Bakı ümid yeridir

Bakı:

26 °C

50 %

10 m/s

Əlaqə

AZ RU EN

Ana səhifə / Gündəm / Bakı ümid yeridir

Bakı ümid yeridir

23.08.2024 [09:50]

Hər zaman beynəlxalq hüquq və ədalət prinsipindən çıxış edən Azərbaycan dünya miqyasında kolonializmə qarşı mübarizənin mərkəzinə çevrilib. Fransanın və bəzi digər dövlətlərin ağır müstəmləkəçilik siyasətindən əziyyət çəkən xalqlar Bakıya ümid yeri kimi baxırlar. Bunun təsdiqi olaraq qeyd edək ki, avqustun 22-də “Boneyra adasının Bakıdan keçən BMT Baş Assambleyasındakı öz müqəddəratını təyinetmə yolu” mövzusunda beynəlxalq konfrans işə başlayıb. Bakı Təşəbbüs Qrupu (BTQ) və Boneyra İnsan Hüquqları və Dəyişiklik naminə Hərəkatının birgə təşkilatçılığı ilə baş tutan tədbir Niderlandın müstəmləkəçiliyi altında olan Boneyra adasına həsr edilib.

Konfransa kolonializmə qarşı mübarizə aparan və azad olmağa çalışan Boneyra xalqının təmsilçiləri, habelə Beliz, Sent-Vinsent və Qrenadin, Surinam, Sent Lüsiya, Böyük Britaniya, Meksika, Niderland və başqa ölkələrin nümayəndələri, BMT və digər beynəlxalq təşkilatların rəsmiləri, hüquq müdafiəçiləri, qeyri-hökumət təşkilatlarının rəhbərləri, dekolonizasiya üzrə ekspertlər və tədqiqatçılar qatılıblar.

Bildirildiyi kimi, Niderlandın əsarəti altında olan Boneyra xalqını narahat edən məsələlər çoxdur. O cümlədən Boneyra xalqının müstəmləkəçilikdən azad olmaq uğrunda apardığı mübarizə, habelə problemin aidiyyatı beynəlxalq təşkilatların gündəliyinə çıxarılması istiqamətində görülən işlər, beynəlxalq hüquqi imkanlar barədə müzakirələrin aparılmasına ciddi ehtiyac var.

Konfransın təşkilində məqsəd Boneyra adasının BMT-nin dekolonizasiya edilməli olan ərazilər siyahısına yenidən salınması üçün bir sıra dövlətlər tərəfindən BMT Baş Assambleyasına təqdim edəcəyi qətnamə layihəsi ilə bağlı beynəlxalq ictimaiyyətin dəstəyinin əldə edilməsidir.

Qeyd edək ki, Bakı Təşəbbüs Qrupu Azərbaycanın sədrlik etdiyi Qoşulmama Hərəkatının Əlaqələndirmə Bürosunun nazirlər toplantısı çərçivəsində 2023-cü il iyulun 6-da Bakıda “Müstəmləkəçiliyin tamamilə aradan qaldırılmasına doğru” adlı konfransın iştirakçıları tərəfindən yaradılıb. Qrup XXI əsrdə dünyanın müxtəlif bölgələrində hələ də müstəmləkəçilikdən əziyyət çəkən xalqların azadlıq uğrunda apardıqları mübarizəyə dəstək verir.

“Bizim missiyamız üçün vacib olan amil insanların öz müqəddəratını təyin etmək, mədəni kimliyini qorumaq və etik inkişaf hüquqlarıdır. Lakin bu hüquqlar ayrılıqda tam həyata keçirilə bilməz. Biz səsimizi gücləndirmək, eyni zamanda, ədalətin, sadəcə, ideal deyil, hamı üçün reallıq olmasını təmin etmək üçün qlobal ictimaiyyətin dəstəyinə və anlayışına inanırıq”. Bu fikirləri Boneyra İnsan Hüquqları Təşkilatının prezidenti Davika Bissessar söyləyib. Fikirlərinə davam edən Davika Bissessar vurğulayıb: “Bu gün biz bütün dünyaya çox vacib bir mesaj veririk ki, kiçik icmaların hüquqları da mədəniyyətimizi və irsimizi qoruyub saxlayan böyük xalqların hüquqları qədər həyati əhəmiyyət kəsb edir”.

Tədbirdə iştirak etmək üçün paytaxtımıza təşrif gətirən qonaqlar kolonializmə qarşı apardıqları mübarizədə onlara göstərilən davamlı dəstəyə görə ölkəmizə, o cümlədən də Bakı Təşəbbüs Qprupuna minnətdarlıqlarını ifadə edirlər. “Bakı Təşəbbüs Qrupu müstəmləkəçilikdən əziyyət çəkən ölkələr üçün çox mühüm platforma yaradır və buna görə təşəkkür edirik. Düşünürəm ki, biz və müstəmləkəçilikdən əziyyət çəkən digər xalqlar bunu dünyanın diqqətinə çatdırmalıdırlar”, - deyə Niderlandın müstəmləkəçiliyi altında olan Belizin nümayəndə heyətinin üzvü, Belizin BMT-də daimi və səlahiyyətli səfiri Karlos Füller jurnalistlərə müsahibəsində söyləyib.

MÜBARİZ

Paylaş:

Baxılıb: 687 dəfə