Sözün dövlətçilik missiyası

Bakı:

26 °C

61 %

5 m/s

Əlaqə

AZ RU EN

Ana səhifə / YAP xəbərləri / Sözün dövlətçilik missiyası

Sözün dövlətçilik missiyası

21.07.2026 [14:20]

Azərbaycan milli mətbuatının əsası Həsən bəy Zərdabinin nəşr etdirdiyi “Əkinçi” qəzeti ilə qoyulsa da, bu irs bu gün tamamilə yeni keyfiyyət mərhələsində inkişafını davam etdirir. Ötən 151 il ərzində milli jurnalistika maarifçilik missiyasını qorumaqla yanaşı, cəmiyyətin ictimai-siyasi həyatına təsir göstərən, milli maraqların müdafiəsində mühüm rol oynayan strateji institutlardan birinə çevrilmişdir. Məhz buna görə də 22 İyul – Milli Mətbuat Günü yalnız peşə bayramı deyil, həm də Azərbaycan dövlətçiliyinin və milli düşüncə tarixinin əlamətdar günlərindən biri kimi qiymətləndirilir.

Müstəqillik illərində həyata keçirilən ardıcıl dövlət siyasəti milli medianın inkişafına yeni imkanlar açmışdır. Ümummilli Lider Heydər Əliyevin rəhbərliyi ilə söz və mətbuat azadlığının təmin olunması istiqamətində atılmış tarixi addımlar, senzuranın ləğvi və hüquqi islahatlar müasir media sisteminin formalaşmasının əsasını qoymuşdur. Bu siyasi kurs Prezident İlham Əliyev tərəfindən dövrün yeni çağırışlarına uyğun şəkildə uğurla davam etdirilir. Son illərdə media sahəsində həyata keçirilən islahatlar göstərir ki, dövlət yalnız informasiya azadlığının təmin edilməsini deyil, həm də peşəkar, dayanıqlı və rəqabətqabiliyyətli milli media mühitinin formalaşdırılmasını prioritet hesab edir. Medianın İnkişafı Agentliyinin yaradılması, “Media haqqında” Qanunun qəbul edilməsi, media subyektlərinə tətbiq olunan vergi güzəştləri, jurnalistlərin sosial müdafiəsinin gücləndirilməsi və güzəştli ipoteka imkanlarının yaradılması bu siyasətin mühüm tərkib hissəsidir.

Müasir dövr informasiya məkanında rəqabətin artıq yalnız ölkə daxilində deyil, qlobal miqyasda aparıldığını göstərir. Dezinformasiyanın geniş yayıldığı, süni intellekt texnologiyalarının informasiya istehsalına təsir göstərdiyi bir şəraitdə peşəkar jurnalistikanın məsuliyyəti daha da artır. Azərbaycan mediasının qarşısında duran əsas vəzifələrdən biri milli informasiya resurslarının potensialını gücləndirmək, cəmiyyətin düzgün və operativ məlumat almaq hüququnu təmin etmək, dövlət maraqlarını beynəlxalq informasiya məkanında ardıcıl şəkildə müdafiə etməkdir. Bu baxımdan Şuşada keçirilən Qlobal Media Forumları və Azərbaycan-Türkiyə media sahəsində strateji əməkdaşlığı yalnız beynəlxalq tədbirlər deyil, həm də ortaq informasiya təhlükəsizliyi və dezinformasiyaya qarşı mübarizənin mühüm platformalarıdır. Bu təşəbbüslər Azərbaycan mediasının beynəlxalq nüfuzunun yüksəlməsinə və dünya informasiya məkanına inteqrasiyasına əhəmiyyətli töhfə verir.

Bu gün Azərbaycan mətbuatı zəngin tarixi ənənələrə söykənərək rəqəmsal transformasiya dövrünün tələblərinə uyğun yenilənir. Peşəkarlıq, obyektivlik, milli maraqlara sədaqət və ictimai məsuliyyət prinsiplərinə əsaslanan jurnalistika ölkəmizin davamlı inkişafına xidmət edən mühüm strateji resurs olaraq öz əhəmiyyətini qorumaqdadır. Milli mətbuatın keçdiyi yol göstərir ki, güclü dövlətin ayrılmaz atributlarından biri də güclü, məsuliyyətli və müasir mediadır.

Natiq Quluzadə

YAP Zəngilan rayon təşkilatının sədri

Paylaş:

Baxılıb: 187 dəfə