Səmərqənddə qlobal ekoloji problemlər müzakirə olunur

Bakı:

12 °C

76 %

7 m/s

Əlaqə

AZ RU EN

Ana səhifə / Dünya / Səmərqənddə qlobal ekoloji problemlər müzakirə olunur

Səmərqənddə qlobal ekoloji problemlər müzakirə olunur

24.11.2025 [16:11]

Səmərqənd Beynəlxalq Turizm Mərkəzində nəsli kəsilməkdə olan vəhşi fauna və flora növləri ilə beynəlxalq ticarət haqqında Konvensiyanın Tərəflərinin Konfransının (CITES CoP20) 20-ci sessiyasının açılış mərasimi keçirilib.

AZƏRTAC rəsmi “UzA” agentliyinə istinadla xəbər verir ki, Özbəkistan 1997-ci ildən CITES-in üzvüdür və Konvensiyanın əlavələrində sadalanan bir neçə növə, o cümlədən qar bəbirinə, sayqa antilopuna və nadir dərman bitkilərinə malikdir. Buna görə də CITES CoP20 konfransının Səmərqənddə keçirilməsi təsadüfi deyil. Sessiyada və onun tədbirlərində iştirak etmək üçün 185 ölkədən təxminən 3000 iştirakçı Özbəkistanın qədim şəhərinə axın edib.

CITES CoP20 konfransının açılış mərasimində Özbəkistan Respublikası Prezidentinin müşaviri və Ekologiya və İqlim Dəyişikliyi üzrə Milli Komitənin sədri Əziz Abduhakimov və CITES-in baş katibi İvonn İqera beynəlxalq forum və onun gözlənilən nəticələri barədə çıxış ediblər.

Abduhakimov bildirib ki, 2025-ci ilin Özbəkistanda “Ətraf Mühitin Mühafizəsi və Yaşıl İqtisadiyyat İli” elan edilməsi Yeni Özbəkistanın strateji məqsədinin aydın ifadəsi, ətraf mühitin davamlılığının təmin edilməsi və resurslara qənaət edən iqtisadi artıma əsaslanan yaşıl inkişaf modelinə keçid iradəsinin təzahürüdür.

“Bioloji irs”, “Yaşıl məkan”, “Ekomədəniyyət”, “Təmiz hava” və “Tullantısız zona” milli layihələrinin həyata keçirilməsi Özbəkistan Ekologiya Komitəsi üçün prioritetə çevrilib. Son illərdə Özbəkistanda həyata keçirilən ekoloji islahatlar nəticəsində 14 yeni xüsusi mühafizə olunan təbiət ərazisi yaradılıb və onların sahəsi 4%-dən 14,2%-ə və ya 6,3 milyon hektara çatdırılıb. Yüz səkkiz növ vəhşi heyvan və bitki CITES siyahılarına daxil edilib və mühafizə altına alınıb. Qırmızı Kitaba daxil edilmiş vəhşi təbiət nümunələrinə dəyən ziyana görə kompensasiya on dəfə, bitkilərə dəyən ziyana görə təzminat beş dəfə, qanunsuz ağac kəsilməsinə görə cərimələr beş dəfə artırılıb”, - deyə Prezidentin müşaviri qeyd edib.

CITES 1973-cü ildə qəbul edilmiş və 1975-ci ildə qüvvəyə minmiş, nəsli kəsilməkdə olan heyvan və bitki növlərinin beynəlxalq ticarətini tənzimləmək və nəzarət etmək üçün yaradılmış beynəlxalq mexanizmdir. Onun əsas məqsədi təbii sərvətlərin istismarını məhdudlaşdırmaqla növlərin məhv olmasının qarşısını almaqdır. Konvensiya, həmçinin nəsli kəsilməkdə olan növlərlə ticarətin məhdudlaşdırılmasını və ya tamamilə qadağan edilməsini, ticarətin təbii populyasiyalara zərər verməyən səviyyəyə qədər nəzarət edilməsini və üzv dövlətlər arasında əməkdaşlıq mexanizmlərinin yaradılmasını nəzərdə tutur.

Paylaş:

Baxılıb: 215 dəfə