Heydər Əliyev irsinin əbədiyyət yolu

Bakı:

24 °C

66 %

3 m/s

Əlaqə

AZ RU EN

Ana səhifə / YAP xəbərləri / Heydər Əliyev irsinin əbədiyyət yolu

Heydər Əliyev irsinin əbədiyyət yolu

08.05.2026 [15:17]

Tarix bəzi insanları sadəcə dövlət başçısı kimi deyil, bütöv bir xalqın taleyini dəyişən şəxsiyyət kimi yetişdirir. Azərbaycan xalqının ümummilli lideri Heydər Əliyev məhz belə dahilərdən idi. Onun adı Azərbaycan xalqının yaddaşına xilaskar, qurucu lider, dövlətçilik məktəbinin banisi və milli qürur rəmzi kimi həkk olunub. Heydər Əliyevin anadan olmasının 103-cü ildönümü münasibətilə onu yad edərkən, əslində biz yalnız bir insanın həyat yoluna deyil, Azərbaycanın taleyinə çevrilmiş böyük bir ömrə nəzər salırıq.

Bəzən xalqların tarixində elə məqamlar olur ki, həmin anlarda bir liderin iradəsi bütöv bir millətin gələcəyini müəyyən edir. Heydər Əliyev məhz belə ağır və taleyüklü dövrlərdə xalqının yanında oldu. O, Azərbaycanı ən mürəkkəb sınaqlardan çıxaran, ümidsizliyə qapılan insanlara inam bəxş edən, parçalanmaq təhlükəsi qarşısında olan dövləti ayaqda saxlayan böyük dövlət adamı idi.

1969-cu ildə Azərbaycana rəhbər seçilən Heydər Əliyev qısa müddətdə respublikanın həyatına yeni nəfəs gətirdi. Həmin dövrdə Azərbaycan keçmiş ittifaqın ucqar və geridə qalmış respublikalarından biri hesab olunurdu. Lakin ulu öndərin qətiyyəti, zəhməti və uzaqgörənliyi sayəsində Azərbaycan inkişaf yoluna qədəm qoydu. Zavodlar tikildi, yollar salındı, kəndlər abadlaşdı, elm və təhsil inkişaf etdi. Ən başlıcası isə Azərbaycan insanı özünə inanmağa başladı.

Heydər Əliyev xalqını sevirdi. Bu sevgi yalnız sözlərdə deyil, onun gördüyü işlərdə, gecə-gündüz yorulmadan fəaliyyətində özünü göstərirdi. O, Azərbaycanın gələcəyini düşünərək milli kadrlar yetişdirirdi, gənclərin təhsilinə xüsusi diqqət ayırırdı. Çünki yaxşı bilirdi ki, güclü gələcək savadlı və vətənpərvər gənclərin çiyinləri üzərində qurulacaq.

1990-cı illərin əvvəlləri Azərbaycan üçün ən ağrılı dövrlərdən biri idi. Ölkədə xaos, siyasi böhran, vətəndaş qarşıdurması hökm sürürdü. Dövlət müstəqilliyini itirmək təhlükəsi ilə üz-üzə qalmışdı. İnsanlar ümidsizlik içində idi. Məhz belə bir anda xalq öz xilaskar oğluna üz tutdu. 1993-cü ildə hakimiyyətə qayıdan Heydər Əliyev Azərbaycanı uçurumun kənarından geri qaytardı. Onun qətiyyəti və siyasi müdrikliyi nəticəsində ölkədə sabitlik bərpa olundu, dövlət quruculuğu prosesi başladı. O illərdə Azərbaycan xalqı yalnız bir liderə deyil, həm də bir ata qayğısına sığınmışdı. Heydər Əliyev insanların dərdini öz dərdi bilirdi. Onun hər çıxışı insanlarda ümid yaradırdı. Çünki xalq inanırdı ki, Heydər Əliyev varsa, Azərbaycan yaşayacaq.

Ulu öndərin həyata keçirdiyi neft strategiyası ölkənin gələcəyini dəyişdi. “Əsrin müqaviləsi” Azərbaycanın iqtisadi inkişafına yeni qapılar açdı. Dünya Azərbaycanı daha yaxından tanımağa başladı. Heydər Əliyev sübut etdi ki, kiçik görünən xalqlar belə böyük liderlərin rəhbərliyi ilə qüdrətli dövlətə çevrilə bilər.

Onun ən böyük arzularından biri güclü və müstəqil Azərbaycan görmək idi. Bu gün həmin arzu reallığa çevrilib. Prezident İlham Əliyev tərəfindən uğurla davam etdirilən siyasi kurs nəticəsində Azərbaycan regionun lider dövlətinə çevrilib. Ərazi bütövlüyümüzün bərpası, dövlətimizin artan nüfuzu və qazandığımız böyük uğurlar Heydər Əliyev ideyalarının təntənəsidir.

Bu gün Azərbaycan gəncləri Heydər Əliyev məktəbinin yetirmələri kimi yetişirlər. Onun vətən sevgisi, dövlətçilik fəlsəfəsi və milli birlik ideyaları milyonlarla insan üçün həyat amalına çevrilib. Çünki Heydər Əliyev təkcə bir siyasi lider deyildi — o, xalqının qəlbində yaşayan böyük bir tarix idi.

İllər keçir, zaman dəyişir, amma bəzi adlar unudulmur. Çünki həmin adlar xalqın taleyi ilə birləşir. Heydər Əliyev də məhz belə şəxsiyyətlərdəndir. Bu gün onun adı çəkiləndə insanların gözündə qürur, minnətdarlıq və sonsuz ehtiram görünür. Azərbaycan xalqı yaxşı bilir ki, müstəqil dövlətimizin möhkəm təməlində ulu öndərin zəhməti, müdrikliyi və vətən sevgisi dayanır.

Heydər Əliyevin 103-cü ildönümü yalnız anım günü deyil. Bu tarix həm də Azərbaycan xalqının öz böyük liderinə sədaqətinin, ehtiramının və sevgisinin ifadəsidir. Çünki bəzi insanlar ömürlərini yaşayıb tarixə çevrilirlər, bəzi insanlar isə tarix yazaraq əbədiyyətə qovuşurlar. Heydər Əliyev məhz əbədiyyət qazanan böyük şəxsiyyətlərdən biridir.

Gündüz Bayramov

YAP Samux rayon təşkilatının sədri

Paylaş:

Baxılıb: 528 dəfə