Zəruri qərar...

Bakı:

25 °C

61 %

10 m/s

Əlaqə

AZ RU EN

Ana səhifə / Xəbər lenti / Zəruri qərar...

Zəruri qərar...

13.01.2023 [10:40]

Hərbi qulluqçular narkoloji müayinədən keçiriləcəklər

Nicat Dilqəmli

Böyük təəssüf hissi ilə qeyd edilməlidir ki, bütün dünyada dövrün bəlasında çevrilən narkotik maddələrdən istifadə son bir neçə ildir ki, ölkəmizdə də geniş şəkildə yayılıb. Xüsusilə yeniyetmələrin və gənclərin bu bəlaya düçar olmaları isə vəziyyəti bir qədər də dramatikləşdirir. Əfsuslar olsun ki, hazırda narkotiklə ilk tanışlıq bəzən elə orta məktəb dövründən başlayır. Müşahidələr onu deməyə əsas verir ki, bir çox hallarda narkotik maddələrdən istifadə edənlər çox qısa zaman kəsiyində onun qurbanına çevrilirlər, yəni bu maddələrdən asılı vəziyyətə düşürlər. İstər tibbin yaratdığı imkanlardan istifadə etməklə, istərsə də fərdi qaydada psixoloji cəhətdən müalicə olunmaqla bu yoldan geri dönmək heç də asan başa gəlmir.

Qeyd olunan məqamlar isə təbii olaraq insanlar arasında maarifləndirmə işlərinin aparılmasını zəruri edir. Ölkəmizdə də müvafiq qurumlar tərəfindən bu istiqamətdə lazımi tədbirlərin həyata keçirilməsi davamlı hal alıb. Demək olar ki, bütün sahələrdə narkotik maddələrin törətdiyi fəsadlar, bu bəlaya qurşanmış şəxslərin aqibəti barədə mütəmadi olaraq maarifləndirmə işləri aparılır. Buna baxmayaraq, hələ də narkotikdən istifadə edilməsi halları müşahidə olunmaqdadır. Bu isə daha ciddi addımların atılması məsələsini aktuallaşdırır. Belə addımlardan biri də istər dövlət, istərsə də özəl müəssisələrdə çalışanların vaxtaşırı narkoloji müayinəsinin keçirilməsidir.

Dünən Baş nazir Əli Əsədovun imzaladığı qərarla hərbi qulluqçuların icbari narkoloji müayinədən keçməsi qaydası təsdiqlənib. Bu Qayda “Narkoloji xidmət və nəzarət haqqında” Qanunun 24.4-cü maddəsinə uyğun olaraq hazırlanıb. Eyni zamanda, müddətli həqiqi hərbi xidmətə çağırılan, bağlaşma əsasında həqiqi hərbi xidmətə könüllü daxil olan və birbaşa kadr zabit heyətinə könüllü daxil olan şəxslərin, habelə həqiqi hərbi xidmət hərbi qulluqçularının (müddətli həqiqi hərbi xidmət hərbi qulluqçuları istisna olmaqla) icbari narkoloji müayinədən keçməsi qaydasını müəyyən edir. Qaydaya əsasən, müayinədən keçmək müvafiq orqanların rəhbərləri tərəfindən təmin olunur.

Mövzu ilə bağlı “Yeni Azərbaycan” qəzetinə danışan hərbi məsələlər üzrə ekspert Ədalət Verdiyev qərarın verilməsini çox müsbət addım kimi dəyərləndirib. Mütəxəssis qeyd edib ki, ordu sıralarında narkotikdən istifadə edən şəxslərin olması şəxsi heyətin təhlükəsizliyi, həm də xidmət edənlərin həyatı üçün böyük təhlükələrə yol aça bilər: “Tamamilə doğru qərardır. Çünki ətrafımızda baş verənləri görürük. Artıq bəzi hallarda məktəb yaşlı uşaqların belə narkotikdən istifadə etdiyinin şahidiyik. Zaman-zaman orduda və yaxud digər güc strukturlarında da bu yoxlamalar keçirilməlidir. Əgər xidmətdə olanlar arasında belə hallar aşkarlanarsa, bu, həmin şəxslərin ordu və ya güc strukturlarından tərxisi ilə nəticələnməlidir. Çünki əlində silah tutan, təhlükəsizlik və müdafiə vəzifələrini yerinə yetirən birisinin narkotik istifadəçisi olması həmin ərazidə xidmət edənlərin həyatı üçün böyük təhlükə yarada bilər”.

Paylaş:

Baxılıb: 555 dəfə