Paşinyanın parlamentdəki çıxışı daxili vəziyyəti daha da gərginləşdirib

Bakı:

22 °C

57 %

1 m/s

Əlaqə

AZ RU EN

Ana səhifə / Dünya / Paşinyanın parlamentdəki çıxışı daxili vəziyyəti daha da gərginləşdirib

Paşinyanın parlamentdəki çıxışı daxili vəziyyəti daha da gərginləşdirib

17.04.2021 [08:48]

Məlum olduğu kimi, məğlub Ermənistanda siyasi böhran davam etməkdədir. Ermənistan mediası yazır ki, baş nazir Nikol Paşınyanın parlamentdəki sonuncu “Hökumət saatı”ndakı çıxışı qarşıdurmanı daha da dərinləşdirib. Belə ki, Paşinyanın parlamentin kürsüsündən Azərbaycan qarşısında ağır məğlubiyyətə görə əvvəlki hakimiyyətləri günahlandırması, hətta eks-prezident L.Ter-Petrosyana istinad etməsi ideoloji baxımdan bir-birinə yaxın olan iki siyasi qüvvənin arasında qarşılıqlı ittihamların səsləndirilməsinə gətirib çıxarıb.

Qeyd edək ki, eks-prezidentlərin özləri və sözçüləri Paşinyana kəskin reaksiya veriblər. Ölkədə belə bir mənzərə yaranıb ki, bütün siyasi qüvvələr məğlubiyyətin günahkarını axtarır, tərəflər məsuliyyəti bir-birinin üstünə atır, hətta bir-birini satqınlıqda da ittiham edirlər.

Yeri gəlmişkən, əsasən, sabiqlərə qarşı ittihamlar irəli sürən N.Paşinyan parlamentdəki deputatlara da xəbərdarlıq etməkdən çəkinməyib. Onun parlamentdəki xəbərdarlığı siyasi kuluarlarda geniş müzakirələrə səbəb olub. Məsələn, deputat Taquhi Tovmasyan baş nazirin “Mənim addımım” fraksiyasını tərk edən Qor Gevorkyana göstərdiyi münasibəti şərh edərkən, bildirib ki, bu, ilk növbədə, hakim blokdan olan deputatlara xəbərdarlıqdır: “Onun aqressiyası və suala cavab verməkdən imtinası daha çox “Mənim addımım” fraksiyasına ünvanlanmışdı. Fikrimcə, baş nazir bununla deputatları oxşar addımlardan çəkindirmək istəyir”.

Bununla belə, baş nazirin parlamentin kürsüsündən sensasiyalı bəyanatları rəqibləri tərəfindən seçkiqabağı kampaniyaya start kimi də dəyərləndirilir. “News.am” yazır ki, “Maariflənən Ermənistan” partiyasının sədri Edmon Marukyan baş nazirin parlamentdəki sonuncu çıxışına toxunaraq deyib ki, “Aprelin sonunda istefa verəndən sonra Paşinyan ölkənin baş naziri kimi bir saatlıq çıxış üçün bir daha belə imkan əldə edə bilməyəcək. Onun bu çıxışı, seçkiqabağı kampaniyanın başlanğıcı xarakteri daşıyırdı”.

Yeri gəlmişkən, “Hraparak” qəzeti yazır ki, həmin gün Paşinyan sərxoş halda parlamentə gəlib, hətta komanda üzvləri də şəxsi söhbətlərində bunu inkar etməyiblər. Qəzet yazır ki, baş nazirin qeyri-adekvat, ziddiyyətli açıqlama və davranışlarından da onun içkili olduğu aydın görünürdü: “Paşinyan yalnız əvvəlki hakimiyyətlərin nümayəndələrini hədəfə almayıb, həm də özünə qarşı çevrilə biləcək ziddiyyətli açıqlamalar verib”.

Göründüyü kimi, məğlub ölkədə daxili siyasi vəziyyət gərgin olaraq qalır. Sonuncu “Hökumət saatı”nda Paşinyanın sərt çıxışı, eyni zamanda, bütün siyasi qüvvələrin məğlubiyyətin əsas günahkarını axtarması, məsuliyyəti bir-birinin boynuna atması isə vəziyyəti bir qədər də gərginləşdirib.

Qaşqay ZİYƏDDİNOĞLU

Paylaş:

Baxılıb: 892 dəfə