi milli yaddaşın, tarixi həqiqətlərin və gələcək nəsillərə verilən mühüm mesajın rəmzinə çevrilmişdir. Memorial Kompleksinin açılış mərasimində Azərbaycan Respublikasının Prezidenti İlham Əliyev iştirak etmiş və bu tarixi hadisə dövlətin Xocalı həqiqətlərinə verdiyi xüsusi əhəmiyyəti bir daha nümayiş etdirmişdir.

Dövlət başçısı açılış mərasimində çıxış edərək bu sözləri demişdir:
“İki il bundan əvvəl Xocalı Soyqırımı Memorial Kompleksinin təməli mənim iştirakımla qoyulmuşdur. Bu gün isə bu Memorial Kompleksin açılışına toplaşmışıq.”
Bu fikirlər təkcə bir tikilinin inşası ilə bağlı deyil, eyni zamanda Xocalı Soyqırımına dövlət səviyyəsində göstərilən siyasi iradənin, ardıcıl mövqenin və tarixi məsuliyyətin ifadəsidir.

Memorial Kompleksi Xocalı qurbanlarının xatirəsinə ehtiramın simvolu olmaqla yanaşı, faciənin miqyasını, onun mahiyyətini və nəticələrini əks etdirən canlı tarix dərsidir. Burada yaradılmış kompozisiyalar, memarlıq həlləri və rəmzi elementlər Xocalıda günahsız insanların necə amansızlıqla qətlə yetirildiyini, ailələrin dağıldığını və bir xalqın dərdinə çevrilmiş faciəni dərin emosional təsir gücü ilə çatdırır.

Xocalı Soyqırımı Memorialı həm də beynəlxalq ictimaiyyətə ünvanlanmış mühüm mesajdır. Bu kompleks, dünya ictimaiyyətini Xocalıda törədilmiş cinayətlərə biganə qalmamağa, insan hüquqlarının kobud şəkildə pozulmasına qarşı obyektiv mövqe sərgiləməyə çağırır. Azərbaycan dövləti bu memorial vasitəsilə bir daha bəyan edir ki, Xocalı faciəsi unudulmayacaq, saxtalaşdırılmayacaq və tarixdən silinməyəcəkdir.

Prezident İlham Əliyevin rəhbərliyi ilə həyata keçirilən siyasət Xocalı həqiqətlərinin beynəlxalq səviyyədə tanıdılması, soyqırımın hüquqi-siyasi qiymət alması və qurbanların xatirəsinin daim uca tutulmasına yönəlmişdir. Memorial Kompleksinin açılışı bu siyasətin bariz nümunəsi olmaqla yanaşı, milli birliyin, tarixi yaddaşın və dövlət-vətəndaş həmrəyliyinin təzahürüdür.

Bu gün Xocalı Soyqırımı Memorial Kompleksi təkcə bir anım məkanı deyil, eyni zamanda gələcək nəsillərə ünvanlanmış çağırışdır: tarixi unutma, həqiqəti qoru və ədalət uğrunda mübarizəni davam etdir. Bu memorial bir daha sübut edir ki, Azərbaycan xalqının yaddaşı güclüdür, ədalətə inamı sarsılmazdır və Xocalı şəhidlərinin xatirəsi əbədi yaşayacaqdır.

İsa Məmmədov

YAP Babək rayon təşkilatının sədri

Paylaş:

Baxılıb: 438 dəfə