27 sentyabr – Qəhrəmanlıq tariximizin hüznlü və şərəfli səhifəsi

Bakı:

25 °C

65 %

3 m/s

Əlaqə

AZ RU EN

Ana səhifə / Arxiv / 27 sentyabr – Qəhrəmanlıq tariximizin hüznlü və şərəfli səhifəsi

27 sentyabr – Qəhrəmanlıq tariximizin hüznlü və şərəfli səhifəsi

24.09.2026 [15:18]

27 sentyabr Azərbaycan xalqının yaddaşında xüsusi və kövrək bir gün kimi yaşayır. Bu tarix Vətənimizin ərazi bütövlüyü uğrunda canından keçən şəhidlərimizin əziz xatirəsinin ehtiramla yad edildiyi Anım Günüdür. Hər il bu tarixdə xalqımız şəhidlərimizi böyük hörmət və minnətdarlıq hissi ilə anır, onların ömür yolunu və Vətən qarşısındakı xidmətlərini xatırlayır.

27 sentyabr 2020-ci ildə Azərbaycan Ordusunun həyata keçirdiyi əks-hücum əməliyyatları ilə başlayan 44 günlük müharibənin ilk günüdür. Həmin gün Azərbaycan əsgər və zabitləri Vətənin müdafiəsi üçün döyüşə atıldılar. Qarşıya qoyulan əsas məqsəd ölkəmizin ərazi bütövlüyünün bərpa olunması idi. Döyüşlər zamanı ordumuzun hərbçiləri böyük fədakarlıq və qəhrəmanlıq göstərdilər.

Bu mübarizə asan olmadı. 44 gün davam edən Vətən müharibəsində minlərlə hərbçimiz öz həyatını Vətən uğrunda fəda etdi. Onların arasında müxtəlif yaşda, fərqli peşə və ailələrdən olan insanlar var idi. Lakin onların hamısını tək bir amal birləşdirirdi – Vətən sevgisi və torpaqlarımızın müdafiəsi.

Şəhidlik Azərbaycan xalqının yaddaşında müqəddəs anlayışlardan biridir. Şəhidlərimiz öz həyatlarını xalqımızın gələcəyi naminə qurban verdilər. Onların qəhrəmanlığı yalnız döyüş meydanında göstərdikləri şücaətlə deyil, həm də Vətənə sonsuz bağlılıqları ilə ölçülür. Bu insanlar bizə Vətəni sevməyin, onu qorumağın və uğrunda fədakarlıq etməyin əsl nümunəsini göstərdilər.

27 sentyabr həm də şəhid ailələrinə olan dərin hörmətimizin ifadə edildiyi gündür. Şəhidlərimizin valideynləri, həyat yoldaşları, övladları və yakınları böyük bir kədər yaşasalar da, qəhrəman övladları ilə sonsuz fəxr edirlər. Şəhid ailələrinin çəkdiyi mənəvi yükü unutmaq olmaz. Onların yanında olmaq, göstərdikləri fədakarlığı daim uca tutmaq hər birimizin mənəvi borcudur.

Vətən müharibəsində Azərbaycan xalqının həmrəyliyi də özünü aydın şəkildə göstərdi. Cəbhədə əsgərlərimiz döyüşdüyü zaman, arxa cəbhədə insanlar bir-birinə dəstək olur, ordumuza mənəvi yardım göstərirdilər. Azərbaycan xalqı həmin günlərdə sarsılmaz birlik və nümayiş etdirdi. Bu birlik xalqımızın ən böyük güclərindən biri kimi tarixə düşdü.

Bu gün biz şəhidlərimizi yalnız kədərlə deyil, həm də böyük qürur hissi ilə yad edirik. Çünki onların həyat yolu Vətənə sədaqətin bariz nümunəsidir. Şəhidlərimizin adları küçələrdə, məktəblərdə, abidələrdə və ən əsası, xalqımızın qəlbində yaşamaqdadır. Onların xatirəsini yaşatmaq gələcək nəsillərin üzərinə düşən mühüm vəzifələrdən biridir.

Gənc nəsil 27 sentyabrın mahiyyətini dərk etməli, şəhidlərimizin keçdiyi şərəfli yolu öyrənməli və onların xatirəsinə layiq vətəndaş kimi yetişməlidir. Vətən sevgisi yalnız sözlə ifadə olunmur. Vətənə faydalı olmaq, yaxşı təhsil almaq, öz işini vicdanla yerinə yetirmək, dövlətə və cəmiyyətə məsuliyyətlə yanaşmaq da Vətənə xidmətin formalarıdır.

Bu gün şəhidlərimizin aziz ruhu qarşısında baş əyirik. Onların hər biri Azərbaycanın tarixində silinməz iz qoyub. Biz onların adlarını unutmayacaq, xatirələrini daim yaşadacağıq. Çünki insan həyatdan getsə də, onun Vətən üçün gördüyü böyük işlər və xalq üçün göstərdiyi fədakarlıq əbədi qalır.

27 Sentyabr – Anım Günü bizə həm keçmişi xatırladır, həm də gələcəyə inamla baxmağa çağırır. Bu günün əsas mesajı birlik, həmrəylik və Vətənə sədaqətdir. Şəhidlərimizin bizə əmanət etdiyi ən böyük dəyər də məhz Vətən sevgisidir.

Qoy şəhidlərimizin əziz xatirəsi daim uca tutulsun! Qoy onların adları gələcək nəsillərin yaddaşında əbədi yaşasın! Biz bu torpağın hər qarışının qədrini bilməli və Vətənimizin inkişafı üçün əlimizdən gələni etməliyik.

Əziz şəhidlərimiz, siz bu xalqın yaddaşında əbədi yaşayacaqsınız. Sizin fədakarlığınız, cəsarətiniz və Vətən sevginiz heç vaxt unudulmayacaq!

Sevda Həsənli

YAP Şahbuz rayon təşkilatının fəal üzvü

Paylaş:

Baxılıb: 128 dəfə