“Sabah” ilk dəfə avrokuboklara vəsiqə qazanıb

Bakı:

13 °C

76 %

3 m/s

Əlaqə

AZ RU EN

Ana səhifə / İdman / “Sabah” ilk dəfə avrokuboklara vəsiqə qazanıb

“Sabah” ilk dəfə avrokuboklara vəsiqə qazanıb

04.04.2023 [11:03]

Rövşən ƏLİSOY

“Sabah” Futbol Klubu tarixində ilk dəfə avrokuboklara qəsiqə qazanıb. Paytaxt təmsilçisi həm də Azərbaycan çempionatının turnir cədvəlində ilk üçlükdə yerini təmin edib.

Cari mövsüm Azərbaycan Premyer Liqasında inamla çıxış edən kollektiv ölkə çempionatının sona çatmasına 8 tur qalmış bunu rəsmiləşdirib. Murad Musayevin yetirmələri 28-ci tur evdə “Qəbələ”ni məğlub edərək (3:2), bunu bacarıb.

“Sabah” Futbol Klubu 2017-ci il, sentyabrın 8-də fəaliyyətə başlayıb. 2017/18-ci il mövsümündə Azərbaycan Birinci divizionunda çıxış edən “ağ-göylər”, mövsümü 5-ci pillədə bitirib. 2018-ci il mayın 12-də AFFA-nın Lisenziya Komissiyasının iclasında “Sabah” Futbol Klubuna Azərbaycan Premyer Liqasında iştirak etmək üçün lisenziya verilməsi qərara alınıb.

“Sabah” Futbol Klubu Azərbaycan Premyer Liqasında ilk oyununu 2018-ci il avqustun 12-də “Keşlə”yə (indiki “Şamaxı”) qarşı keçirib. “ASK Arena”da keçirilən debüt matçında 1:0 hesabıyla qalib gələn “Sabah”, həm də, yüksək liqada ilk qələbəsini qazanıb. Qarşılaşmada yeganə qola Marko Deviç imza atıb. Ukrayna millisinin keçmiş üzvü “Sabah” Futbol Klubunun Azərbaycan Premyer Liqasında ilk qolunun müəllifi kimi adını klubun tarixinə yazdırıb.

“Sabah” 2022-ci ilin dekabrında “Sumqayıt”ı 6:0 hesabı ilə məğlub edib və Azərbaycan Premyer Liqasında tarixinin ən böyükhesablı qələbəsini qazanıb.

“Sabah” Futbol Klubu ev oyunlarını Masazır qəsəbəsində yerləşən “Bank Respublika Arena”da keçirir. Həmin stadion 13000 nəfər azarkeş tutumuna malikdir.

Stadionun oyun meydançası təbii ot örtüyü ilə əhatə olunub. Arenada futbolçuların soyunub geyinmə otaqları, tibb məntəqəsi, mətbuat konfransı üçün nəzərdə tutulmuş zal və dəvətlilərin oyunları izləməsi üçün xüsusi otaqlar mövcuddur.

Sözügedən stadion əvvəllər “Neftçi” və “Qarabağ”ın müvəqqəti olaraq Premyer Liqa oyunlarına ev sahibliyi edib. “Sabah” Futbol Klubu yüksək liqada “Bank Respublika Arena”dan əsas stadion kimi istifadə edən ilk klubdur. Azərbaycan Premyer Liqasının 2022/23 mövsümündə ən çox azarkeş məhz bu stadionunda keçirilən “Sabah” FK - “Qarabağ” FK oyununda qeydə alınıb - 10000 nəfər.

Klubun “sükanı arxasında” olan Murad Musayev karyerası ərzində Rusiya Premyer Liqasında çıxış edən “Krasnodar”da və Rusiyanın 18 yaşadək futbolçulardan ibarət milli komandasında çalışıb. Musayev 2017/18 mövsümündə Rusiya Gənclər Liqasının ən yaxşı baş məşqçisi seçilib. Eyni zamanda, o, Rusiya U-19 Gənclər Liqasının Çempionu tituluna da yiyələnib.

Paylaş:

Baxılıb: 650 dəfə