Azərbaycan Qadınlarının İlk Qurultayından Müasir İnkişafa Doğru

Bakı:

28 °C

54 %

6 m/s

Əlaqə

AZ RU EN

Ana səhifə / YAP xəbərləri / Azərbaycan Qadınlarının İlk Qurultayından Müasir İnkişafa Doğru

Azərbaycan Qadınlarının İlk Qurultayından Müasir İnkişafa Doğru

06.03.2026 [14:16]

XX əsrin əvvəlləri Azərbaycan cəmiyyətinin ictimai və mədəni həyatında mühüm dəyişikliklərin baş verdiyi dövr idi. Bu dəyişikliklərin mərkəzində isə qadınların cəmiyyət həyatında daha fəal iştirak etməsi, təhsil alması və hüquqlar uğrunda mübarizəsi dayanırdı. Azərbaycan qadınları həm ailədə, həm də ictimai mühitdə öz mövqelərini gücləndirməyə başlayaraq ölkənin inkişafına böyük töhfələr vermişlər.

8 Mart – Beynəlxalq Qadınlar Günü qadınların hüquqlarının müdafiəsi, cəmiyyətdəki rolunun qiymətləndirilməsi və onların nailiyyətlərinin qeyd olunması baxımından xüsusi əhəmiyyət daşıyır. Bu gün qadınların bərabərlik, azadlıq və sosial ədalət uğrunda apardığı mübarizənin rəmzi kimi qeyd edilir. Azərbaycanda da bu tarix qadınların cəmiyyətin bütün sahələrində əldə etdikləri uğurların vurğulandığı və onlara hörmətin ifadə olunduğu əlamətdar gündür.

Azərbaycan qadınlarının ictimai həyatdakı fəallığının artmasının mühüm mərhələlərindən biri Azərbaycan qadınlarının ilk qurultayı olmuşdur. Bu qurultay qadınların sosial və mədəni həyatdakı rolunun genişləndirilməsi istiqamətində mühüm addım kimi tarixə düşmüşdür. Qurultayda qadınların təhsilə cəlb edilməsi, savadsızlığın aradan qaldırılması, əmək fəaliyyətində iştirakının artırılması və onların hüquqlarının qorunması kimi məsələlər geniş müzakirə olunmuşdur.

Müstəqil Azərbaycanda qadın siyasətinin inkişafına dövlət səviyyəsində xüsusi diqqət yetirilir. Bu sahədə həyata keçirilən tədbirlər ölkə rəhbərliyinin qadınların hüquqlarının qorunmasına və onların cəmiyyət həyatında fəal iştirakına verdiyi önəmin göstəricisidir. Cənab Prezident İlham Əliyev tərəfindən qadınların ictimai-siyasi həyatda rolunun artırılması, onların rəhbər vəzifələrdə təmsil olunması və sosial müdafiəsinin gücləndirilməsi istiqamətində ardıcıl siyasət həyata keçirilir. Dövlət başçısı öz çıxışlarında Azərbaycan qadınlarının tarix boyu cəmiyyətin inkişafında mühüm rol oynadığını vurğulayaraq onların fəaliyyətini yüksək qiymətləndirmişdir.

Azərbaycan qadınlarının qəhrəmanlıq salnaməsində Vətən uğrunda canını fəda etmiş şəhid xanımların da xüsusi yeri vardır. Xalqımızın azadlığı və torpaqlarımızın müdafiəsi uğrunda mübarizədə qadınlarımız da böyük fədakarlıq göstərmiş, Vətən sevgisinin ən ali nümunəsini nümayiş etdirmişlər. Xüsusilə Birinci Qarabağ müharibəsi və İkinci Qarabağ müharibəsi dövründə qadınlarımız tibb işçisi, könüllü və hərbi qulluqçu kimi cəbhə bölgələrində xidmət göstərmiş, bəziləri isə qəhrəmancasına şəhid olmuşdur. Onların göstərdiyi igidlik və vətənpərvərlik gələcək nəsillər üçün əsl örnəkdir.

Bu gün Azərbaycan qadınları elm, təhsil, siyasət, mədəniyyət, iqtisadiyyat və digər sahələrdə fəal iştirak edərək cəmiyyətin inkişafına böyük töhfələr verirlər. Onlar həm milli dəyərlərin qorunmasında, həm də müasir cəmiyyətin qurulmasında mühüm rol oynayırlar. Tarix boyu əldə olunan nailiyyətlər göstərir ki, qadınların zəhməti, biliyi və iradəsi cəmiyyətin tərəqqisinin vacib amillərindən biridir.

8 Mart münasibətilə Azərbaycan qadınlarının keçdiyi şərəfli yol, onların mübarizəsi və əldə etdikləri uğurlar bir daha xatırlanır. Bu gün həm də Vətən uğrunda canından keçmiş şəhid xanımların xatirəsinin ehtiramla yad edildiyi gündür. Azərbaycan qadınının mərdliyi, sədaqəti və gücü xalqımızın tarixində daim qürurla xatırlanacaqdır.

Rövşən Əhmədov

YAP Ağcabədi rayon təşkilatının sədri

Paylaş:

Baxılıb: 570 dəfə