27 Sentyabr – Zəfərə aparan yolun başlanğıcı

Bakı:

22 °C

83 %

9 m/s

Əlaqə

AZ RU EN

Ana səhifə / YAP xəbərləri / 27 Sentyabr – Zəfərə aparan yolun başlanğıcı

27 Sentyabr – Zəfərə aparan yolun başlanğıcı

25.09.2026 [14:14]

Azərbaycan xalqının tarixində bəzi günlər vardır ki, həmin tarixlər milli yaddaşın ayrılmaz hissəsinə çevrilir. 27 Sentyabr da belə günlərdəndir. Anım Günü kimi qeyd olunan bu tarix Vətən müharibəsində şəhid olan qəhrəmanlarımızın xatirəsinə ehtiramı ifadə etməklə yanaşı, Azərbaycan xalqının 44 günlük mübarizəsinin başlanğıcını simvolizə edir.

Uzun illər ərzində Azərbaycan torpaqlarının işğal altında saxlanılması regionda davamlı gərginlik mənbəyi olmuşdur. Ermənistanın Azərbaycana qarşı ərazi iddiaları, o cümlədən tarixən səsləndirilmiş “dənizdən-dənizə Ermənistan” kimi əsassız ideyalar bu siyasətin ideoloji təzahürlərindən biri olmuşdur. İşğal nəticəsində yüz minlərlə azərbaycanlı doğma yurdlarından didərgin düşmüş, şəhər və kəndlərimiz dağıdılmışdır.

Azərbaycan uzun illər münaqişənin sülh yolu ilə həllinə çalışsa da, Ermənistanın təxribatları davam etmişdir. 2020-ci il sentyabrın 27-də Ermənistan silahlı qüvvələrinin genişmiqyaslı hərbi təxribatına cavab olaraq Azərbaycan Ordusu əks-hücum əməliyyatına başladı.

Həmin gündən etibarən Azərbaycan xalqı böyük birlik və həmrəylik nümayiş etdirdi. Cəbhədən gələn hər bir qələbə xəbəri xalqımızda böyük ruh yüksəkliyi yaradırdı. Ordumuz bir-birinin ardınca mühüm yaşayış məntəqələrini və strateji yüksəklikləri azad edirdi.

Prezident İlham Əliyev həmin dövrü xarakterizə edərkən qeyd etmişdir: “44 gün ərzində bir gün də olmayıb ki, biz geriyə addım ataq.” Bu fikir Azərbaycan Ordusunun Vətən müharibəsində göstərdiyi iradə və əzmkarlığın mühüm ifadəsidir.

Şuşanın azad edilməsi isə müharibənin taleyində xüsusi əhəmiyyət daşıyan hadisələrdən biri oldu. Azərbaycan Ordusunun döyüş meydanında qazandığı uğurlar nəticəsində Ermənistan rəhbərliyi kapitulyasiya sənədini imzalamağa məcbur oldu. Beləliklə, Azərbaycan öz ərazi bütövlüyünü hərbi-siyasi yollarla təmin etdi. Prezident İlham Əliyevin sözləri ilə desək: “Biz düşməni torpaqlarımızdan qovduq və ədaləti, beynəlxalq hüququ bərpa etdik. Biz milli ləyaqətimizi bərpa etdik.”

Lakin bu tarixi Qələbənin qiyməti çox ağır oldu. Azərbaycan Ordusunun minlərlə hərbi qulluqçusu Vətən uğrunda şəhidlik zirvəsinə ucaldı. Onların fədakarlığı xalqımızın ərazi bütövlüyünün bərpasında həlledici rol oynadı. Buna görə Anım Günü ilk növbədə şəhidlərimizin xatirəsinə ehtiram günüdür.

Dövlətimizin başçısının 27 Sentyabr 2021-ci ildə xalqa müraciətində söylədiyi “Biz şəhidlərimizi öz qəlbimizdə əbədi saxlayacağıq” fikri xalqımızın şəhidlərə münasibətini ifadə edən mühüm sözlərdəndir.

Vətən müharibəsinin tarixi nəticələrinin gələcək nəsillərə çatdırılması baxımından Hərbi Qənimətlər Parkının da xüsusi əhəmiyyəti vardır. Parkda Ermənistan ordusunun məhv edilmiş və qənimət götürülmüş hərbi texnikasının bir hissəsi nümayiş etdirilir. Prezident İlham Əliyev parkın açılışında bu məkanın əhəmiyyətini belə ifadə etmişdir: “Burada nümayiş etdirilən texnika məhv edilmiş və qənimət götürülmüş düşmən texnikasının kiçik bir hissəsini təşkil edir.” Dövlət başçısı həmçinin bildirib ki, parka gələn hər kəs Azərbaycanın Qələbəsinin nə qədər çətin mübarizə nəticəsində əldə edildiyini görəcək. Hərbi Qənimətlər Parkı bu baxımdan yalnız hərbi texnikanın nümayiş etdirildiyi məkan deyil. O, Azərbaycanın Vətən müharibəsində qazandığı tarixi Zəfərin maddi yaddaş nümunələrindən biridir.

27 Sentyabr – Anım Günü bizə şəhidlərimizin müqəddəs xatirəsini yaşatmağın, onların qəhrəmanlığını gələcək nəsillərə çatdırmağın vacibliyini xatırladır. Bu gün hər bir Azərbaycan vətəndaşı Vətən uğrunda canından keçmiş qəhrəmanlarımızın qarşısında dərin ehtiramla baş əyir. Şəhidlərimizin adı xalqımızın qəlbində əbədi yaşayacaq. Onların müqəddəs ruhu qarşısında borcumuz isə Zəfərimizin və müstəqil Azərbaycanın dəyərlərini qorumaqdır. 27 Sentyabr – Anım Günü şəhidlərimizə sonsuz ehtiramın, milli yaddaşımızın və Zəfər tariximizin müqəddəs səhifəsidir.

Allah bütün şəhidlərimizə rəhmət eləsin!

YAP Samux rayon təşkilatının sədr müavini Sevinc Xəlilova