Akademik Zərifə Əliyeva – nəsillərə örnək həyat yolu

Bakı:

28 °C

54 %

6 m/s

Əlaqə

AZ RU EN

Ana səhifə / YAP xəbərləri / Akademik Zərifə Əliyeva – nəsillərə örnək həyat yolu

Akademik Zərifə Əliyeva – nəsillərə örnək həyat yolu

14.04.2026 [12:39]

Akademik Zərifə Əliyevanın vəfatından uzun illər keçsə də, onun adı Azərbaycan elminin və səhiyyəsinin tarixində daim ehtiramla anılır. Görkəmli oftalmoloq-alim kimi qazandığı uğurlar, insanlara göstərdiyi diqqət və mərhəmət, tibb sahəsinə gətirdiyi yeniliklər bu gün də onun nurlu xatirəsini yaşadır. Zərifə xanım yalnız peşəkar həkim deyil, həm də yüksək mənəviyyat sahibi, vətəninə bağlı ziyalı obrazı kimi xalqımızın yaddaşında özünəməxsus yer tutur.

Zərifə Əliyeva oftalmologiya sahəsində Azərbaycanda yeni elmi məktəbin formalaşmasına mühüm töhfələr verib. O, göz xəstəliklərinin müalicəsi və profilaktikası istiqamətində apardığı araşdırmalarla tibb elminə dəyərli yeniliklər gətirib. Xüsusilə peşə fəaliyyəti nəticəsində yaranan göz patologiyalarının öyrənilməsi sahəsində əldə etdiyi nəticələr həm ölkəmizdə, həm də xaricdə böyük maraq doğurub. Onun müəllifi olduğu kitablar, monoqrafiyalar və elmi əsərlər bu gün də mütəxəssislər üçün qiymətli mənbə hesab olunur.

Görkəmli alim həm də güclü təşkilatçı kimi tanınıb. Onun təşəbbüsü ilə Azərbaycanda oftalmologiya elminin inkişafına xidmət edən laboratoriyalar yaradılıb, müasir müalicə və diaqnostika üsullarının tətbiqinə başlanılıb. Zərifə xanımın fəaliyyəti nəticəsində Azərbaycan oftalmologiyası beynəlxalq elmi dairələrdə daha yaxından tanınmağa başlayıb. Onun elmə gətirdiyi yeniliklər ölkəmizin tibb sahəsində nüfuzunun artmasına səbəb olub.

1981-ci ildə Zərifə Əliyevanın elmi fəaliyyəti yüksək səviyyədə qiymətləndirildi. O, oftalmologiya sahəsində apardığı mühüm tədqiqatlara görə SSRİ Tibb Elmləri Akademiyasının akademik M.İ.Averbax adına mükafatına layiq görüldü. Bu mükafat dünya səviyyəsində tanınmış alimlərə təqdim olunurdu və Zərifə xanımın bu nüfuzlu mükafatı alan ilk qadın alim-oftalmoloq olması onun elm aləmindəki yüksək mövqeyini bir daha təsdiqlədi.

Zərifə Əliyeva yalnız alim kimi deyil, həkim etikası və insanpərvərlik prinsiplərinə sadiqliyi ilə də seçilib. O, həkimlik peşəsini müqəddəs missiya hesab edir, xəstələrə sevgi və həssaslıqla yanaşırdı. Gənc mütəxəssislərin yetişməsinə xüsusi diqqət göstərir, öz bilik və təcrübəsini gələcək nəsillərlə bölüşürdü. Bu baxımdan, onun fəaliyyəti Azərbaycan tibb məktəbinin inkişafında mühüm rol oynayıb.

Zərifə xanım Əliyeva ictimai və mənəvi həyatda da örnək şəxsiyyət idi. O, Ulu Öndər Heydər Əliyevin həyat yolunda etibarlı dayaqlardan biri olmuş, milli dövlətçilik ideallarına sədaqətlə xidmət etmişdir. Onun müdrikliyi, sədaqəti və ziyalılığı ailə dəyərlərinin ən gözəl nümunəsi kimi yadda qalıb.

Bu gün akademik Zərifə Əliyevanın zəngin irsi yaşayır və gələcək nəsillərə örnək olur. Onun elmi əsərləri, humanist fəaliyyəti və mənəvi keyfiyyətləri Azərbaycan xalqının yaddaşında daim yaşayacaq. Belə şəxsiyyətlər zaman keçdikcə daha da ucalır, cəmiyyət üçün əbədi dəyərə çevrilirlər. Zərifə Əliyevanın adı da Azərbaycan elmi və mənəviyyat tarixində həmişə işıq saçacaq.

İlkin Bağırov

YAP Babək rayon təşkilatının əməkdaşı

Paylaş:

Baxılıb: 574 dəfə