Zəngilanın Yenidən Doğuşu: Müzəffər Ali Baş Komandanın Tarixi Səfərləri və Qayıdışın Təməlləri

Error:

AZ RU EN

Ana səhifə / YAP xəbərləri / Zəngilanın Yenidən Doğuşu: Müzəffər Ali Baş Komandanın Tarixi Səfərləri və Qayıdışın Təməlləri

Zəngilanın Yenidən Doğuşu: Müzəffər Ali Baş Komandanın Tarixi Səfərləri və Qayıdışın Təməlləri

19.10.2026 [15:05]

44 günlük Vətən müharibəsində qazanılan möhtəşəm Zəfərdən dərhal sonra işğaldan azad edilmiş torpaqlarımızda misilsiz bərpa və quruculuq salnaməsi başlandı. Bu tarixi prosesin önündə dayanan Müzəffər Ali Baş Komandan, Prezident İlham Əliyevin azad olunmuş bölgələrə, o cümlədən strateji əhəmiyyətə malik Zəngilan rayonuna müntəzəm səfərləri təkcə Böyük Qayıdışın sürətlənməsinə deyil, həm də regional inkişafın təməl daşlarının qoyulmasına xidmət edir. Hər bir səfər özlüyündə Zəngilanın yenidən dirçəlişinə, onun müasir infrastruktura və qabaqcıl texnologiyalara əsaslanan parlaq gələcəyinə istiqamətlənmiş mühüm addımlarla yaddaqalandır.

Zəngilanın azadlıq və quruculuq salnaməsinin ilk xüsusi səhifəsi 23 dekabr 2020-ci il tarixində yazıldı. Dövlətimizin başçısının Zəngilan şəhərinə ilk tarixi səfəri zamanı müqəddəs Azərbaycan bayrağının şəhər mərkəzində ucaldılması xalqımızın milli qürurunun və dövlətimizin bu torpaqlardakı əbədi suverenliyinin təntənəsi oldu. Üçrəngli bayrağımızın zəfər sədaları altında dalğalanması ilə Zəngilanda onilliklər boyu sürən həsrətə son qoyuldu və rayonun sürətli bərpası üçün yeni dövrün başlanğıcı elan edildi.

Qələbədən dərhal sonra atılan addımların ardıcıllığı dövlətimizin strateji baxışını və uzaqgörən siyasətini aydın şəkildə nümayiş etdirirdi. Növbəti mərhələdə, 14 fevral 2021-ci il tarixində həyata keçirilən səfər zamanı işğal dövründə rayona, onun infrastruktur obyektlərinə və zəngin təbiətinə vurulmuş zərərin ümumi dəyərləndirilməsi aparıldı. Düşmənin dağıtdığı şəhər və kəndlərin xarabalıqları üzərində yeni, müasir və təhlükəsiz həyatın qurulması üçün genişmiqyaslı işlərin dəqiq planlaşdırılması həyata keçirildi, elmi və praktiki təməllər məhz bu mərhələdə müəyyənləşdirildi.

26 aprel 2021-ci il tarixi isə Zəngilanın və bütövlükdə Qarabağ ilə Şərqi Zəngəzurun bərpa konsepsiyasında dönüş nöqtəsi kimi tarixə düşdü. Prezident İlham Əliyevin Zəngilan rayonunun sakinləri ilə səmimi görüşü keçmiş məcburi köçkünlərin doğma yurdlarına qayıdış inamını daha da möhkəmləndirdi. Məhz həmin gün Zəngilanın 1-ci, 2-ci və 3-cü Ağalı kəndlərini əhatə edən, regionda analoqu olmayan birinci “Ağıllı kənd” layihəsinin təməli qoyuldu.

Müasir texnologiyaların tətbiqi ilə yanaşı, bölgənin nəqliyyat və loqistika qovşağına çevrilməsinin təməli də həmin gün atıldı. Zəngilan Beynəlxalq Hava Limanının və strateji önəm daşıyan Zəngilan-Horadiz avtomobil yolunun təməlqoyma mərasimlərinin keçirilməsi rayonun qlobal nəqliyyat dəhlizlərinə inteqrasiyasını təmin etdi. Bu addımlar Zəngilanın təkcə bərpa olunacağını deyil, həm də yüksek texnologiyalı modern bir mərkəzə çevriləcəyini bütün dünyaya nümayiş etdirdi.

Quruculuq işlərinin dinamikası və təməli qoyulmuş layihələrin icra vəziyyəti dövlət başçısının daim diqqət mərkəzində saxlanılırdı. 20 oktyabr 2021-ci il tarixində Zəngilana növbəti səfər çərçivəsində Ağalı kəndindəki “Ağıllı kənd” layihəsi üzrə görülən işlərlə, eləcə də Zəngilan Beynəlxalq Hava Limanının tikintisi ilə yaxından tanışlıq baş tutdu. Tikinti prosesinin gedişatı işlərin yüksek keyfiyyətlə və sürətlə davam etdirildiyini göstərdi.

Bölgədə dayanıqlı həyatın təmin edilməsi üçün təhlükəsizlik və energetika infrastrukturunun qurulması prioritet məsələ kimi öndə saxlanılırdı. Həmin səfər zamanı Dövlət Sərhəd Xidmətinin Zəngilan rayonunda yerləşən hərbi hissə kompleksində yaradılan modern şəraitlə tanışlıq baş tutdu. Eyni zamanda, rayonun fasiləsiz elektrik enerjisi ilə təmin olunması üçün “Azərenerji” ASC-nin 110/35/10 kV-luq “Zəngilan” yarımstansiyası istifadəyə verildi və Rəqəmsal Yarımstansiyanın təməli atıldı.

Bütün bu ardıcıl və məqsədyönlü addımlar Müzəffər Ali Baş Komandan İlham Əliyevin rəhbərliyi ilə Zəngilanın yenidən məskunlaşması və dayanıqlı inkişafı üçün təhlükəsizlik, nəqliyyat və enerji dayaqlarının tam formalaşdırıldığını sübut edir. Zəngilanda həyata keçirilən böyük quruculuq işləri Böyük Qayıdışın parlaq təzahürü olaraq bölgəyə yeni nəfəs və əbədi dirçəliş gətirir.

Kərimli Elvin

Yap Ordubad Rayon Təşkilatının əməkdaşı

Paylaş:

Baxılıb: 20 dəfə

Xəbər lenti

Hamısına bax