Hörst Köller yenidən dövlət başçısı seçildi...

Bakı:

24 °C

59 %

2 m/s

Əlaqə

AZ RU EN

Ana səhifə / Dünya / Hörst Köller yenidən dövlət başçısı seçildi...

Hörst Köller yenidən dövlət başçısı seçildi...

27.05.2009 [09:51]

Almaniyanı isə daha bir seçki sınağı gözləyir
ötən həftə Almaniya Federativ Respublikası üçün iki mühüm tədbirin - növbəti prezident seçkisinin və ölkə Konstitusiyasının 60 illik yubileyinin keçirilməsi ilə əlamətdar oldu. Qeyd edək ki, Almaniya tarixində ən demokratik və mütərəqqi əsas qanun hesab edilən Konstitusiya 1949-cu ildə qüvvəyə mindikdən sonra məhz həmin ilin sentyabrında Qərb müttəfiqlərinin (ABŞ, İngiltərə və Fransanın) nəzarət etdikləri 3 zonanın birləşməsi nəticəsində müasir Federativ Respublika yarandı. 60 il öncə qəbul edilmiş Konstitusiyaya əsasən, parlamentli respublika olan Almaniyada səlahiyyətlərinə görə yalnız dövlət başçısı funksiyasını həyata keçirən prezident ümumxalq səsverməsi yolu ilə deyil, iki palatadan - bundestaq və bundesratdan ibarət parlamentin deputatları tərəfindən beş il müddətinə seçilir. ötən həftə keçirilən prezident seçkilərində təkrar qalib gələn hazırkı prezident Hörst Köller növbəti beş il ərzində dövlət başçısı səlahiyyətlərini həyata keçirmək hüququnu qazanıb.
Qeyd edək ki, H.Köller əsasən federal məclisin hər iki palatasında müəyyən səs çoxluğuna malik sağ qüvvələrin - Xristian-Demokratik İttifaqı və Xristian-Sosial İttifaqı (XDİ-XSİ) fraksiyasının, eləcə də, azlıq təşkil edən və mərkəzçi mövqedə duran azad demokratların dəstəyi sayəsində özünün sosial-demokrat rəqibinə qalib gəlib. Beləliklə, sağ qüvvələr növbəti dəfə solların prezident kreslosuna sahib olmaq şansını heçə endiriblər (son 60 il ərzində siyasi institutlar sistemində mühüm əhəmiyyət kəsb edən bu posta əksərən sağ qüvvələr nəzarət ediblər). Ancaq əsas qüvvələr arasında siyasi mübarizə bununla bitmir. Belə ki, yaxın gələcəkdə ölkənin siyasi həyatını daha ciddi seçki sınağı gözləyir. ölkənin aparıcı siyasi qüvvələri payızda keçiriləcək növbəti parlament seçkilərinə hazırlaşırlar. Əsas siyasi mübarizənin sağ mərkəzçi XDN-XSN bloku ilə sosial-demokratlar və onlara dəstək verən “yaşıllar”, həmçinin digər sol qüvvələr arasında gedəcəyi gözlənilir. Bu qüvvələr arasında gedən siyasi mübarizə Almaniyanın siyasi həyatı üçün artıq ənənəvi hal alıb.
Onu da deyək ki, dörd il öncə, 2005-ci ilin oktyabrında keçirilmiş növbədənkənar parlament seçkilərində indiki kansler Angela Merkelin rəhbərlik etdiyi XDN və onun blok üzrə daimi ortağı XSN cüzi səs üstünlüyü ilə qalib gəlsələr də, bu vəziyyət onlara təkbaşına hökumət formalaşdırmaq imkanı vermədi. Elə bu səbəbdən də, sağlar sosial-demokratlarla ortaq məxrəcə gələrək koalision hökumət formalaşdırmağa məcbur oldular. ölkənin siyasi həyatında mühüm rol oynayan bu iki siyasi qüvvənin “böyük koalisiya” adı altında tarixdə ikinci dəfə bu əsasda yaratdıqları indiki hökumət (birinci dəfə belə bir koalisiya 1966-69-cu illərdə mövcud olub) bütün çətinliklərə baxmayaraq uğurla fəaliyyət göstərib. Hazırkı hökumətdə vitse-kansler və xarici işlər naziri postunu tutan Frank Valter Ştayn-Mayerin nüfuzlu bir xadim kimi sosial-demokratlar tərəfindən gələcək parlament seçkilərində kansler vəzifəsinə namizədliyi artıq irəli sürülüb. Kansler postu uğrunda əsas mübarizənin də məhz onunla A.Merkel arasında gedəcəyi gözlənilir. Sosial-demokratlar bu seçkilərdə qalib gəlmək üçün qərarlı olduqlarını bəyan edirlər və bu məqsədlə seçkilərə ciddi şəkildə hazırlaşırlar. Bir sözlə, payızda keçiriləcək seçkilərdə bütün qarşıduran tərəfləri ciddi siyasi imtahan gözləyir.
Elxan RZAYEV

Paylaş:

Baxılıb: 1500 dəfə