Azərbaycanın enerji siyasətinin yeni mərhələsi və qlobal tərəfdaşlıq gündəliyi

Bakı:

21 °C

50 %

6 m/s

Əlaqə

AZ RU EN

Ana səhifə / YAP xəbərləri / Azərbaycanın enerji siyasətinin yeni mərhələsi və qlobal tərəfdaşlıq gündəliyi

Azərbaycanın enerji siyasətinin yeni mərhələsi və qlobal tərəfdaşlıq gündəliyi

03.06.2026 [14:10]

2026-cı il iyunun 1-də Azərbaycan Respublikasının Prezidenti İlham Əliyev Bakı Ekspo Mərkəzində keçirilən Bakı Enerji Həftəsinin rəsmi açılış mərasimində iştirak edərək proqram xarakterli çıxış edib. Dövlət başçısının çıxışı Azərbaycanın enerji strategiyasının hazırkı vəziyyətini, qlobal enerji təhlükəsizliyinə verdiyi töhfələri, təbii qaz ixracının genişləndirilməsi istiqamətində görülən işləri və bərpaolunan enerji sahəsində qarşıda duran hədəfləri əhatə edib.

Prezident İlham Əliyev bildirib ki, artıq 31-ci dəfə keçirilən Xəzər Neft və Qaz Sərgisi və onun əsasında formalaşan Bakı Enerji Həftəsi müasir Azərbaycanın enerji inkişafının təməlində duran mühüm beynəlxalq platformaya çevrilib. Dövlət başçısı qeyd edib ki, 1996-cı ildə imzalanmış “Şahdəniz” müqaviləsi Azərbaycanın qaz sənayesinin inkişafında yeni mərhələ açaraq ölkəni Avrasiyanın enerji xəritəsində mühüm aktorlardan birinə çevirib. Çıxış zamanı Azərbaycanın etibarlı enerji tərəfdaşı kimi qazandığı nüfuza xüsusi diqqət yetirilib. Vurğulanıb ki, ölkəmiz uzun illərdir beynəlxalq öhdəliklərinə sadiq qalaraq tərəfdaş dövlətlərin enerji təhlükəsizliyinin təmin olunmasına mühüm töhfə verir. Azərbaycanın təşəbbüsü və iştirakı ilə reallaşdırılan iri enerji layihələri regionda əməkdaşlığın möhkəmlənməsinə və enerji marşrutlarının şaxələndirilməsinə xidmət edir.

Prezident İlham Əliyev çıxışında ölkənin zəngin qaz ehtiyatlarına da toxunaraq bildirib ki, mövcud ehtiyatlar ən azı növbəti yüz il ərzində həm Azərbaycanın, həm də tərəfdaş ölkələrin tələbatını ödəmək imkanına malikdir. Bununla yanaşı, Azərbaycan yalnız ənənəvi enerji resurslarına arxalanmır, eyni zamanda yaşıl enerji keçidini strateji prioritet kimi müəyyənləşdirib. Dövlət başçısının sözlərinə görə, ölkədə bərpaolunan enerji mənbələrinin inkişafı üçün əlverişli investisiya mühiti yaradılıb və artıq bir sıra layihələr uğurla həyata keçirilir.

Çıxışda enerji təhlükəsizliyinin bu gün beynəlxalq təhlükəsizliyin ayrılmaz tərkib hissəsinə çevrildiyi vurğulanıb. Azərbaycan isə öz etibarlı tərəfdaş imici, sabit siyasi mühiti və uzunmüddətli enerji strategiyası ilə qlobal enerji bazarında mühüm rol oynamaqda davam edir. Prezident İlham Əliyev ölkənin həm karbohidrogen ehtiyatlarının səmərəli istifadəsi, həm də yaşıl enerji potensialının reallaşdırılması istiqamətində ardıcıl siyasət həyata keçirdiyini diqqətə çatdırıb.

Bakı Enerji Həftəsinin açılış mərasimində səsləndirilən fikirlər bir daha göstərdi ki, Azərbaycan enerji sahəsində əldə etdiyi nailiyyətləri yeni çağırışlara uyğun şəkildə inkişaf etdirərək regional və qlobal enerji təhlükəsizliyinin təmin olunmasında mühüm tərəfdaş mövqeyini daha da gücləndirmək əzmindədir. Enerji diplomatiyasının uğurlu nəticələri, beynəlxalq əməkdaşlığın genişlənməsi və yaşıl enerji gündəliyinin ardıcıl şəkildə həyata keçirilməsi ölkəmizin bu sahədə strateji rolunu gələcək illərdə də qoruyub saxlayacağını təsdiqləyir.

Lalə İskəndərova

YAP Qusar rayon təşkilkatının məsləhətçisi

Paylaş:

Baxılıb: 6 dəfə