Media: Türk Dövlətləri Təşkilatı güc mərkəzinə çevrilib

Bakı:

9 °C

87 %

7 m/s

Əlaqə

AZ RU EN

Ana səhifə / Dünya / Media: Türk Dövlətləri Təşkilatı güc mərkəzinə çevrilib

Media: Türk Dövlətləri Təşkilatı güc mərkəzinə çevrilib

03.11.2024 [15:49]

Türk Dövlətləri Təşkilatının (TDT) Bişkekdə keçirilən XI zirvə toplantısı Türk dünyası ilə əlaqələri dərinləşdirmək, türkdilli dövlətlərin maraqlarına və dəyərlərinin təbliğinə töhfə vermək məqsədi daşıyır. Azərbaycan Prezidenti İlham Əliyevin Türk dünyasının birliyinə və qlobal səhnədə güc mərkəzinə çevrilməsinə çağırış etdiyi TDT liderlərinin Şuşada keçirilən qeyri-rəsmi sammitində bu istiqamətdə siqnal verilib.

AZƏRTAC xəbər verir ki, bu barədə Türkiyənin “Sabah” qəzetində dərc olunmuş “Qırğızıstanda TDT zirvə görüşü: gündəm nədir?” sərlövhəli məqalədə deyilir.

Mehmet Yücenin nəşrində Azərbaycan liderinin Şuşadakı çıxışından sitat gətirilir: “Biz böyük bir coğrafi ərazini əhatə edirik, üzv ölkələrdə müsbət demoqrafik dinamika müşahidə olunur, hərbi potensialımız döyüş meydanlarında özünü dəfələrlə sübut edib. Zəngin təbii sərvətlər, onların çatdırılması üçün müasir infrastruktur, Orta Asiya və Qafqazı Aralıq dənizi və Qara dəniz limanları ilə birləşdirən nəqliyyat dəhlizləri, zəngin və qədim tarix və mədəniyyət bizim ən böyük sərvətimizdir. Xalqlarımızın ənənəvi dəyərlərə və etnik birliyə sadiqliyi ölkələrimizi sıx birləşdirir. XXI əsr Türk dünyasının firavanlıq əsrinə çevrilməlidir”.

Məqalə müəllifi əmin olduğunu bildirib ki, Bişkekdə keçiriləcək zirvə görüşünün iştirakçıları beynəlxalq razılaşmalara, dövlətlərin suverenliyinə və ərazi bütövlüyünə, tanınmış sərhədlərin toxunulmazlığına, daxili işlərə müdaxilənin yolverilməzliyinə sadiqliyini bəyan edəcəklər. “Bu kontekstdə Azərbaycan və Ermənistan arasında sülhün təmin edilməsi və münasibətlərin normallaşdırılması səylərinin dəstəklənməsinin bildirilməsi gözlənilir. Trans-Xəzər Beynəlxalq Nəqliyyat Marşrutunun inkişafı, Orta Nəqliyyat Dəhlizinin potensialından maksimum istifadə və Zəngəzur dəhlizinin açılması kimi məsələlər ətrafında da müzakirələr gözlənilir”, - “TDT-nin yüksələn güc mərkəzinə çevrildiyi” vurğulanan nəşrdə deyilir.

“Azərbaycan Prezidenti İlham Əliyevin bildirdiyi kimi, TDT-nin potensialını açmaq və bu platformanı qlobal miqyasda güc mərkəzinə çevirmək məsuliyyəti məhz Türk dövlətlərinin üzərinə düşür. Bu məqsəd mütləq reallaşacaq”, - deyə məqalə müəllifi qeyd edir.

M.Yüce əmin olduğunu bildirib ki, Bişkekdə “mehriban və səmimi bəyanatlar diplomatik şəkildə davam etdirilən mərasimlər və rəmzi jestlərin yerini tutacaq”.

"Qırğızıstanda keçiriləcək Zirvə görüşü, şübhəsiz ki, TDT-nin mövqelərini gücləndirəcək", - deyə Türkiyə nəşrində vurğulanır.

Paylaş:

Baxılıb: 453 dəfə