Robert Koçaryan ətrafında qalmaqal onun gələcəkdə baş nazir olmaq şansını artırır

Bakı:

27 °C

69 %

5 m/s

Əlaqə

AZ RU EN

Ana səhifə / Dünya / Robert Koçaryan ətrafında qalmaqal onun gələcəkdə baş nazir olmaq şansını artırır

Robert Koçaryan ətrafında qalmaqal onun gələcəkdə baş nazir olmaq şansını artırır

10.08.2018 [08:43]

Ekspertlərin qənaətinə görə, Paşinyan güzəştə getsə, süni parlament böhranı ilə onu hakimiyyətdən kənarlaşdıra bilərlər
Dağlıq Qarabağda separatçıların lideri kimi siyasi meydana atılan cinayətkar Robert Koçaryanın qanunvericiliyə əsasən parlament üzvlərinə verilən səlahiyyətlə zaminliyə götürülməsi üçün Ermənistan Baş Prokurorluğuna ünvanlanan vəsatətin rədd edilməsinə baxmayaraq, Dağlıq Qarabağdakı separatçıların qondarma deputatları da daxil olmaqla müəyyən qüvvələr cinayətkara sahib çıxmaqda davam edirlər.
Qeyd edək ki, R.Koçaryana Dağlıq Qarabağdan dəstək gəlməsi müxtəlif müzakirələrin yaranmasına gətirib çıxarıb. Belə ki, separatçıların başçısı olan Bako Saakyanın yeni baş nazir Nikol Paşinyana sədaqətini nümayiş etdirməsinə baxmayaraq, belə bir addıma imkan verməsi bəzi şübhələrin yaranmasına səbəb olub. Yerli mətbuatın yazdığına görə, bu, əslində, N.Paşinyana arxadan zərbədir. Çünki B.Saakyan elə bir sistem yaradıb ki, onun icazəsi olmadan nəinki hansısa müraciətin ünvanlanması, hətta İrəvana hansısa məktubun yollanması mümkün deyil. Sual olunur ki, bəs N.Paşinyan niyə B.Saakyanın, əslində, ona qarşı çevrilmiş bu addımını cəzasız qoyur? Burada bir çox səbəb axtarmaq olar, amma ən əsası N.Paşinyanın oğlunun Dağlıq Qarabağda olmasıdır. Yəni dolayısı yolla N.Paşinyanın oğlu B.Saakyanın girovuna çevrilib. Hətta onun və müdafiə naziri David Tonoyanın oğlu üçün Xankəndidə ev kirayələndiyi də iddia edilir.
Bununla yanaşı, R.Koçaryanın müdafiəsinin arxasında böyük planların dayandığı barədə də iddialar geniş yayılmaqdadır. Bəzi dairələrdə Ermənistanda gündəmi işğal edən R.Koçaryanın həbsinin mövcud sistemi dağıtmaq üçün yetərli olmadığı qənaəti hakimdir. Belə ki, Koçaryan həbsdə olsa da, illərdir başqa dövlətin işğal edilmiş torpaqlarında, Ermənistanın özündə cinayət, korrupsiya və digər yollarla əldə edilən milyonlar kənardadır. Lazım gələndə həmin milyonlardan sistemin saxlanması naminə istifadə ediləcəyi də mümkündür. Konkret olaraq dünənə qədər bu rejimin hesabına yaşayanları əks-inqilabçı kimi təşviq etmək və təşkilatlandırmaq üçün həmin milyonların xərclənəcəyi iddiaları da var.
Bütün bu hadisələrin fonunda erməni mətbuatı R.Koçaryan həbs olunsa da, kriminal avtoritetlər kimi hansısa dairələrdə müəyyən səbəblərdən nüfuzunun qaldığını yazır. Həmin təhlillərə görə, həbsxanada belə R.Koçaryan “qan və qisas”, “despotizm və terror”un simvolu olmaqda davam edir, habelə indiki və keçmiş vəzifəli şəxslərin davranışlarına təsir etmək imkanına malikdir. Bu vəziyyəti inqilab yolu ilə hakimiyyətə gələnlər üçün ciddi siqnal hesab edən müşahidəçilər eks-prezidentin təsir resurslarının 46 deputatla məhdudlaşmayacağına, hətta bu rəqəmin parlament çoxluğu həddinə yaxınlaşacağına şübhə etmirlər. Əvvəllər qeyd etdiyimiz kimi, nə qədər ki, yenidən parlament seçkiləri keçirilməyib, bu təhlükə mövcud olacaq və gələn ilin yazına qədər növbədənkənar seçkilər keçirmək istəyən Nikol Paşinyan üçün sürpriz - parlament böhranı yaratmaqla R.Koçaryanın baş nazir seçilmək ehtimalı da gündəmə gələ bilər. Yəni heç kim zəmanət verə bilməz ki, gələn ilin yazında 46 yox, 53 deputat R.Koçaryana dəstək çıxmayacaq və N.Paşinyanın istefasından sonra baş nazir vəzifəsinə namizədliyi irəli sürülməyəcək. Çünki Ermənistan cəmiyyətinin inqilabi eyforiya rejimində hələ nə qədər yaşayacağını proqnozlaşdırmaq çətindir. Buna görə də yeni hakimiyyətin mövqeyindən çıxış edən ekspertlər keçmiş işğalçı-cinayətkar rejimin qidalandığı sistemin tam şəkildə aradan qaldırılması və “əks-inqilabçı”ların növbədənkənar seçkiləri pozmaq və parlament böhranı yaratmaq yolu ilə revanşının qarşısının alınması üçün N.Paşinyanı seçkilər barədə ciddi düşünməyə çağırırlar.
Beləliklə, süni parlament böhranı yaradılması ehtimalı barədə siqnalların nəzərə alınması, devrilən rejimin revanş riskinin azaldılması ilə Koçaryanın manevr imkanlarını məhdudlaşdırmaq üçün yeni hökumət parlament seçkilərini mümkün qədər tez keçirməlidir. Əks halda hazırda ikihakimiyyətlilik, hətta üçhakimiyyətlilik mənzərəsi müşahidə edilən Ermənistanda vəziyyətin nəzarətdən kənara çıxması ehtimalları özünü doğrulda bilər.
Qaşqay ZİYƏDDİNOĞLU

Paylaş:

Baxılıb: 1553 dəfə