Azərbaycan–Avropa İttifaqı münasibətlərinin yeni mərhələsi

Bakı:

22 °C

64 %

3 m/s

Əlaqə

AZ RU EN

Ana səhifə / YAP xəbərləri / Azərbaycan–Avropa İttifaqı münasibətlərinin yeni mərhələsi

Azərbaycan–Avropa İttifaqı münasibətlərinin yeni mərhələsi

12.03.2026 [21:34]

2026-cı il martın 11-də Bakıda Azərbaycan Respublikasının Prezidenti İlham Əliyev ilə Avropa İttifaqı Şurasının Prezidenti Antonio Costa arasında keçirilən görüş və verilən bəyanatlar Azərbaycan–Avropa İttifaqı münasibətlərində mühüm siyasi hadisə kimi qiymətləndirilir. Bu səfər tərəflər arasında strateji tərəfdaşlığın dərinləşdirilməsi, enerji, təhlükəsizlik, nəqliyyat və regional əməkdaşlıq sahələrində yeni perspektivlərin müəyyənləşdirilməsi baxımından xüsusi əhəmiyyət kəsb edir.

Möhtərəm Prezidentimiz İlham Əliyev cənabları mətbuata çıxış edərkən qeyd edib ki, Avropa İttifaqı ilə Azərbaycan arasında münasibətlər son illər ərzində uğurla inkişaf edir və bu əlaqələr qarşılıqlı hörmət, bərabərlik və qarşılıqlı fayda prinsiplərinə əsaslanırki, tərəflər arasında fəal siyasi dialoq mövcuddur və son illərdə keçirilən görüşlər əməkdaşlığın daha da genişlənməsi üçün möhkəm zəmin yaradıb.

Görüş zamanı müzakirə olunan əsas mövzulardan biri enerji sahəsində əməkdaşlıq olub. Prezident İlham Əliyev qeyd edib ki, Azərbaycan Avropanın enerji təhlükəsizliyində mühüm rol oynayır və ölkə Avropa bazarına etibarlı enerji tərəfdaşı kimi çıxış edir. Bu gün Azərbaycan qazı bir sıra Avropa ölkələrinə ixrac edilir və bu əməkdaşlıq gələcəkdə daha da genişlənə bilər. Dövlət başçısı eyni zamanda ölkənin bərpa olunan enerji sahəsinə də böyük investisiyalar yatırdığını, külək və günəş enerjisi layihələrinin həyata keçirildiyini bildirib.

Avropa İttifaqı da öz növbəsində Azərbaycanla enerji əməkdaşlığını prioritet hesab edir. Antonio Koşta Azərbaycanın Avropa üçün əsas tərəfdaşlardan biri olduğunu vurğulayıb və enerji, rəqəmsal texnologiyalar və nəqliyyat sahələrində əməkdaşlığın genişləndirilməsinin vacibliyini qeyd edib.

Görüşdə regional təhlükəsizlik məsələləri də geniş müzakirə olunub. Xüsusilə son dövrlərdə regionda baş verən hadisələr, o cümlədən Yaxın Şərqdə və regionda artan gərginlik fonunda Azərbaycan və Avropa İttifaqı arasında əməkdaşlığın daha da gücləndirilməsinin vacibliyi vurğulanıb. Avropa İttifaqı rəhbərliyi Azərbaycanın regionda sabitliyin və təhlükəsizliyin təmin olunmasında mühüm rol oynadığını qeyd edib. Həmçinin Avropa tərəfi Azərbaycan xalqı ilə həmrəylik nümayiş etdirərək Naxçıvana qarşı həyata keçirilmiş hücumla bağlı narahatlığını ifadə edib.

Prezident cənab İlham Əliyev bəyanatında regionda sülhün və sabitliyin təmin olunmasının Azərbaycanın əsas prioritetlərindən biri olduğunu vurğulayıb. Dövlət başçısı qeyd edib ki, Azərbaycan regionda uzunmüddətli sülh və əməkdaşlıq mühitinin yaradılması istiqamətində fəal siyasət aparır. Avropa İttifaqı da bu prosesə dəstəyini ifadə edib və regionda davamlı sülhün təmin olunmasının beynəlxalq əməkdaşlıq üçün mühüm əhəmiyyət daşıdığını bildirib. Bu baxımdan Avropa İttifaqı Azərbaycanla siyasi dialoqun daha da gücləndirilməsində maraqlı olduğunu açıqlayıb.

Bəyanatda nəqliyyat və logistika sahəsində əməkdaşlıq da xüsusi yer tutub. Azərbaycan Avropa ilə Asiya arasında strateji körpü rolunu oynayır və ölkə ərazisindən keçən beynəlxalq nəqliyyat dəhlizləri qlobal ticarət üçün mühüm əhəmiyyət daşıyır. “Orta Dəhliz” layihəsi və Xəzər dənizi vasitəsilə Avropa ilə Asiya arasında əlaqələrin genişləndirilməsi istiqamətində əməkdaşlıq imkanları müzakirə edilib. Bu layihələr Azərbaycanın beynəlxalq logistika mərkəzinə çevrilməsinə mühüm töhfə verir.

Möhtərəm Prezidentimiz İlham Əliyev cənablarının Antonio Koştanın Azərbaycana səfəri zamanı verdiyi bəyanat göstərir ki, Azərbaycan ilə Avropa İttifaqı arasında münasibətlər strateji xarakter daşıyır və bu əməkdaşlıq gələcəkdə daha da dərinləşəcək. Enerji təhlükəsizliyi, regional sabitlik, nəqliyyat layihələri və iqtisadi əməkdaşlıq kimi sahələr iki tərəf arasında tərəfdaşlığın əsas istiqamətlərini təşkil edir.

Bu səfər Azərbaycan–Avropa İttifaqı münasibətlərində yeni mərhələnin başlanğıcı kimi qiymətləndirilə bilər. Tərəflər qarşılıqlı etimad və strateji maraqlar əsasında əməkdaşlığı genişləndirərək həm regional, həm də qlobal səviyyədə sabitlik və inkişafın təmin olunmasına töhfə verməyə hazır olduqlarını bir daha nümayiş etdirdilər.

Eldar Əsədov
YAP Tərtər rayon təşkilatının sədri

Paylaş:

Baxılıb: 491 dəfə