Gənclər və İdman Nazirliyinin kollektivi Fəxri xiyabanda Ulu Öndər Heydər Əliyevin məzarını ziyarət edib

Bakı:

11 °C

82 %

8 m/s

AZ RU EN

Ana səhifə / İdman / Gənclər və İdman Nazirliyinin kollektivi Fəxri xiyabanda Ulu Öndər Heydər Əliyevin məzarını ziyarət edib

Gənclər və İdman Nazirliyinin kollektivi Fəxri xiyabanda Ulu Öndər Heydər Əliyevin məzarını ziyarət edib

27.07.2019 [01:49]

İyulun 26-da Azərbaycan Respublikasının Gənclər və İdman Nazirliyinin yaradılmasının 25 illiyi tamam olur. Xalqımızın Ulu Öndəri Heydər Əliyevin 1994-cü ilin iyulun 26-da imzaladığı Fərmanla Gənclər, İdman və Turizm Nazirliyi yaradılıb. 2006-cı ildə isə Azərbaycan Prezidenti İlham Əliyevin Fərmanı ilə Gənclər və İdman Nazirliyi yenidən təşkil olunub və gənclər siyasətinin əsas icra orqanının qarşısında yeni vəzifələr müəyyənləşdirilib.
AZƏRTAC xəbər verir ki, bu münasibətlə nazirliyin rəhbərliyi və məsul əməkdaşları iyulun 26-da Fəxri xiyabana gələrək xalqımızın Ümummilli Lideri, müasir müstəqil Azərbaycan dövlətinin memarı və qurucusu Heydər Əliyevin xatirəsini ehtiramla yad edib, məzarı önünə əklil və gül dəstələri qoyublar.
Görkəmli oftalmoloq-alim, akademik Zərifə xanım Əliyevanın da xatirəsi ehtiramla anılıb, məzarı üzərinə tər çiçəklər düzülüb.
Gənclər və İdman naziri Azad Rəhimov əlamətdar günlə bağlı jurnalistlərə müsahibəsində bildirib: “Bu gün Gənclər və İdman Nazirliyinin yubiley günüdür. İyirmi beş il əvvəl iyulun 26-da Ulu Öndər Heydər Əliyevin Fərmanı ilə müasir müstəqil Azərbaycanın tarixində ilk dəfə bilavasitə gənclərlə işləyən, gənclər siyasətini tənzimləyən dövlət qurumu yaradıldı və qarşıya böyük vəzifələr qoyuldu. Bu səbəbdən iyulun 26-sı ölkəmizdə gənclər və idman sahəsində çalışan bütün şəxslər üçün əlamətdar gündür. Nazirlik fəaliyyətə başladığı 25 il ərzində mühüm işlər görüb. Əsas vəzifə Azərbaycan dövlətində gənc nəsli tərbiyə etmək, vətənpərvər gənclik formalaşdırmaq, onların ölkəmizin ictimai-siyasi həyatında, beynəlxalq münasibətlər sistemində fəal iştirakına şərait yaratmaq idi. Ötən 25 il ərzində bu vəzifələrin yerinə yetirilməsi istiqamətində minlərlə layihə, tədbir həyata keçirilib. Bu gün Azərbaycan gəncliyi həm ölkə daxilində, həm də beynəlxalq aləmdə elm, təhsil, mədəniyyət, idman və digər sahələrdə yüksək səviyyədə təmsil olunur, Azərbaycan həqiqətləri dünya ictimaiyyətinin diqqətinə çatdırılır”.
Azad Rəhimov deyib: “Nazirliyin yaradılması bariz nümunədir ki, ölkədə həyata keçirilən dövlət siyasətinin prioritet istiqamətlərindən biri məhz gənclərlə iş və idman siyasətidir. Bu gün Azərbaycan Prezidenti İlham Əliyevin rəhbərliyi ilə həyata keçirilən siyasətdə də bu ənənə davam etdirilir. Hazırda ölkəmizdə 300-dən artıq qeyri-hökumət gənclər təşkilatı fəaliyyət göstərir. Azərbaycanda gənclər siyasəti modeli BMT tərəfindən qəbul olunub və bir nümunə kimi digər ölkələrə örnək göstərilir. Azərbaycan ötən 25 ildə irimiqyaslı yarışlara ev sahibliyi edib. Həm də bu yarışlarda və olimpiadalarda idmançılarımız çoxlu sayda medallar qazanıblar. Qarşıda yeni vəzifələr durur. Ölkəmizdə Azərbaycan gənclərinin inkişaf strategiyası, Dövlət proqramları qəbul edilir. Gənclərimizin müxtəlif sahələrdə öz potensiallarını nümayiş etdirmələri üçün maksimum şərait yaradılıb”.
Bu günlərdə Bakıda keçirilən XV Avropa Gənclər Yay Olimpiya Festivalı haqqında məlumat verən nazir vurğulayıb: “Həmişəki kimi, biz bu mötəbər idman yarışında da atletlərimizdən çoxlu sayda medal gözləyirik. Festivalın sonuna iki gün qalmasına baxmayaraq, biz medal sayına görə ikinci yerdəyik. Çox istərdik ki, komandamız ilk beşlikdə yer alsın”.

Paylaş:

Baxılıb: 1342 dəfə