ABŞ-ın məqsədi nədir?!

Bakı:

26 °C

49 %

4 m/s

Əlaqə

AZ RU EN

Ana səhifə / YAP xəbərləri / ABŞ-ın məqsədi nədir?!

ABŞ-ın məqsədi nədir?!

17.09.2023 [20:54]

Nazim İsmayılov

Yeni Azərbaycan Partiyası Veteranlar Şurasının üzvü

Son günlər ABŞ hökumətinin Azərbaycana qarşı göstərdiyi ədalətsiz münasibət təəssüf doğurmaqla yanaşı, cəmiyyətdə həmin dövlətin yürütdüyü məkrli siyasətə nifrət hissini gücləndirmişdir.
Özünü dünyada “demokratik, insan hüquq və azadlıqlarının təminatçısı” kimi göstərən ABŞ unutmamalıdır ki, artıq elə bir dövr yetişmişdir ki, kimin kim olduğu hərkəs tərəfindən açıq-aydın görünür.
Yaxın keçmişə nəzər salanda görürük ki, Amerikanın dünyada yeritdiyi siyasət heç də sülhə, əminamanlığa, sabitliyə xidmət etmir.
ABŞ hər zaman öz maraqlarından çıxış edərək dünyada qarışıqlıq yaratmağa “töhfələr” verən bir ölkə statusunda ad çıxarmışdır. Yaxın keçmişdə Əfqanıstanda, İraqda, Liviyada, Suriyada və bir sıra başqa ölkələrdə baş verən dövlət çevrilişləri əyani sübutdur. Həmin ölkələrdə baş verən iğtişaşların təşkilatçısı ABŞ olmaqla yüz minlərlə insanların ölümünə, şəhərlərin, kəndlərin dağıdılmasına bais olmuşdur. Bunun müqabilində öz maraqlarını güdərək həmin ölkələrin varidatlarını, sərvətlərini ələ keçirərək istismar etməkdədir.
Əfsuslar olsun ki, ABŞ hökuməti müstəqil siyasət yeridən Azərbaycana qarşı da müxtəlif vaxtlarda belə çirkin əməllərə əl atmışdır. Lakin bunların heç biri baş tutmamış, “arzuları” ürəklərində qalmışdır.
Torpaqları 30 il işğal altında qalan Azərbaycana dəstək olmaq əvəzinə bu gün Amerikanın açıq-aşkar təcavüzkar Ermənistanı dəstəkləməsi ölkəmizdə ikrah hissi doğurur. Ədalətdən, demokratiyadan dəm vuran ABŞ erməni işğalçılarının qeyd-şərtsiz Azərbaycan torpaqlarından çıxması barədə BMT Təhlükəsizlik Şurasının 4 qətnaməsinin icrasına mane olmuşdur.
Özlərinin maraq dairəsində olan bir sıra ölkələrin ərazi bütövlüyünü dəstəkləyən ABŞ bir dəfə də olsun Azərbaycanın haqq səsinə səs vermədi. Bölgədə baş verən hadisələrə biganə qaldı, erməni vəhşiliklərinə göz yumdu, Xocalı kimi əsrin faciəsini heç bir şey olmamış kimi qarşıladı. ATƏT-in Minsk Qrupunun həmsədri kimi uzun illər münaqişənin dondurulmuş vəziyyətdə qalması üçün əlindən gələn hər şeyi etdi.
Azərbaycan problemin sülh yolu ilə həlli üçün özündən asılı olan bütün işləri gördü. Lakin bu bir nəticə vermədi, əksinə ermənilər 2020-ci ilin sentyabr ayının 27-də açıq təxribata rəvac verdilər. Belə bir şəraitdə xalqın iradəsi, Azərbaycan rəhbərliyinin qətiyyəti, Müzəffər Ordumuzun şücaəti sayəsində 44 günlük Vətən Müharibəsində torpaqlarımız işğaldan azad olundu. Bu gün Qarabağımızda nəhəng bərpa, quruculuq işləri görülür, minalanmış ərazilərimiz təmizlənir, dədə-baba torpaqlarından didərgin salınmış soydaşlarımız yurdlarına qayıdırlar.
Gözləmək olardı ki, özünü “sabitliyin, əminamanlığın, sülhün qarantı" kimi təqdim edən Amerika buna sevinəcək, bölgədə daimi sülhün bərqərar olmasına öz dəstəyini göstərəcək. Təəssüf ki, belə olmadı. ABŞ bu uğurları həzm edə bilmədiyindən bölgədə vəziyyəti gərginləşdirmək üçün dəridən qabıqdan çıxır.
ABŞ-ın nümayəndəsi Konqresdə çıxış edərək 30 il işğal altında qalmış Azərbaycan torpaqları azad edildikdən sonra aşkar olunmuş məzarlıqlardan danışmaq əvəzinə mövcud olmayan “Dağlıq Qarabağ xalqının hüquqları”ndan danışmazdı.
Reallıq budur ki, ABŞ-ın regionda məqsədi sabitliyin pozulması, ermənilərin maraqlarına xidmət edən siyasət yürütməkdən ibarətdir.
Amerika açıq-aşkar bugünkü məkrli siyasəti ilə Ermənistanı “ikinci Ukrayna”ya çevirmək istəyir. Bu isə Ermənistanın məhvindən başqa bir şey deyildir.
Ermənilər bilməlidirlər ki, ABŞ Ermənistan-Azərbaycan münaqişəsinin həll olunmasında maraqlı deyil. Onlar istəyir Qafqazda mövcud olan münaqişəni alovlandırsın. Necə ki, Ukraynada etdi. Ukraynanı qızışdırıb Rusiya ilə müharibəyə başlatdı, Ukraynada xeyli insanlar məhv oldu, şəhərlər və kəndlər dağıdıldı, torpaqlar işğal olundu, ABŞ isə bundan yararlanaraq silah-sursat təchizatı ilə Kiyevi özündən asılı vəziyyətə saldı. İndi də Ukraynanın ərazisinin işğalı ilə barışmağa məcbur etmək istəyir. Necə ki, bir vaxt ABŞ bu oyunları Gürcüstanda həyata keçirdi. Onları Rusiya ilə toqquşdurdu, sonra da Amerika aradan çıxdı. Bax budur ABŞ-ın dövlət siyasətinin mahiyyəti.

Paylaş:

Baxılıb: 596 dəfə