Halal, yoxsa haram...

Bakı:

28 °C

57 %

11 m/s

Əlaqə

AZ RU EN

Ana səhifə / Xəbər lenti / Halal, yoxsa haram...

Halal, yoxsa haram...

11.04.2023 [10:56]

AQTA-nın aşkarladığı nöqsanlar narahatlıq doğurur

Nicat Dilqəmli

Bir neçə gün öncə Azərbaycan Qida Təhlükəsizliyi Agentliyi (AQTA) tərəfindən kolbasa və sosiska məhsullarında aparılan yoxlamaların nəticəsinin açıqlanması cəmiyyətdə ciddi narahatlıq doğurub. Belə ki, AQTA tərəfindən ölkədə qida təhlükəsizliyinə risk əsaslı yanaşmanın tətbiqi ilə mövcud problemlərin, o cümlədən baş verən zəhərlənmə halları və daxil olan istehlakçı şikayətlərinə dair məlumat bazasının təhlili nəticəsində bir sıra qida təhlükəsizliyi problemlərinin müəyyənləşdirilərək müvafiq addımların atılması məqsədilə hazırlanan Multimonitorinq Planının icrası davam etdirilir. Məsələ ilə əlaqədar ölkə ərazisində fəaliyyət göstərən ticarət şəbəkələrindən kolbasa və sosiska məhsullarından nümunələr götürülərək, müayinə üçün Azərbaycan Qida Təhlükəsizliyi İnstitutunun müvafiq laboratoriyalarına təqdim olunub. Agentliyin məlumatına görə, cari dövr ərzində 57-si kolbasa, 32-si sosiska olmaqla, ümumilikdə 89 adda məhsuldan nümunə götürülüb. Sınaq nəticəsinə əsasən, 80 məhsuldan götürülən nümunə normativ sənədlərin tələblərinə cavab verib.

6 istehsalçıya məxsus 9 məhsulda (6-sı kolbasa, 3-ü sosiska) uyğunsuzluqlar müəyyən edilib ki, bunlardan 4 məhsulda (3-ü kolbasa, 1-i sosiska) uyğunsuzluq təhlükəsizlik göstəriciləri ilə, 5-??də isə (3-ü kolbasa, 2-si sosiska) etiket məlumatları ilə bağlıdır.

Nəzarət tədbirləri zamanı, “Halal” adı ilə satışa çıxarılan kolbasa və sosiska məhsullarının analizi nəticəsində həmin məhsulların tərkibində donuz əti aşkarlanmayıb.

Agentlik tərəfindən məhsullarının təhlükəsizlik göstəriciləri ilə bağlı uyğunsuzluq aşkarlanan istehsalçı müəssisələrdə qanunvericiliyə uyğun yoxlamalar həyata keçirilir, həmin məhsulların satış şəbəkələrindən geri çağırılması, məhdudiyyətlərin tətbiqi, inzibati məsuliyyət və digər tədbirlər görülür. Yoxlamaların nəticələri barədə ictimaiyyətə ətraflı məlumat təqdim ediləcək.

Bununla yanaşı, AQTA istehlakçılara müraciət edir ki, satış şəbəkələrində təhlükəsizlik göstəricilərində uyğunsuzluq aşkarlanan kolbasa-sosiska məhsulu partiyalarını istehlak etməsinlər və bazarlarda aşkarlandığı halda dərhal Agentliyin “1003” Çağrı Mərkəzi”nə məlumat versinlər.

AQTA tərəfindən aparılan yoxlamaların nəticələri barədə “Yeni Azərbaycan” qəzetinə danışan Azad İstehlakçılar Birliyinin (AİB) sədri Eyyub Hüseynov kolbasa və sosiska bazarının bazarın çox çirklənmiş bir hissəsi olduğunu bildirib. AİB sədri ölkədə normal kolbasa və sosiska istehsal edən müəssisələrin olduğunu da diqqətə çatdırıb. Onun sözlərinə görə, yerli istehsalçılar bir çox hallarda mal ətindən yox, camış ətindən istifadə edirlər ki, bu da monitorinqlər zamanı uyğunsuzluqların ortaya çıxması ilə nəticələnir: “Xüsusən ərzaq malının kolbasa sektorunda xaricdən gələn məmulatlarında çox böyük problem var. Yəni, tərkibində heç ət olmayan mallar Rusiyadan və digər ölkələrdən Azərbaycana idxal olunur. Tədqiqatlarımızın nəticələrinə görə, yerli istehsalçılarda isə mal ətinin əvəzinə camış ətindən istifadə edirlər. AQTA haqlı olaraq kolbasaların tərkibində mal əti müəyyən edə bilməyib. Bu, camış ətidir və normal ətlərdir. Lakin istehsalçı gərək kolbasanın üzərində camış ətindən hazırlandığını qeyd edərdi. Mal əti ilə camış əti eyni sinfə aid olduğu üçün mal əti yazılır”.

“Müsbət bir haldır ki, üzərinə “halal” yazılan kolbasa və sosiskaların tərkibində donuz əti aşkar edilməyib”, - deyə E.Hüseynov fikirlərinə əlavə edib.

AQTA uyğunsuzluq aşkarlanan məhsulların siyahısını da ictimaiyyətə təqdim edib.

Onları təqdim edirik: 10.02.2023 tarixdə istehsal edilən “Səhliyalı” Kiçik Müəssisəsi - yarım hisə verilmiş “Servelat” kolbasası, 22.02.2023 tarixdə istehsal edilən Rəhimovların Ailə Təsərrüfatı - bişirilmiş hisə verilmiş kolbasa, “Sevilən Ad” MMC - bişmiş “Lyubitelskaya” kolbasası (21.02.2023), “Əsl Dad” - bişmiş “Toyuq” kolbasası (10.02.2023) və bişmiş “Doktorskaya” kolbasası (20.02.2023), “Mir 2016” MMC - yarım hisə verilmiş “Servelat” kolbasası (04.02.2023), “M&T” Ltd firması (“Sevimli Dad”) - əla növ südlü sosiska (05.02.2023), “Səhliyalı” Kiçik Müəssisəsi - “Sacüstü” halal sosiska (04.02.2023), Ovçular Ət və Ət Məhsulları” MMC - “Külləmə” halal sosiska (17.02.2023).

Bu məhsullarda əsasən üzərində mal əti bəyan edilsə də, tərkibində toyuq DNT-sinin aşkarlanmadığı, üzərində donuz əti bəyan edilmədiyi halda, tərkibində donuz DNT-sinin aşkarlanması, üzərində mal əti və donuz piyi bəyan edilsə də, tərkibində yalnız donuz DNT-sinin aşkarlanması, təhlükəsizlik göstəricilərində uyğunsuzluğun aşkarlanması kimi hallar müəyyən edilib.

Paylaş:

Baxılıb: 559 dəfə