Paşinyan boş büdcəni doldurmaqda acizdir

Bakı:

14 °C

82 %

7 m/s

Əlaqə

AZ RU EN

Ana səhifə / Dünya / Paşinyan boş büdcəni doldurmaqda acizdir

Paşinyan boş büdcəni doldurmaqda acizdir

03.08.2018 [09:03]

Yeni hökumətin yarıtmaz fəaliyyəti işğalçı ölkənin əhalisinə heç də yaxşı güzəran vəd etmir
İşğalçı Ermənistanda gərginlik davam edir. Brüsseldən əliboş qayıdan baş nazir Nikol Paşinyan isə işğalçı-kriminal rejimdən ona qalan iqtisadi cəhətdən zəif Ermənistanı ayağa qaldırmaq üçün heç bir konkret plan və ya proqram irəli sürə bilmir. Əksinə, iqtisadiyyatının böyük bir hissəsinin nəzarətində olduğu Rusiya ilə münasibətlərin gərginləşməsinə səbəb olan addımlar atır. Avqustun 17-də baş nazir seçilməsinin 100 gününü İrəvanda mitinqlə qeyd etməyə hazırlaşan N.Paşinyanın kütlənin qarşısında bu sahədə hansı uğurlardan danışacağı isə sual doğurur.
N.Paşinyanın vaxtaşırı eyham vurduğu, həbsə atdığı korrupsioner keçmiş məmurlardan qanunsuz yolla əldə etdikləri pulların və əmlakların müsadirəsi hesabına iqtisadiyyatı inkişaf etdirmək üsulu isə özlüyündə qeyri-ciddi təsir bağışlayır. Ümumiyyətlə, yeni baş naziri təkcə Ermənistanda deyil, xaricdə də ciddi qəbul etmirlər. Bu yaxınlarda N.Paşinyanın “Exo Moskvı” radiostansiyasının baş redaktoruna müsahibəsi zamanı ona verilən suallar da bunu bir daha təsdiq edib. Belə ki, müsahibə zamanı onu “niyə oğlunu Zimbabveyə səfir göndərmirsən” sualı ilə açıq şəkildə lağa qoyması, həmçinin baş redaktor A.Venediktovun qeyri-ciddi suallarına cavabları N.Paşinyanın yalnız küçədə populist çıxışlar etməyə və qışqırmağa qadir olduğunu göstərir. Rusiyadan olan prankerlərin Paşinyanın adından bir neçə dəfə Avropa qurumlarındakı yüksəkvəzifəli şəxslərə zəng etməsi də onun ciddi olmayan imici ilə bağlıdır. Onların son zarafatı isə lap yerinə düşüb. Belə ki, Avropa Komissiyasının rəhbəri Jan-Klod Yunkerə zəng edən rusiyalı gənclər Respublika meydanında mitinq təşkil etmək və kabab çəkmək üçün Nikolun adından onu İrəvana dəvət ediblər. Avrokomissiyanın rəhbəri də bu zarafatı ciddi qarşılayıb, hətta təklifi qəbul edib.
Bu məqamda qeyd edək ki, son 3 ayda yeni hökumətin Ermənistana xarici investisiya cəlb etmək vədlərinin yerinə yetirilməsi mümkün olmayıb. Baş nazirin müavini Ararat Mirzoyan da avqustun 2-də hökumətin növbəti iclasından sonra jurnalistlərin xarici sərmayənin cəlb edilməsi yönündə sualı qarşısında acizlik göstərib. Çünki 3 ay ərzində N.Paşinyanın rəhbərliyi altında dəfələrlə kabinetin iclası keçirilsə də, sosial-iqtisadi vəziyyətin yaxşılaşdırılması yönündə elə bir ciddi tədbirlər görülməyib. Ən maraqlısı isə odur ki, Nazirlər kabinetinin növbəti iclasına hər dəfə 20-dən çox məsələ çıxarılsa da, onlardan bir-ikisi müzakirə olunur. Bu iclasların bir çoxunda isə sosial-iqtisadi inkişafla bağlı deyil, yerli icra hakimiyyətləri və regionların inkişafı üçün ayrılan vəsaitlərin dəfələrlə azaldılması barədə qərarlar qəbul edilir.
Digər tərəfdən, cari ilin aprel ayı ərzində davam edən etiraz aksiyaları və vətəndaş itaətsizliyi nəticəsində idarə və müəssisələrdə, o cümlədən istehsal sahələrində işlərin dayanması onsuz da zəif olan respublika iqtisadiyyatına ciddi zərər vurub. Ermənistanın bəzi rəsmi qurumlarının son statistik məlumatları da göstərir ki, yarısı N.Paşinyanın rəhbərlik etdiyi kabinetin fəaliyyət dövrünə düşən son 7 ayda iqtisadiyyatda heç bir irəliləyiş olmayıb, əhalinin sosial-iqtisadi durumu yaxşılaşmayıb, əksinə, əksəriyyəti xarici şirkətlərin nəzarətində olan istehsal müəssisələrinin fəaliyyəti zəifləyib, bəziləri bağlanıb, işğalçı ölkənin əhalisinin xaricə köçməsi prosesi əvvəlki sürətlə davam edib. Belə ki, son statistik məlumata görə, son 1 il ərzində 10 min 100 nəfər erməni xaricə köçüb.
Hazırda müzakirə olunan 2019-cu ilin dövlət büdcəsinin vəziyyəti isə göstərir ki, Ermənistan iqtisadiyyatının tənəzzülü gələn il də davam edəcək. Belə ki, Ermənistanın maliyyə naziri A.Cancuqazyan jurnalistlərə açıqlamasında deyib ki, gələn il üçün büdcə layihəsində maaş və pensiyaların artımı nəzərdə tutulmayıb. Bu, o deməkdir ki, N.Paşinyanın apardığı siyasət onun həm Rusiyadan, həm də Avropadan yardım almaq şansını heçə endirir. Bu azmış kimi, Rusiya tərəfi gələn il üçün Ermənistana qazın güzəştli qiymətə satılmayacağını açıq şəkildə bəyan edib.
Bütün bunlar sübut edir ki, heç bir zəngin təbii ehtiyata malik olmayan Ermənistanda iqtisadiyyatın tənəzzüldən xilası qonşularla normal münasibət yaratmasından bilavasitə asılıdır. Buna görə də Ermənistan ilk növbədə işğalçılıq siyasətinə son qoymalıdır.
Qaşqay ZİYƏDDİNOĞLU

Paylaş:

Baxılıb: 1235 dəfə