Bağırsaq sağlamlığı və meditasiya arasındakı əlaqə tədqiq edilib

Bakı:

13 °C

88 %

6 m/s

Əlaqə

AZ RU EN

Ana səhifə / Dünya / Bağırsaq sağlamlığı və meditasiya arasındakı əlaqə tədqiq edilib - ARAŞDIRMA

Bağırsaq sağlamlığı və meditasiya arasındakı əlaqə tədqiq edilib - ARAŞDIRMA

11.11.2024 [13:46]

Bağırsaq sağlamlığı və meditasiya arasındakı əlaqə tədqiq edilib.

AZƏRTAC xarici mediaya istinadla xəbər verir ki, aparılan tədqiqatlardan birində 64 iştirakçı olub. Onların qatıldığı bu tədqiqat, meditasiya proqramının iltihab əleyhinə xüsusiyyətləri olan bəzi maddələrin səviyyəsini artırdığını və ateroskleroz riski ilə əlaqəli maddələrin azaldığını göstərib. 288 nəfərlik başqa bir tədqiqat isə vegan pəhrizlə birlikdə meditasiyanın bağırsaq bakteriyalarının tarazlığını müsbət təsirləndirdiyini aşkarlayıb. Bundan əlavə, Tibet rahiblərinin bağırsaq mikrobiomları üzərində aparılan bir tədqiqat da meditasiya ilə bağırsaq sağlamlığı arasındakı əlaqəni dəstəkləyib. Rahiblərin bağırsaqlarında narahatlıq və ürək-damar xəstəlikləri riskini azalda biləcək müəyyən bakteriyalar tapılıb.

Tibbdə önəmli olan bağırsaq sağlamlığı son illərdə qidalanmada diqqət mərkəzindədir. Tədqiqatlar, sağlam bağırsağın psixi sağlamlıqdan tutmuş ümumi rifaha qədər bir çox aspektdə əhəmiyyətli rol oynadığını göstərir. Məhz bu səbəbdən bağırsaq sağlamlığını dəstəkləyən probiotik qidalar və əlavələr getdikcə daha çox populyarlaşır. Bağırsaq və beynin ikitərəfli əlaqəsi artıq geniş qəbul olunur. Bağırsaq-beyin oxu adlanan bu biokimyəvi siqnal yolu, beyindəki mərkəzi sinir sistemi və bağırsaqda yerləşən bağırsaq sinir sistemi arasında əlaqə yaradır. Bağırsaq mikrobiomu, yəni orada yaşayan trilyonlarla mikroorqanizm, psixi və fiziki sağlamlığı dəstəkləyən serotonin və GABA kimi neyroaktiv maddələr ifraz edir. Zəif bağırsaq sağlamlığı müxtəlif xəstəliklər, o cümlədən depressiya və narahatlıq kimi psixi sağlamlıq problemləri ilə əlaqələndirilir. Bağırsağın “bədənin ikinci beyni” kimi işləməsi fikri, beyinə və əhval-ruhiyyəyə olan təsirinin nə qədər əhəmiyyətli olduğunu vurğulayır.

Meditasiya praktikaları, xüsusilə də zehinlilik meditasiya, stressin azalmasına və ümumi rifaha kömək edir. Meditasiya stresslə bağlı dəyişiklikləri modulyasiya edərək bağırsaq hərəkətliliyini, maneə funksiyasını və mikrobiomu müsbət təsirləndirir. Stressin, bağırsaqda iltihab və disfunksiya yaradan əsas faktor olduğu nəzərə alınaraq, meditasiya bağırsaq sağlamlığı üçün təsirli bir vasitə kimi görünür.

Meditasiya, xroniki stressin beyin-bağırsaq oxuna mənfi təsirini azalda və bağırsaq sağlamlığını yaxşılaşdıra bilər. Yoqa və koqnitiv-davranış terapiyası kimi zehinlilik təcrübələri, stressi azaltmaqla bərabər, bağırsaqla bağlı problemlərin qarşısını almağa da kömək edir. Sağlam bir bağırsağın qorunması üçün stress idarəetməsi vacibdir və meditasiya bu yolda perspektivli bir vasitə olaraq qəbul edilir. Zehinlilik praktikasının gündəlik həyata daxil edilməsi sağlam bağırsağın qorunması və dəstəklənməsi üçün təsirli bir addım ola bilər.

Paylaş:

Baxılıb: 455 dəfə