İşğaldan azad olunmuş hər qarış torpaq illərin nisgilinin, həsrətinin Zəfərlə tamamlandığı müqəddəs Vətən parçasıdır

Bakı:

24 °C

53 %

6 m/s

AZ RU EN

Ana səhifə / Arxiv / İşğaldan azad olunmuş hər qarış torpaq illərin nisgilinin, həsrətinin Zəfərlə tamamlandığı müqəddəs Vətən parçasıdır

İşğaldan azad olunmuş hər qarış torpaq illərin nisgilinin, həsrətinin Zəfərlə tamamlandığı müqəddəs Vətən parçasıdır

17.09.2026 [15:28]

Azərbaycanın müasir tarixinə həkk olunmuş zəfər salnaməsi təkcə hərbi yolla torpaqların azad edilməsi ilə bitmədi, həm də həmin ərazilərin tarixi, mədəni və mənəvi baxımdan milli yaddaşda yenidən dirçəldilməsi ilə nəticələndi. İşğaldan azad edilmiş ərazilər üzrə şəhər günlərinin təsis olunması bu böyük Qayıdışın, milli qürurun və tarixi ədalətin bərpasının rəmzidir. Artıq ikinci ildir ki, ölkə miqyasında Xankəndi, Xocalı, Xocavənd və Ağdərə şəhərlərinin günləri böyük coşqu və qürur hissi ilə qeyd edilir.

30 ilə yaxın davam edən işğal dövründə bu ərazilər erməni vandalizminə məruz qalmış, infrastrukturu dağıdılmış və tarixi adları təhrif olunmuşdu. 2020-ci ilin 44 günlük Vətən müharibəsi və 2023-cü ilin 19-20 sentyabr tarixlərində keçirilən lokal xarakterli antiterror tədbirləri nəticəsində Azərbaycanın bütün ərazilərində dövlət suverenliyi tam bərpa olundu.

Xankəndi, Xocalı, Xocavənd və Ağdərənin azad olunması ilə otuz illik nisgilə son qoyuldu. Bu şəhərlərin günlərinin qeyd edilməsi təkcə bir təqvim hadisəsi deyil, həm də Azərbaycan xalqının öz doğma torpaqlarına əbədi olaraq qayıtmasının təsdiqidir.

Qarabağın mərkəzi hesab olunan Xankəndi şəhərində Azərbaycan bayrağının ucaldılması suverenliyin tam təmin olunmasının zirvəsi oldu. 15 sentyabr tarixi həm də Bakının azad edilməsi gününə təsadüf etməklə rəmzi bir məna daşıyır. Bu gün Xankəndidə Qarabağ Universiteti fəaliyyətə başlayıb, sosial-iqtisadi həyat sürətlə bərpa olunur.

XX əsrin en dəhşətli faciələrindən birini yaşayan Xocalı bu gün yenidən doğulur. Şəhər gününün qeyd olunması Xocalı soyqırımı qurbanlarının xatirəsinə ehtiramla yanaşı, həm də bu şəhərin bərpa olunaraq yenidən həyat qazanmasının nümayişidir. Artıq Xocalıya yerli sakinlərin köçürülməsi həyata keçirilir.

Zəngin tarixi-arxeoloji abidələri və təbii gözəllikləri ilə seçilən Xocavənd rayonunun mərkəzi və kəndləri sürətli yenidənqurma mərhələsindədir. Şəhər günü regionun qədim alban və Azərbaycan irsinin qorunması baxımından xüsusi önəm kəsb edir.

Strateji mövqeyi və zəngin yeraltı-üstü sərvətləri ilə tanınan Ağdərə şəhərinin yenidən inzibati vahid kimi bərpa olunması və şəhər gününün qeyd edilməsi regionun iqtisadi potensialının reallaşdırılmasına böyük təkan verir.

Bu gün həmin şəhərlər böyük tikinti və quruculuq meydançasına çevrilib. "Böyük Qayıdışa dair Dövlət Proqramı" çərçivəsində müasir altyapı layihələri icra olunur, "Ağıllı şəhər" və "Ağıllı kənd" konsepsiyaları tətbiq edilir. Yollar, məktəblər, xəstəxanalar tikilir, mənzillər istifadəyə verilir.

Artıq ikinci ildir ki, həyata keçirilən bu bayram tədbirləri azad olunmuş torpaqlara təkcə binaların deyil, insan ruhunun, mədəniyyətin və gələcəyə olan inamın qayıtdığını göstərir. Xankəndi, Xocalı, Xocavənd və Ağdərə şəhərləri günü Azərbaycanın bölünməzliyinin, gücünün və sarsılmaz birliyinin canlı rəmzidir.

Sona Əsədova

Naxçıvan Dövlət Peşə Təhsil Mərkəzinin əməkdaşı, partiya fəalı

Paylaş:

Baxılıb: 248 dəfə