Qərbin “polis demokratiyası”...

Bakı:

27 °C

47 %

4 m/s

Əlaqə

AZ RU EN

Ana səhifə / Dünya / Qərbin “polis demokratiyası”...

Qərbin “polis demokratiyası”...

13.06.2013 [01:00]

Londonda şiddətli polis-vətəndaş qarşıdurması qeydə alınıb
Avropanın bir çox ölkəsində başlanan sosial etiraz dalğaları daha da kəskinləşməkdədir. Müxtəlif ziddiyyətlərlə müşayiət olunan etiraz dalğaları çərçivəsində asayiş qoruyucuları ilə vətəndaşlar arasında kəskin qarşıdurmalar baş verməkdə və ciddi tələfatlar qeydə alınmaqdadır. Bu kontekstdə son olaraq Böyük Britaniyanın paytaxtı London şəhərində baş verən konftantasiyada ciddi polis zorakılığı müşahidə edilib və dinc etirazçıların bir qismi müxtəlif xarakterli xəsarətlər alıblar. Sosial etirazın əsasını təşkil edən motiv isə nümayişçilərin hökumətdən və ölkələrində fəaliyyət göstərən transmilli şirkətlərdən narazılığı təşkil edir.
Məlum olduğu kimi, iyun ayının 17-18-də Şimali İrlandiyada G-8-in toplantısı keçiriləcək. Dünyanın ən güclü iqtisadiyyatına malik olan ölkələrin toplantısı bir sıra ölkələrdə sosial qruplar tərəfindən heç də birmənalı qarşılanmır. O ölkələrdə daha çox etirazlar müşahidə edilir ki, orada vətəndaşlar hökumətdən və mövcud iqtisadi sistemdən, həyata keçirilən iqtisadi siyasətdən narazıdırlar. Məhz bu gün Böyük Britaniyada da G-8-in növbəti toplantısı bir qrup yerli əhali tərəfindən narazılıqla qarşılanır və bu narazılıq özünü nümayiş, etiraz dalğaları formasında büruzə verir. Bu kontekstdə son olaraq Londonun mərkəzi meydanında “G-8-ə stop!” şüarı ilə keçirilən etiraz aksiyası mövcud iqtisadi sistemə və siyasətə qarşı kəskin fikirlərin səsləndirilməsi ilə müşayiət olunub. Asayiş qoruyucuları nümayişçilərə sərt müdaxilə edib və 32 nəfər saxlanılıb.
Qeyd etmək lazımdır ki, polis zorakılığı öz növbəsində bir sıra gerçəkliklərdən xəbər verib. Məhz bu hal ona dəlalət edir ki, hər hansı bir ölkədə qanunlara müvafiq olaraq ictimai asayişin qorunması istiqamətində görülən tədbirləri, eyni zamanda, qanunamüvafiq halları ciddi tənqid və qınaq obyektinə çevirən Avropanın özündə insan hüquqları kobud surətdə pozulur, dini-etnik və ictimai zəmində diskriminasiya hallarının sayı durmadan artır. Bəhs olunan ölkədə polis zorakılığı ilə müşayiət olunan dağıdıcı proseslər cəmiyyətin hər bir təbəqəsinin nümayəndələrinə sirayət etməkdədir.
Beləliklə, bütün bu olaylar bütövlükdə Avropanın imicinə zərbə kimi çıxış edir. Dolayısıyla buradan belə bir nəticə çıxarmaq olur ki, beynəlxalq miqyasda “demokratiya”, “insan hüquqlarının müdafiəsi” pərdəsi arxasında çıxış edən bəzi Qərb ölkələri müxtəlif dövlətlərə qarşı təzyiq mexanizmindən istifadə edirlər. Məhz bu cür fəaliyyətin əsasında duran strateji məqsəd isə ideoloji təzyiq və təsir vasitəsilə konkret hədəflərin yerinə yetirilməsidir. Bu isə ona dəlalət edir ki, konkret geostrateji maraqlar kontekstində çıxış edən bu cür ölkələr nəinki beynəlxalq hüquq normalarını ayaqlar altına atır, eləcə də, milli dövlətlərin beynəlxalq müstəvidəki fəaliyyətinə kobudcasına müdaxilə edir.
NURLAN

Paylaş:

Baxılıb: 1789 dəfə