“Qarabağ” dünya sıralamasında yerini qoruyur

AZ RU EN

Ana səhifə / İdman / “Qarabağ” dünya sıralamasında yerini qoruyur

“Qarabağ” dünya sıralamasında yerini qoruyur

11.10.2022 [10:38]

Günel ABBAS

Ötən gün verilən məlumata görə, klubların dünya sıralaması müəyyənləşib. IFFHS-in açıqladığı reytinqdə 305 klubun qərarlaşdığı cədvəldə ölkəmizi yalnız “Qarabağ” təmsil edir. Keçən ay reytinqdə geriləyən “Qarabağ” bu dəfə yerində qalıb. Ağdam təmsilçisi aktivindəki 130,5 xalla 91-ci pillədədir. “Qarabağ”ın Avropa Liqasının qrup mərhələsindəki rəqiblərindən “Olimpiakos”da isə geriləmə müşahidə olunub. Yunanıstan təmsilçisi bir ay ərzində 63-cü yerdən 109-cu pilləyə düşüb.

“Qarabağ”ı zirvələrə aparan qələbə, “Olimpiakos”la oyunun təfərrüatları

“Olimpiakos”la oyun Qarabağa öz gücünü göstərmək üçün böyük fürsətlər verdi. “Qarabağ” “Nant”la oyundan sonra növbəti darmadağını da məhz burada gerçəkləşdirdi. Oyunun əvvəlində həm rəqib komandanın azarkeşlərində olan ermənipərəst mövqe, həm də səfərdə olmağın həyəcanı oyunçularda hiss olunurdu. Ancaq “Qarabağ” bu dəfə də səfər oyununda rəqibi mat etməyə getmişdi və öz üzərinə düşəni yerinə yetirdi. Futbolçularımızda təlaş və həyəcan vardı. 45 dəqiqəyə bu həyəcanı ata bilmədilər. Əvvəlki oyunlarda da müşahidə etmişik, “Qarabağ” öz oyununu oynayanda istənilən rəqiblə sona qədər mübarizə aparır, ən azından baxımlı oyun göstərir. Birinci hissədə ələ düşən fürsətlərin bəziləri boşa getsə də, ikinci hissədə bütün məsələ həll olundu.

İkinci hissədə rəqiblə hesabı ilk açan oyunçu Ovusu oldu. Əvvəlki oyunlarda göstərdiyi performanslara görə azarkeşlərin xüsusi rəğbət bəslədiyi oyunçu bu dəfə də gözləntiləri cavabsız qoymadı. İkinci qol Marko Veşoviçdən gəldi. Artıq bir neçə oyundur, stadionda öz məharətlərini göstərən Ramil Şeydayev üçüncü qolu vurdu və komanda əvəzsiz mübarizəsi ilə oyunun 3-0 öz xeyrinə bitməsinə nail oldu. Oyundan sonra bütün azarkeşlərin bir növ ürəyinə su səpildi. Az öncə də qeyd etdiyimiz kimi, ermənipərəst mövqe göstərənlərə görə bu komanda ilə qalibiyyət önəmli idi.

Oyundan sonra keçirilən mətbuat konfransında Qurban Qurbanov da bu qarşılaşmanın vacibliyinə toxunmuşdu. O bildirmişdi ki, əldə edilən 3 xal olduqca vacibdir və bu səbəbdən oyunçulara təbrik düşür. Onun sözlərinə görə, çox möhtəşəm stadionda, möhtəşəm azarkeşləri olan komandaya qarşı oynamaq xoş olub. Ancaq bunun mənəvi tərəfləri də var. Biz də bilirik ki, belə oyunlar nə qədər xoş təsir bağışlasa da bir o qədər ağırdır. Qurban Qurbanov hər zaman olduğu kimi, bu oyunun da nəticələri ilə kifayətlənmədi. O bildirmişdi ki, bu qələbə hələ heç nə demək deyil və qarşıda komandanı daha üç oyun gözləyir. İndi hər kəs Bakıda keçiriləcək cavab oyununa köklənib. Komandamızın rəqibə bu dəfə də layiqli cavabı verəcəyinə inamımız tamdır.

“Qarabağ” bu oyunda tarixdən dəm vuranlara tarix yazdı. Sübut etdi ki, bu “Qarabağ” tarixin ən güclü “Qarabağ”ıdır. “Qarabağ” Yunanıstanın ən titullu klublarından biri olan “Olimpiakos”a 3-0 hesabı ilə qalib gələrək, yunanları fəth etdi. Bu, azarkeşləri olduqca sevindirirdi. Bəlkə də ən çətin günümüzdə belə bizə sevinc və qələbə, qürur bəxş etdiyinə görə “Qarabağ” bu qədər sevilir. “Qarabağ” həm də bu gün tarixinin ən qızıl dövrünü yaşayır və istənilən komandaya onların aspektindən yanaşanda problem yaratmaq gücündədir. Odur ki, “Qarabağ”ın budəfəki qələbəsi də hər kəsi təsirləndirdi. Bu oyundan sonra azarkeşlər son anlara qədər, ermənipərəstlər isə görünür səhərə qədər yuxusuz qaldı.

Paylaş:

Baxılıb: 593 dəfə