Cənubi Koreya tarixində ilk dəfə...

Bakı:

11 °C

62 %

5 m/s

Əlaqə

AZ RU EN

Ana səhifə / Dünya / Cənubi Koreya tarixində ilk dəfə...

Cənubi Koreya tarixində ilk dəfə...

16.01.2025 [09:56]

Yun Sok Yol CIO tərəfindən ikinci cəhddə uzun əməliyyat nəticəsində tutulub

Fəaliyyətdə olan prezident həbs edildi

Cənubi Koreya tarixində ilk dəfə müvəqqəti olaraq vəzifəsindən kənarlaşdırılmış, lakin fəaliyyətdə olan prezident həbs edilib. Ölkənin “Yonhap” agentliyinin yaydığı məlumata görə, fəaliyyətdə olan, lakin vəzifəsindən kənarlaşdırılmış Yun Sok Yol qiyam ittihamı ilə tutulub. Dövlət başçısı Koreyanın Yüksək Vəzifəli Şəxslərin Korrupsiyasının Araşdırılması İdarəsinə (CIO) gətirilib. İkin məlumatda bildirilib ki, idarə Yun Sok Yolu qiyama rəhbərlik etməkdə ittiham edir.

Xatırladaq ki, Koreya prezidentinin həbsinə artıq bir neçə gün idi ki, hazırlıq gedirdi. Ölkənin polis orqanları və CIO, eləcə də Prezidentin Təhlükəsizlik Xidmətinin nümayəndələri dövlət başçısının həbsinə dair orderi müzakirə etmək üçün bir araya gəlmişdilər. Verilən məlumata görə, həbsə minə qədər müstəntiq cəlb edilib.

Prezident mühafizəçilərinin müqaviməti...

Qeyd edək ki, Koreyada baş verən hadisələr əsasən ötən ilin son ayından vüsət almağa başladı. Prezdient Yun Sok Yol müxalifəti qiyama yönələn fəaliyyətdə günahlandıraraq dekabrın 3-də gecə saatlarında ölkədə fövqəladə hərbi vəziyyət rejimi elan etdi. Dekabrın 3-dən 4-nə keçən gecə məsələ parlamentdə səsverməyə çıxarıldı və prezidentdən hərbi vəziyyətin ləğv olunmasını tələb edən qətnamə qəbul olundu. Nəticədə dövlət başçısı təxminən 6 saat davam edən hərbi vəziyyət rejimini ləğv etmək məcburiyyətində qaldı. Dekabrın 14-də isə Koreya Respublikasının parlamenti Prezident Yun Sok Yola impiçment elan etdi. sonrakı günlərdə isə ordunun və təhlükəsizlik qüvvələrinin bir sıra yüksəkrütbəli zabitləri hərbi vəziyyətlə bağlı cinayət işi çərçivəsində saxlanılıb. Məhkəmə Yun Sok Yol haqqında da həbs qərarı çıxarsa da, həbsi reallaşdırmaq mümkün olmayıb - yanvarın 3-də sabiq dövlət başçısının saxlanılması üçün order alan müstəntiqlər prezident mühafizəçilərinin müqaviməti səbəbindən həbsi həyata keçirə bilməmişdilər.

Dindirməni CIO aparır

Yanvarın 15-də isə prezidentin şəxsi mühafizəçilərinin müqavimətinə baxmayaraq, devrilmiş prezident Yun Sok Yol öz iqamətgahında həbs edilib. Prezident həbs olunduqdan sonra “qanunun aliliyinin tamamilə çökdüyünü” deyib. Polisin məlumatına görə, Yun Sok Yolun həbsi ilə bağlı son bir neçə həftədə oturduğu qərargaha 3000-dən çox polis məmuru göndərilib. Cənubi Koreya prezidentinin vəkilləri bildiriblər ki, Yun Sok Yol CIO müstəntiqləri tərəfindən dindirilir. Prezident qarşıdurmanın yaşanmaması üçün dindirmədə iştirak etməyə razılaşıb. Eyni zamanda, prezident ona qarşı aparılan istintaqı qanunsuz adlandırıb. “Yonhap” xəbər verir ki, ölkənin ən böyük müxalifət qüvvəsi olan Toburo Demokratik Partiyası prezidentin həbsini demokratiyanın və qanunun aliliyinin bərpasına doğru ilk addım adlandırıb.

Prezident səlahiyyətləri ikinci dəfə təhvil verildi...

Qeyd edək ki, Prezidentin vəzifəsindən uzaqlaşdırılmasından sonra onun səlahiyyətləri ilk olaraq Baş nazir Han Deok Su tərəfindən icra olunub. Lakin dekabrın 27-də Cənubi Koreya parlamenti onun da hakimiyyətdən uzaqlaşdırılmasına səs verib. Prezident səlahiyyətlərinin icrası baş nazirin birinci müavini, iqtisadiyyat və maliyyə naziri Çoi Sanq Moka həvalə edilib. Yeni icraçı isə bildirib ki, onun siyasətinin əsas prioriteti sabitliyin bərpası olacaq.

Həbs 20 günə qədər uzadıla bilər...

Koreya qanunlarına görə, CIO-nun məhkəmə qərarı tələb etmək üçün 48 saatı var - bu tələb qiyama cəhd ittihamı ilə həbsi həyata keçirmək üçün lazımdır. CIO-dan bildirilib ki, həbsin icrası uzun müddət tələb edib. Dövlət başçısı müstəntiqlər prezident kompleksinə gəldikdən təxminən beş saat sonra və onlar iqamətgaha daxil ola bildikdən üç saat sonra saxlanılıb. Dindirildikdən sonra onun Seul yaxınlığındakı Uivanqdakı təcridxanaya köçürüləcəyi gözlənilir.

Proses onu göstərir ki, Yun Sok Yol hələ bir müddət həbsdə qalacaq. Belə ki, o, rəsmən həbs olunarsa, müstəntiqlər ittiham irəli sürmək üçün işi prokurorlara təhvil verməzdən əvvəl onun həbs müddətini 20 günə qədər uzada biləcəklər.

INTERFAX-ın yaydığı məlumatda isə bildirilib ki, CIO əməkdaşları həbsdə olan prezidenti ilkin mərhələdə 2 saat yarım dindiriblər. Lakin o, ifadə verməkdən imtina edib, Agentliyin məlumatına görə, Yun Sok Yolun etirazına əsasən sorğu-sual zamanı video çəkiliş aparılmayıb.

P.İSMAYILOV

Paylaş:

Baxılıb: 441 dəfə