Azərbaycan Milli Paralimpiya Komitəsi 2019-cu ilə yekun vurub

Bakı:

20 °C

64 %

3 m/s

Əlaqə

AZ RU EN

Ana səhifə / İdman / Azərbaycan Milli Paralimpiya Komitəsi 2019-cu ilə yekun vurub

Azərbaycan Milli Paralimpiya Komitəsi 2019-cu ilə yekun vurub

29.12.2019 [09:55]

Dekabrın 28-də Azərbaycan Milli Paralimpiya Komitəsinin (AMPK) 2019-cu ildəki fəaliyyətinin yekunları müzakirə edilib.
AZƏRTAC xəbər verir ki, AMPK-nın prezidenti İlqar Rəhimov cari ilin komitə üçün uğurlu olduğunu diqqətə çatdırıb.
AMPK-nın baş katibi Kamal Məmmədov bildirib ki, bu il paralimpiyaçılarımız beynəlxalq yarışlarda 17-si qızıl, 23-ü gümüş və 25-i bürünc olmaqla ümumilikdə 65 medal qazanıblar.
Komitənin idman şöbəsinin müdiri Rauf Mürsəlov 2019-cu il ərzində əldə edilən idman uğurları və “Tokio 2020” XVI Yay Paralimpiya Oyunlarına hazırlıq planları haqqında söz açıb. Vurğulayıb ki, paralimpiyaçılarımız indiyədək “Tokio 2020”yə 7 lisenziya qazanıblar. Bu lisenziyalar güllə atıcılığı, atletika, üzgüçülük və pauerliftinq idman növləri üzrədir. “Tokio 2020”də Azərbaycanın 7 idman növü üzrə 32 atlet ilə təmsil olunacağı proqnozlaşdırılır.
AMPK-nın beynəlxalq əlaqələr şöbəsinin müdiri Rüfət Hacılı hesabat dövründə beynəlxalq səviyyədə görülmüş işlərdən danışıb. Bildirib ki, cari ildə YUNISEF ilə birgə layihələr həyata keçirilib. Həmçinin İtaliya Görmə Məhdudiyyətli İdmançılar Federasiyası, “BP Azərbaycan” şirkəti, Avropa İttifaqı, Böyük Britaniya, Yaponiya, Almaniya, Belçikanın ölkəmizdəki səfirlikləri və Türk İşbirliyi və Koordinasiya Agentliyi ilə əməkdaşlıq qurulub. Eləcə də Amerika-Azərbaycan Ticarət Palatası ilə əməkdaşlığa başlanıb.
Sonra “Əlil İdmançılara Dəstək” İctimai Birliyinin sədri Qoşqar Əsgərov il ərzində ölkəmizdə müyəssərliyin təmin edilməsi istiqamətində görülən işlər barədə məlumat verib.
Komitənin maliyyə və təsərrüfat şöbəsinin aparıcı mütəxəssisi Leyli Yusifli növbəti ildən ölkəmizdə əlilliyi olan şəxslərin bacarıq yarışlarının keçirilməsi istiqamətində işlərin həyata keçiriləcəyini bildirib.
AMPK-nın ictimaiyyətlə əlaqələr və marketinq şöbəsinin müdiri Teymur Hacıyev çıxışında komitənin 2020-ci ildə həyata keçirəcəyi işlər barədə söz açıb. Qeyd edib ki, 2020-ci ilin ən əhəmiyyətli idman hadisəsi “Tokio 2020” olacaq. Bundan əlavə, növbəti ildə VI Uşaq Paralimpiya Oyunlarının keçirilməsi nəzərdə tutulur. Əvvəlki illərdən fərqli olaraq, 2020-ci ildə Uşaq Paralimpiya Oyunlarının beynəlxalq müstəviyə çıxarılması nəzərdə tutulur. Bu istiqamətdə Rusiya, Moldova, Belarus, Birləşmiş Ərəb Əmirlikləri, Gürcüstan və Türkiyə ilə danışıqlar aparılır.
Tədbirdə güllə atıcılığı üzrə komandanın baş məşqçisi Əkbər Muradov ilin məşqçisi, pauerliftinq növü üzrə məşqçi Natiq Əliyev isə regionlar üzrə ilin ən yaxşı məşqçisi adına layiq görülüblər. Həmçinin Aynur Məmmədova (parataekvondo) ilin idmançısı, Əli Vəliyev və Elnarə Nizamlı isə ilin uşaq idmançıları seçiliblər. İlin ən yaxşı idman federasiyası adına Boccia İdman Federasiyası layiq görülüb. Federasiyanın baş katibi İlham Məhərrəmova da mükafat təqdim olunub.
Hesabat tədbirində bir neçə dövlət və özəl qurumun nümayəndələri də AMPK ilə səmərəli əməkdaşlığa görə mükafatlandırılıblar.

Paylaş:

Baxılıb: 1197 dəfə