20 Sentyabr həm tarixi keçmişimizə ehtiram, həm də gələcəyə inam rəmzidir

Bakı:

23 °C

94 %

2 m/s

Əlaqə

AZ RU EN

Ana səhifə / Arxiv / 20 Sentyabr həm tarixi keçmişimizə ehtiram, həm də gələcəyə inam rəmzidir

20 Sentyabr həm tarixi keçmişimizə ehtiram, həm də gələcəyə inam rəmzidir

18.09.2026 [11:16]

Azərbaycan xalqının tarixində mühüm siyasi və tarixi əhəmiyyət daşıyan günlərdən biri də 20 Sentyabr – Dövlət Suverenliyi Günüdür. Bu əlamətdar gün Azərbaycanın ərazi bütövlüyünün və dövlət suverenliyinin tam bərpa olunması ilə bağlı tarixi hadisələrin rəmzi ifadəsidir. Dövlət suverenliyi hər bir xalqın öz taleyini sərbəst müəyyən etmək, ölkəsinin ərazisində dövlət hakimiyyətini tam şəkildə həyata keçirmək və milli maraqlarını qorumaq hüququnun əsas göstəricilərindən biridir.

Azərbaycanın müasir tarixində ərazi bütövlüyünün və suverenliyin təmin olunması uzun və mürəkkəb bir prosesdən keçmişdir. Ölkəmiz müstəqilliyini bərpa etdikdən sonra ərazilərinin bir hissəsinin işğal altında qalması ciddi siyasi, humanitar və sosial problemlərə səbəb olmuşdu. Uzun illər ərzində Azərbaycan dövləti beynəlxalq hüququn norma və prinsiplərinə əsaslanaraq öz ərazi bütövlüyünün bərpa olunması istiqamətində ardıcıl siyasət həyata keçirdi.

2020-ci ildə baş vermiş Vətən müharibəsi nəticəsində Azərbaycanın ərazi bütövlüyünün böyük hissəsi bərpa edildi. Sonrakı mərhələdə Qarabağ iqtisadi rayonunda separatçı qüvvələrin mövcudluğunun aradan qaldırılması və dövlət nəzarətinin tam təmin olunması istiqamətində mühüm addımlar atıldı. 19–20 sentyabr 2023-cü il tarixlərində həyata keçirilmiş lokal xarakterli antiterror tədbirlərindən sonra Azərbaycan öz suverenliyini bütün ərazisində tam təmin etdi. Məhz bu tarixi hadisənin əhəmiyyətini nəzərə alaraq 20 Sentyabr ölkəmizdə Dövlət Suverenliyi Günü kimi qeyd olunur.

Dövlət suverenliyinin tam bərpası Azərbaycan üçün yalnız hərbi və siyasi nəticə deyil, eyni zamanda milli dövlətçilik tarixində yeni mərhələnin başlanğıcıdır. Suverenliyin təmin olunması ölkənin bütün ərazisində Konstitusiyanın və qanunların qüvvəsinin bərqərar olmasına, dövlət idarəçiliyinin vahid şəkildə həyata keçirilməsinə və Azərbaycanın ərazi bütövlüyünün hüquqi-siyasi baxımdan möhkəmlənməsinə imkan yaradır.

Bu gün həm də Azərbaycan xalqının milli birliyinin, dövlətçilik iradəsinin və öz torpaqlarına bağlılığının ifadəsidir. Qarabağ və Şərqi Zəngəzurda həyata keçirilən genişmiqyaslı bərpa və quruculuq işləri, keçmiş məcburi köçkünlərin doğma yurdlarına qayıdışının təmin olunması dövlət suverenliyinin praktiki nəticələrinin mühüm istiqamətlərindən biridir. Yeni yaşayış məntəqələrinin salınması, infrastrukturun yenilənməsi, sosial obyektlərin yaradılması və iqtisadi fəaliyyətin genişləndirilməsi həmin ərazilərin davamlı inkişafına xidmət edir.

20 Sentyabr – Dövlət Suverenliyi Günü Azərbaycanın müstəqilliyinin və dövlətçiliyinin əhəmiyyətini bir daha xatırladan mühüm tarixdir. Bu gün ölkəmizin gələcək inkişafının, milli maraqlarının qorunmasının və dövlət suverenliyinin daha da möhkəmləndirilməsinin vacibliyini diqqətə çatdırır. Dövlət suverenliyi xalqın milli iradəsinin, dövlətin müstəqilliyinin və ölkənin gələcəyinə sahib çıxmaq əzminin əsas təməlidir.

Azərbaycan üçün 20 Sentyabr həm tarixi keçmişə ehtiram, həm də gələcəyə inam rəmzidir. Bu əlamətdar gün ölkəmizin ərazi bütövlüyü və suverenliyinin qorunmasının dövlət siyasətinin əsas prioritetlərindən biri olduğunu nümayiş etdirir.

Nazim Bünyatov

YAP Ağcabədi rayon təşkilatının sədr müavini

Paylaş:

Baxılıb: 117 dəfə