Tarixin Sınaqlarından Zəfərin Zirvəsinə: 26 İyun — Qüdrətin Və Şərəfin Təntənəsi

Bakı:

32 °C

40 %

12 m/s

Əlaqə

AZ RU EN

Ana səhifə / YAP xəbərləri / Tarixin Sınaqlarından Zəfərin Zirvəsinə: 26 İyun — Qüdrətin Və Şərəfin Təntənəsi

Tarixin Sınaqlarından Zəfərin Zirvəsinə: 26 İyun — Qüdrətin Və Şərəfin Təntənəsi

22.06.2026 [23:04]

Müasir dünyada müstəqilliyin rəmzi təkcə dövlət atributları deyil, həm də o atributları qorumağa qadir olan polad iradəli ordudur. Bu gün Azərbaycan Silahlı Qüvvələri regionun ən qüdrətli hərbi qüvvəsi kimi həm tariximizin ən parlaq səhifələrini yazır, həm də gələcəyimizin təhlükəsizlik xəritəsini cızır.

Hər bir xalqın tarixində elə günlər var ki, onlar təqvimdə sadəcə bir rəqəm deyil, millətin dirçəlişinin, dövlətçilik təfəkkürünün və milli qürurunun rəsmi sənədidir. Azərbaycan xalqı üçün 26 İyun — Silahlı Qüvvələr Günü məhz belə təməl daşlarından biridir. 1918-ci ildə, Şərqin ilk demokratik respublikası olan Azərbaycan Xalq Cümhuriyyəti dövründə general Səməd bəy Mehmandarov, Əliağa Şıxlinski kimi hərb fədailərinin çətin şəraitdə əsasını qoyduğu Əlahiddə Azərbaycan Korpusu bu gün müasir, modern və sarsılmaz bir orduya çevrilib. Bu tarixi yol sadəcə xronologiya deyil, bir xalqın yoxdan var olma, özünü qoruma və qalib gəlmə dastanıdır.

Ordumuzun keçdiyi yol hamar olmayıb. XX əsrin sonlarında müstəqilliyini yenidən bərpa edən Azərbaycan, eyni zamanda xarici təcavüz və daxili xaosla üz-üzə qalmışdı. Məhz Ümummilli Lider Heydər Əliyevin 1993-cü ildə xalqın təkidli tələbi ilə hakimiyyətə qayıdışından sonra da pərakəndə silahlı qruplaşmalardan nizamlı, vahid komandanlığa tabe olan ordu quruculuğuna start verildi. Ulu Öndərin uzaqgörən siyasəti, hərbi təhsil sisteminin qurulması və ordunun maddi-texniki bazasının möhkəmləndirilməsi bugünkü qələbələrimizin intellektual və strateji təməlini qoydu.

Son 20 ildə isə Prezident, Müzəffər Ali Baş Komandan İlham Əliyevin rəhbərliyi altında Azərbaycan Silahlı Qüvvələri keyfiyyətcə tamamilə yeni bir mərhələyə qədəm qoydu. Ölkəmizin iqtisadi müstəqilliyi hərbi sənayenin inkişafına, ən müasir silahların, pilotsuz uçuş aparatlarının, yüksək dəqiqlikli raket sistemlərinin ordunun arsenalına daxil edilməsinə imkan yaratdı. Lakin 26 İyun bayramını bizim üçün əsl qürur mənbəyinə çevrən amil təkcə silahların gücü deyil, o silahı tutan əllərin və o əlləri idarə edən ürəklərin vətən sevgisidir.

Uzun illər boyu Silahlı Qüvvələr Gününü qeyd edərkən içimizdəki o gizli nisgili — torpaqlarımızın işğal altında olması faktını unuda bilmirdik. Lakin 2020-ci ilin payızında başlayan 44 günlük Vətən müharibəsi və ardınca həyata keçirilən lokal xarakterli antiterror tədbirləri status-kvonu tamamilə dəyişdi. Azərbaycan əsgəri dünyaya sübut etdi ki, ədalət gecikə bilər, amma heç vaxt unudulmur.

Şuşanın sıldırım qayalarını yalın əllərlə, bıçaqla, sarsılmaz bir imanla dırmaşan, düşmənin onilliklər ərzində qurduğu, keçilməz hesab olunan mühəndis-istehkam xətlərini darmadağın edən Azərbaycan hərbçisi dünya hərb tarixinə yeni bir imza atdı. Bu gün aparıcı dünya ölkələrinin hərbi akademiyalarında Azərbaycan Ordusunun keçirdiyi əməliyyatlar, tətbiq etdiyi taktikalar xüsusi fənn kimi tədris olunur. Biz sadəcə torpaqlarımızı azad etmədik, həm də beynəlxalq hüququn kağız üzərində qalan qətnamələrini döyüş meydanında icra edərək tarixi ədaləti bərpa etdik.

Bu gün Şərqi Zəngəzurun və Qarabağın uca zirvələrində, dumanlı Murovda, çətin relyefli Laçın və Kəlbəcər dağlarında keşik çəkən əsgərimizin sayəsində şəhərlərimizdə, kəndlərimizdə həyat öz normal axarı ilə davam edir. Biz evlərimizdə rahat nəfəs alırıqsa, ölkəmiz böyük quruculuq, "Ağıllı kənd" və şəhər layihələri ilə dünyanı heyran qoyursa, bu dinc quruculuğun arxasında soyuğa, şaxtaya, çətinliyə məhəl qoymadan postda duran Azərbaycan hərbçisi dayanır.

"Ordu təkcə dövlətin müdafiə mexanizmi deyil. Ordu — xalqın namusu, milli mənliyi və suverenliyinin ən böyük təminatçısıdır."

Azərbaycan Ordusunun ən böyük gücü onun xalqla bütövləşməsindədir. "Xalq-Ordu-Prezident" birliyi ölkəmizin ətrafında yaradılmaq istənilən bütün geosiyasi təzyiqləri dəmir yumruq kimi əzməyə qadirdir. Bu ordu xalqın içindən çıxan, onun hər bir fərdinin duası və sevgisi ilə bəslənən qəhrəmanlar ordusudur.

Biz bu möhtəşəm bayramı qeyd edərkən ilk növbədə canlarını bu torpaq, bu bayraq naminə fəda etmiş müqəddəs şəhidlərimizin xatirəsini dərin ehtiramla yad edirik. Onların qanı ilə suvarılan, hər qarışı can baha başa gələn bu vətəni göz bəbəyi kimi qorumaq Silahlı Qüvvələrimizin ən ali vəzifəsidir. Ordumuz bu gün həm şəhidlərimizin ruhu, həm də gələcək nəsillər önündə bu borcu şərəflə yerinə yetirir.

26 İyun — təkcə mundir geyinənlərin deyil, qəlbi vətən eşqi ilə döyünən, bu ordunun qələbəsi ilə qürur duyan hər bir Azərbaycan vətəndaşının bayramıdır. Çünki güclü xalq olmadan qüdrətli ordu, qüdrətli ordu olmadan isə əbədi və sarsılmaz müstəqillik mümkün deyil.

Bayramın mübarək, Azərbaycan əsgəri! Addımların hər zaman mətin, nizamın sarsılmaz, zəfərlərin daimi olsun! Dövlətimizin polad dayağı, bayramın mübarək!

Rizvan Məmmədov

YAP Şahbuz rayon təşkilatının sədri

Paylaş:

Baxılıb: 380 dəfə