Gələcəyin iqtisadçısı və yazarı: Ayşə Tapdıqzadə ilə müsahibə

Bakı:

10 °C

76 %

5 m/s

Əlaqə

AZ RU EN

Ana səhifə / Arxiv / Gələcəyin iqtisadçısı və yazarı: Ayşə Tapdıqzadə ilə müsahibə

Gələcəyin iqtisadçısı və yazarı: Ayşə Tapdıqzadə ilə müsahibə

07.04.2026 [13:06]

Gənc yaşına baxmayaraq həm akademik sahədə, həm də yaradıcılıqda diqqət çəkən uğurlara imza atan Ayşə Tapdıqzadə, İdrak Liseyinin şagirdidir. O, Milli İqtisadiyyat Olimpiadasında bürünc, gümüş və qızıl medallar qazanıb, həmçinin “Sabahın Alimləri” müsabiqəsində bürünc mükafata layiq görülüb. Eyni zamanda yazıya olan marağı və təşəbbüskarlığı ilə məktəbdə “Qəzet Klubu”nun əsasını qoyub. Bu müsahibədə Aysha öz uğur hekayəsini, düşüncə tərzini və gələcək planlarını bölüşür.

— Səncə, səni digər iştirakçılardan fərqləndirən əsas xüsusiyyət nədir?
— Düşünürəm ki, iki sahəyə — həm iqtisadiyyata, həm də kreativ yazıya olan marağım məni digər iştirakçılardan fərqləndirir. Bu iki istiqamətin vəhdəti mənə fərqli baxış bucağı qazandırır.

— Milli Olimpiadalarda qazandığın uğurlar düşüncə tərzini necə dəyişdi?
— Milli İqtisadiyyat Olimpiadasında üç ildir iştirak edirəm. İlk dəfə seçim və final mərhələləri Azərbaycan dilində keçirilirdi və mən təhsilimi ingilis dilində aldığım üçün çətinlik çəkirdim. Buna baxmayaraq medal qazana bildim. Bu isə özümə inamımı artırdı. Anladım ki, qarşıma məqsəd qoyduğum hər şeyi bacara bilərəm və hər il özümü daha da inkişaf etdirə bilərəm.

— Yazmağa marağın necə başladı? İlk məqalən nə haqqında idi?
— Məktəbdə debatları və arqumentativ esseləri həmişə sevmişəm. Lakin yazıya əsl sevgim poeziya ilə başladı. İlk məqaləm isə illər əvvəl təsis etdiyim məktəb qəzetində dərc olunmuşdu.

— Məqalələrin jurnallarda dərc olunanda nə hiss edirsən?
— Yazıya olan sevgimi başqaları ilə bölüşə bildikdə özümü çox xoşbəxt hiss edirəm.

— “Qəzet Klubu”nu yaratmaq ideyası necə yarandı və bu klub sənə nələri öyrətdi?
— Məktəbdə çoxlu maraqlı hadisələr baş verirdi və mən şagirdlərin bunları müzakirə edə biləcəyi bir platformanın olmasını istəyirdim. Bu ideya ilə məktəb, ölkə və dünya hadisələri haqqında yazmağa başladım və “Qəzet Klubu”nun təməlini qoydum. Klubun təsisçisi və prezidenti olmaq mənə komanda idarəçiliyi, üzvlərin güclü tərəflərini müəyyən etmək, tapşırıqları düzgün bölüşdürmək, fikir ayrılıqlarında qərar vermək və kommunikasiya bacarıqlarımı inkişaf etdirməyi öyrətdi.

— “Sabahın Alimləri” müsabiqəsində qazandığın bürünc mükafat sənin üçün nə ifadə edir?
— Bu müsabiqədə Bakı və regionlardan yüzlərlə şagird iştirak edir və innovativ layihələr təqdim olunur. Layihənin seçilməsi üçün onun praktik əhəmiyyəti və yeniliyi vacibdir. Finalda bürünc medal qazanmaq mənim üçün böyük motivasiya oldu və özümə inamımı daha da artırdı.

— Səncə, yaxşı yazını digərlərindən fərqləndirən nədir?
— Yaxşı yazıçı olmaq üçün müxtəlif janrlarda çox oxumaq, insanlarla ünsiyyətdə olmaq və həyat təcrübəsi qazanmaq vacibdir. Eyni zamanda emosiyaları düzgün çatdırmaq üçün təxəyyül gücündən istifadə etmək və daim öz üzərində işləmək lazımdır.

— Həm akademik uğuru, həm də yaradıcılığı tarazlamaq çətindirmi? Bunun öhdəsindən necə gəlirsən?
— Bəli, bəzən çətin olur. Amma işimi asanlaşdırmaq üçün günümü planlaşdırıram. Özüm üçün “to-do list” hazırlayıram. Yaradıcılıq isə mənim üçün bir növ istirahətdir.

— Gələcəkdə özünü daha çox hansı sahədə görürsən?
— Rəqəmsallaşma yeni peşələr yaradır. Mən özümü maliyyə, iqtisadiyyat və texnologiyanın kəsişməsində, həmçinin söz gücü ilə iqtisadi biliklərin birləşdiyi rəqəmsal marketinq sahəsində görürəm.

— Uğur qazanmaq istəyən tələbələrə ən vacib tövsiyən nə olardı?
— Başladığınız hər işə həvəslə yanaşın, vaxtınızı düzgün planlaşdırın və əzmlə çalışın. Uğur bu üç amilin nəticəsidir.

Paylaş:

Baxılıb: 97 dəfə