Aqrar sahədə qlobal çağırışlara söykənən tədbirlər həyata keçiriləcək

Bakı:

10 °C

76 %

5 m/s

Əlaqə

AZ RU EN

Ana səhifə / İqtisadiyyat / Aqrar sahədə qlobal çağırışlara söykənən tədbirlər həyata keçiriləcək

Aqrar sahədə qlobal çağırışlara söykənən tədbirlər həyata keçiriləcək

18.05.2018 [09:28]

Aqrar elm sahəsində qlobal və regional çağırışlara söykənən tədbirlər həyata keçiriləcək. Bu gün dünyada qlobal və regional çağırışlar ətrafında ən müasir seleksiya metodlarından, biotexnoloji molekulyar genetikadan istifadə, virussuz toxumların yetişdirilməsi, iqlim dəyişiklikləri ilə bağlı adaptasiya planlarının hazırlanması dövrümüzün aktual məsələlərindən biridir.
AZƏRTAC xəbər verir ki, bu fikirləri mayın 17-də Kənd Təsərrüfatı Nazirliyinin Aqrar Elm və İnformasiya Məsləhət Mərkəzinin baş direktoru Ələddin Eyvazov nazirliyin institut rəhbərləri, alim və mütəxəssisləri ilə görüşündə deyib.
“Azərbaycan Respublikasında kənd təsərrüfatı məhsullarının istehsalına və emalına dair Strateji Yol Xəritəsi”nin aqrar sektorun inkişafında mühüm rol oynayacağını vurğulayan baş direktor qeyd edib ki, sözügedən sənəd kənd təsərrüfatının inkişafı ilə bağlı həm orta, həm də uzunmüddətli dövrdə strateji inkişaf hədəflərinə çatmaq üçün dövlətin ardıcıl mərhələlərlə icra ediləcək aydın yol xəritəsinə malik olduğunu göstərir.
Ə.Eyvazov çıxışında ağıllı kənd təsərrüfatına keçid sisteminin tezləşdirməyin zəruriyyətindən söz açıb. Həmçinin bildirib ki, beynəlxalq təcrübənin ölkəmizdə yayılmasına diqqət artırılmalı, prioritet tədqiqatlar müəyyənləşdirilməlidir. Onun sözlərinə görə, bu sahədə Azərbaycanda kifayət qədər mütəxəssis var.
Natiq diqqətə çatdırıb ki, ölkəmizdə aqrar elm sahəsi ilə bağlı bütün məsələlər bilavasitə Aqrar Elm və İnformasiya Məsləhət Mərkəzindən idarə olunacaq. Ən müasir texnologiyaların Azərbaycana gətirilməsi, elmi-tədqiqat institutlarının maddi-texniki bazasının yaxşılaşdırılması, mükəmməl biznes planlarının hazırlanması istiqamətində birgə səylər göstəriləcək. Bundan başqa, aidiyyəti institutlarla birgə qısa zamanda aqrar elm sahəsinin inkişaf konsepsiyası hazırlanmalıdır.
Aqrar elm sahəsində bəzi problemlərə toxunan baş direktor deyib ki, respublikanın aqrar elm sahəsində çalışan alimlər elmi-tədqiqat işlərinin tədqiqatlarının daxili bazara girməsi üçün bütün innovativ üsullardan istifadə etməlidirlər. Yerlərdə informasiya məsləhət şəbəkələrinin fermerlərlə əlaqələrin qurulması istiqamətində işlər sürətləndirilməlidir.
Ə.Eyvazov onu da vurğulayıb ki, ölkədə bir sıra sahələrin, o cümlədən pambıqçılığın, üzümçülük, şərabçılığın və digər aqrar sahənin inkişafı ilə bağlı dövlət proqramları təsdiq olunub. Bu dövlət proqramları həmin sahələrdə çalışan alim və mütəxəssislərimiz üçün istinad nöqtəsi olmalıdır.

Paylaş:

Baxılıb: 820 dəfə