Azərbaycanın çoxəsrlik dövlətçilik və hərb tarixində 8 Noyabr tarixi milli qürurun, əyilməz iradənin və haqqın bərqərar olmasının ən uca zirvəsi kimi əbədi yaşayacaqdır. İkinci Qarabağ müharibəsi zamanı Müzəffər Ali Baş Komandan İlham Əliyevin rəhbərliyi altında rəşadətli Azərbaycan Silahlı Qüvvələrinin keçirdiyi unikal hərbi əməliyyat nəticəsində Qarabağın tacı, Azərbaycan mədəniyyətinin beynəlxalq mərkəzi olan Şuşa şəhərinin erməni işğalından azad edilməsi otuz illik həsrətə son qoydu. Həmin şanlı zəfər günü dövlət başçısının sərəncamı ilə Zəfər Günü və Şuşa Şəhəri Günü kimi təsbit edilmişdir. Bu əlamətdar gün sadəcə bir yaşayış məntəqəsinin azad edilməsi tarixi deyil, həm də bütün Azərbaycan xalqının milli birliyinin, əzminin, dözümlülüyünün və hərbi qüdrətinin parlaq təntənəsidir. Şuşanın azad olunması Vətən müharibəsinin həlledici nöqtəsi olmaqla düşməni kapitulyasiya aktına imza atmış, ərazi bütövlüyümüzün və suverenliyimizin bərpasının təməl daşını qoymuşdur.

Şuşa əməliyyatı dünya hərb elminin və hərbi tarixinin ən fantastik, analoqu olmayan sənət nümunələrindən biri kimi qəbul edilməkdədir. Sərt dağlıq relyefə, keçilməz sıldırım qayalara və düşmənin ağır texnika ilə möhkəmləndirdiyi strateji müdafiə xətlərinə baxmayaraq, Azərbaycanın peşəkar xüsusi təyinatlı qüvvələri yüngül silahlarla, mürəkkəb dağ yollarını və meşələri aşaraq Şuşaya daxil olmuşlar. Düşmənin gözləmədiyi istiqamətdən, sıldırım qayalara dırmaşaraq şəhərə daxil olan fədakar əsgər və zabitlərimiz əlbəyaxa döyüşlərdə misilsiz qəhrəmanlıq göstərərək şəhəri işğalçılardan təmizləmişlər. Bu əməliyyat Azərbaycan hərbçisinin yüksək döyüş intizamını, mənəvi-psixoloji üstünlüyünü və vətən sevgisini bütün dünyaya nümayiş etdirdi. Şuşa zirvəsində üçrəngli dövlət bayrağımızın ucalıdılması xalqımızın qəlbində sonsuz fəxarət hissi oyatdı və Ali Baş Komandanın "Şuşasız işimiz yarımçıq qalardı" kəlamının real təzahürünə çevrildi.

Şuşa şəhərinin azad edilməsi Azərbaycan üçün yalnız hərbi-strateji qələbə deyil, həm də mənəvi, mədəni və tarixi kimliyin özünə qaytarılması demək idi. Qarabağ xanlığının banisi Pənahəli xan tərəfindən təməli qoyulan Şuşa əsrlər boyu Azərbaycanın musiqi, poeziya, memarlıq və incəsənət mərkəzi olmuş, ölkəmizə dahi şəxsiyyətlər bəxş etmişdir. İşğal dövründə düşmən tərəfindən dağıdılan, mədəni irsi saxtalaşdırılan və tarixi binaları viran qoyulan Şuşa azad edildiyi ilk gündən etibarən genişmiqyaslı bərpa və yenidənqurma dövrünə qədəm qoymuşdur. Prezident İlham Əliyev tərəfindən Şuşanın Azərbaycanın Mədəniyyət Paytaxtı elan edilməsi, həmçinin Türk Dünyasının Mədəniyyət Paytaxtı missiyasını öz üzərinə götürməsi şəhərin beynəlxalq müstəvidəki nüfuzunu yenidən bərpa etdi. Bu gün Şuşada "Xarıbülbül" Musiqi Festivalı, Vaqif Poeziya Günləri və digər möhtəşəm beynəlxalq tədbirlər keçirilir, sönmüş ocaqlar yenidən yandırılır.

Bu gün suverenliyini tam bərpa etmiş Azərbaycan dövləti Şuşa şəhərində tarixi və müasir arxitekturanın vəhdətini təşkil edən nəhəng infrastrukturlar inşa edir. Şəhərin Baş Planına uyğun olaraq yaşayış binaları, məktəblər, otellər, mədəniyyət mərkəzləri, inzibati obyektlər sıfırdan tikilir və ya tarixi görkəmi saxlanılmaqla bərpa olunur. Qələbə Yolu və Zəfər yolları ilə respublikanın ümumi nəqliyyat şəbəkəsinə inteqrasiya olunan Şuşa eyni zamanda rəqəmsal texnologiyaların tətbiq edildiyi modern məkan kimi formalşır. "Böyük Qayıdış" proqramı çərçivəsində keçmiş məcburi köçkünlərin öz doğma ocaqlarına daimi yaşamağa qayıtması Şuşaya həqiqi canlılıq və ruh bəxş edir. 8 Noyabr Şuşa Şəhəri Günü rəşadətli ordumuzun qazandığı tarixi zəfərin, dövlət başçısının dəmir iradəsinin və xalqımızın sarsılmaz birliyinin əbədi manifesti olaraq gələcək nəsillərə ən böyük qürur mirası kimi ötürüləcəkdir.

Varis Rüstəmov,

Yeni Azərbaycan Partiyası Sabirabad rayon təşkilatının sədri