Astarada aqrar sahənin inkişaf etdirilməsi üçün böyük imkanlar var

Bakı:

11 °C

87 %

7 m/s

Əlaqə

AZ RU EN

Ana səhifə / İqtisadiyyat / Astarada aqrar sahənin inkişaf etdirilməsi üçün böyük imkanlar var

Astarada aqrar sahənin inkişaf etdirilməsi üçün böyük imkanlar var

05.08.2016 [10:05]

Astarada istehsal olunan məhsulların böyük ixrac potensialı var və bundan istifadə edilməlidir.
AZƏRTAC xəbər verir ki, bu fikir Astara Rayon İcra Hakimiyyətində fermerlərin, aqrar sahədə çalışan sahibkarların, mütəxəssislərin və müvafiq dövlət strukturları nümayəndələrinin iştirakı ilə keçirilən müşavirədə səslənib.
Prezident İlham Əliyevin tövsiyə və tapşırıqlarına müvafiq olaraq, rayonlarda kənd təsərrüfatı işlərinin gedişinin, fermerlərin, torpaq mülkiyyətçilərinin təklif və istəklərinin, həmçinin aqrar sektorun inkişaf perspektivlərinin öyrənilməsi və operativ tədbirlərin görülməsi məqsədilə yaradılan işçi qrupun üzvləri avqustun 4-də Astara rayonunda olublar.
Müşavirədə çıxış edən Astara Rayon İcra Hakimiyyəti başçısının birinci müavini Allahverən Mahmudov rayonda iqtisadiyyatın aparıcı sahəsi olan kənd təsərrüfatı işlərinin gedişi və bu sahədə mövcud vəziyyətlə bağlı məlumat verib, aqrar sektorun perspektivlərindən danışıb.
Qeyd olunub ki, Astara rayonunda zəngin əkinçilik ənənələri var. Bu ənənələr bu gün də uğurla davam etdirilir. Rayonda əkinəyararlı torpaq sahələrinin dövriyyəsi 568 hektar genişləndirilərək 7235 hektara çatdırılıb. Cari ildə Astarada sitrus meyvə bağlarının sahəsi isə 2200 hektardan çox olub. Sitrusçuluqla yanaşı, çay, çəltik və tərəvəzçilik də inkişaf edib. Çəltik sahələri 2 dəfə genişləndirilib.
İşçi qrupun rəhbəri Azər Əmiraslanov çıxış edərək respublikamızda aparılan islahatlardan, qeyri-neft sektorunun, o cümlədən kənd təsərrüfatının inkişafı istiqamətində görülən tədbirlərdən danışıb.
Astarada bitkiçiliyin ən mühüm sahələrinin inkişaf etdirildiyini vurğulayan A.Əmiraslanov kənd təsərrüfatının uzunmüddətli inkişafına yalnız daxil bazarda satılan məhsullarla deyil, rəqabətqabiliyyətli məhsulların xarici ölkələrə ixrac edilməsi ilə mümkün olduğunu diqqətə çatdırıb. Qeyd edib ki, ölkənin ərzaq təhlükəsizliyinin təmin olunması ilk növbədə regionlardan, rayonlardan başlanır. Astarada aqrar sahənin inkişaf etdirilməsi üçün böyük imkanlar var və onlardan səmərəli istifadə edilməlidir.
Prezident İlham Əliyevin rayonlarda yerli istehsalın artırılması, əhalinin məşğulluğunun yüksəldilməsi ilə bağlı tapşırıqlarını diqqətə çatdıran A.Əmiraslanov kənd təsərrüfatı sahəsində dövlətin, fermerlərin və emal müəssisələrinin birgə əməkdaşlığının zəruri olduğunu söyləyib, müşavirə iştirakçılarını açıq müzakirələrə dəvət edib.
Çıxış edənlər rayonda aqrar bölmənin inkişafı ilə bağlı çəltikçilikdə mini-texnikaların tətbiqi, feyxoa məhsulunun satışı və emal müəssisələrinin yaradılması, arı məhsullarının qablaşdırılması, süd qəbulu məntəqələrinin təşkili və süd emalı müəssisəsinin yaradılması ilə bağlı təkliflərini bildiriblər.
Müşavirədən sonra işçi qrupun üzvləri fermer Aqil İbadovun çəltikçilik sahəsi, “Astaraçay” MMC-nin çay fabrikində istehsal prosesi və fabrikdəki “Çay muzeyi” ilə yaxından tanış olublar.

Paylaş:

Baxılıb: 884 dəfə