Türkiyə Prezidenti ticarət müharibələrinin mümkün nəticələrindən danışıb

Bakı:

16 °C

94 %

1 m/s

Əlaqə

AZ RU EN

Ana səhifə / Dünya / Türkiyə Prezidenti ticarət müharibələrinin mümkün nəticələrindən danışıb

Türkiyə Prezidenti ticarət müharibələrinin mümkün nəticələrindən danışıb

09.04.2025 [23:45]

Türkiyə Prezidenti Rəcəb Tayyib Ərdoğan son bir həftədə dünyada baş verən ticarət müharibələrinin mümkün nəticələrini sadalayıb.

AZƏRTAC xəbər verir ki, Ankarada hakim Ədalət və İnkişaf Partiyasının parlament fraksiyasının iclasında çıxış edən Türkiyə dövlətinin başçısı ticarətdə məhdudiyyətlər və rüsumların tətbiqinin dünya ticarətinin həcminin azalmasına səbəb ola biləcəyini qeyd edib.

“Qlobal mal təchizatı zəncirlərində problemlər yarana bilər ki, bu da ölkələrə inflyasiya təzyiqini artıracaq. Bazarlarda artan qeyri-müəyyənlik etibarın itməsinə bağlıdır. Xammal qiymətlərində də dalğavari dəyişikliklər baş verə bilər”, - deyən dövlət başçısı əsas qlobal iqtisadiyyatlarda tənəzzül ssenarisini istisna etməyib.

Onun fikrincə, ticarət müharibələri qlobal nəticələrə gətirib çıxaracaq. “Nəhəng qasırğanın proqnozlaşdırılması mübaliğə olmayacaq, onun nəticələri hər yerdə hiss olunacaq”, - deyə siyasi xadim bildirib.

Türkiyə Prezidenti iş adamlarını və ümumilikdə vətəndaşları ölkənin gələcəyi üçün narahat olmamağa çağırıb. “Türkiyə hökuməti güclü iqtisadi proqram həyata keçirir. Unutmamalıyıq ki, Türkiyə ixracatının 62 faizi Ankaranın azad ticarət müqaviləsi bağladığı ölkələrə təsadüf edir”, - deyə Ərdoğan qeyd edib.

Prezident vurğulayıb ki, Türkiyə güclü sənaye bazasına və inkişaf etmiş xidmət sektoruna malikdir. “Bu məsələdə ölkəmiz ÜDM-in oxşar səviyyəsinə malik digər ölkələrdən müsbət şəkildə fərqlənir”, - deyə siyasi xadim bildirib.

Eyni zamanda, o deyib ki, Türkiyə həm region, həm də bütün dünya ictimaiyyətini əhatə edən böyük dəyişikliklərin tam mərkəzində yerləşir. “Soyuq müharibə nəticələrinə görə formalaşmış münasibətlər sisteminin təməli məhv edilir. Neoliberal iqtisadi və siyasi yanaşmalar proteksionizmlə əvəz olunur. Asiya, Avropa, Amerika və bütövlükdə dünyada ölkələr diqqəti öz iqtisadiyyatlarının və cəmiyyətlərinin möhkəmləndirilməsi siyasətlərinə yönəldirlər. Qlobal siyasi münasibətlərin demək olar ki, bütün iştirakçıları yeni yanaşmalar axtarışındadır”, - deyə o qeyd edib.

Prezident vurğulayıb ki, Türkiyə “dünyanı bürümüş ağrılı proseslərin nəticələrini ən yaxşı görən və tənzimləyən” dövlətlər sırasındadır. “Ankaranın mövqeyi həm danışıqlar masasında, həm də yerində güclüdür. Türkiyə siyasəti xarici qüvvələr tərəfindən manipulyasiya edilən ölkələr kateqoriyasından çıxıb”, - deyə o vurğulayıb.

Dövlət başçısının sözlərinə görə, əgər əvvəllər Türkiyə “müxtəlif səbəblərdən qlobal rəqabətin kənarında qalırdısa, indiki mərhələdə Ankara yeni qlobal proseslərin əsas aktorlarından biridir”.

“Müasir Türkiyə güclü, hörmətli və uğurlu dövlətdir. Ankaranın iştirakı olmadan hər hansı “tənliyin” uğur şansı yoxdur, bunu xaricdə etiraf etmək məcburiyyətindədirlər”, - deyə o əlavə edib.

Paylaş:

Baxılıb: 391 dəfə