Ermənistan vətəndaş müharibəsinin bir addımlığındadır

Bakı:

32 °C

43 %

3 m/s

Əlaqə

AZ RU EN

Ana səhifə / Dünya / Ermənistan vətəndaş müharibəsinin bir addımlığındadır

Ermənistan vətəndaş müharibəsinin bir addımlığındadır

17.02.2015 [12:31]

Müxalifət partiyaları fevralın 20-də Sarkisyan hakimiyyətinə qarşı genişmiqyaslı mitinq keçirməyə hazırlaşır
Qonşularına qarşı işğalçı siyasət yürütməklə Cənubi Qafqaz regionunun ümumi inkişaf trayektoriyasından kənarda qalan, özünü bütün qlobal miqyaslı enerji layihələrindən təcrid edən Ermənistan olduqca ağır günlərini yaşayır. Belə ki, istər siyasi, istərsə də iqtisadi cəhətdən məhv olmanın astanasında dayanan, bütün gücünü, dayaqlarını itirən, siyasi gərginliyin pik həddə çatdığı işğalçı ölkədə bütün sahələr iflic durumuna düşüb. Bütün bunların fonunda ölkə əhalisinin miqrasiyası da get-gedə artan sürətlə davam edir və Sarkisyan hakimiyyəti bunun qarşısını almaqda aciz görünür. Digər tərəfdən, işğalçı ölkədə baş verən siyasi böhran, iqtisadi tənəzzül, o cümlədən, ordudakı özbaşınalıq, intihar və cinayətkarlıq miqrasiyanın gələcək dövrlərdə daha da artacağına işarə edir.
Qeyd edək ki, Ermənistan KİV-i, o cümlədən, erməni lobbisinin vəsaiti hesabına xaricdə nəşr olunan erməniyönümlü mətbuat da işğalçı ölkəni tərk edən vətəndaşların sayının ildən-ilə artdığını etiraf etmək məcburiyyətində qalıb. Məsələn, Ermənistan Dövlət Statistika İdarəsinin rəsmi məlumatına istinad edən erməni KİV-nin verdiyi xəbərə görə, təkcə 2014-cü ildə 47 min erməninin xarici ölkələrə miqrasiya edib. Miqrasiya hallarının 2013-cü illə müqayisədə 12 faiz artdığı və bunun Ermənistan üçün əsl faciə olduğu, Serj Sarkisyanın hakimiyyətdə olduğu 7 il ərzində 330 min erməninin ölkəni tərk etdiyi diqqətə çatdırılıb. Nəzərə alsaq ki, bu rəqəmləri açıqlayan qurum Ermənistanın dövlət strukturudur və bu mənada həmin göstəricilər azaldılıb, demək ki, hər il Ermənistandan ayrılan insanların sayı daha çoxdur. Bununla yanaşı, qeyd olunan açıqlamada Ermənistanı tərk edən əhalinin 22 mininin ölkə vətəndaşlığından imtina etdiyi də göstərilir.
Kütləvi miqrasiyanın arxasında dayanan səbəblərin arasında iqtisadi çətinliklər ön planda dayansa da, ölkənin ictimai-siyasi sabitsizliyi, siyasi böhran da burada əsas şərtlərdən biri sayılır. Belə ki, son dövrlərdə hərbi xuntanın rəhbəri Serj Sarkisyanın ölkə müxalifətinə qarşı tutduğu mövqe Ermənistandakı vəziyyəti daha da gərginləşdirib. Məlumatlara görə, Sarkisyanın müxalif “Çiçəklənən Ermənistan” partiyasının sədri Qaqik Tsarukyanın Milli Təhlükəsizlik Şurasında üzvlüyünün ləğv olunması haqqında fərmanı yenidən qarşıdurmalara yol açıb. Ermənistan prezidenti öz fərmanını Tsarukyanın şuranın iclaslarında iştirak etməməsi ilə əsaslandırmağa çalışsa da, onun bu addımı atmasının arxasında müxalifət liderinin ötən həftə ictimai qüvvələrin konfransında hakimiyyəti kəskin tənqid atəşinə tutmasının dayanması hər kəsə bəllidir. Bu isə iki partiyanın bir-birilə açıq düşmənçiliyə başlamasına təkan verib.
Digər müxalifət partiyalarının rəhbərləri də bu qarşıdurmanın daha böyük gərginliyə səbəb olacağını, ölkədə vətəndaş qarşıdurmasına gətirib çıxaracağını proqnozlaşdırırlar. Məsələn, “Milli Özünütəyinetmə” Birliyinin lideri Paruyr Ayrikyan da “Çiçəklənən Ermənistan” və Respublika partiyalarının liderlərinin ölkəni qütbləşdirərək iki yerə böldükləri fikrindədir.
Bu arada siyasi böhranın yaxın zamanlarda daha da dərinləşəcəyi ilə bağlı xəbərlər artıq erməni mətbuatında geniş yer almağa başlayıb. Hətta işğalçı ölkədə yaxın günlərdə həbs dalğası və cinayət təqiblərinin başlanması belə gözlənilir. Bildirilir ki, prezident Serj Sarkisyanla müxalifət arasında mübarizə artıq siyasi müstəvidə deyil, bir-birlərini ölümlə hədələməklə aparılır. “168 jam” qəzetinin yazdığına görə, Ermənistanda qanlı savaş başlayıb və əhali yaxın vaxtlarda sui-qəsdlərin, həmçinin, həbs dalğalarının şahidi olacaqlar. Belə ki, Sarkisyanın Tsarukyana qarşı addımlar atmasının ardından baş nazir Ovik Abramyanın göstərişi ilə Tsarukyanın vergidən yayınması ilə bağlı araşdırma aparılır.
Buna cavab olaraq Tsarukyan tərəfdarlarını küçələrə çıxmağa və Sarkisyanın istefasını tələb etməyə çağırıb. Yerli mətbuatın yazdığına görə, “Çiçəklənən Ermənistan” fraksiyasından olan deputatlar öz mandatlarından imtina etmək niyyətlərindədirlər. Ekspertlər proqnozlaşdırırlar ki, digər müxalifət partiyalarının deputatları da onların yolu ilə gedəcəklər. Təbii ki, bu cür demarş erməni parlamentinin işinə mənfi təsir göstərəcək.
Ermənistanın tanınmış politoloq Levon Şirinyan xüsusi çağırılmış mətbuat konfransında bildirib ki, bu hakimiyyətlə vidalaşmağın vaxtı məhz indi çatıb. Onun sözlərinə görə, ölkəyə siyasi və iqtisadi dəyişikliklər lazımdır. Bununla yanaşı, parlamentin üç müxalifət partiyası fevralın 20-də Yerevanda genişmiqyaslı mitinq keçirilməsi barədə qərar qəbul edib.
P.SADAYOĞLU

Paylaş:

Baxılıb: 1314 dəfə