Əsl arıçılar heç vaxt saxta bal satmazlar

Bakı:

22 °C

63 %

4 m/s

Əlaqə

AZ RU EN

Ana səhifə / MEDİA / Əsl arıçılar heç vaxt saxta bal satmazlar

Əsl arıçılar heç vaxt saxta bal satmazlar

06.05.2022 [10:37]

MİKAYIL

Azərbaycanda ən qədim təsərrüfat sahələrindən biri də arıçılıqdır. Azıx mağarasında aparılan arxeoloji qazıntılar zamanı üzərində arı şəkli olan kasa qabın tapılması Azərbaycanda arıçılığın çox qədim tarixi olduğunu bir daha təsdiq edir.

Əlverişli iqlim şəraiti və zəngin bitki örtüyü ölkəmizdə arıçılığın inkişafını şərtləndirən başlıca amillərdəndir. Azərbaycanda bal verən 600-ə qədər bitki növü mövcuddur ki, bunların da təxminən 200-ü nektar və çiçək tozu mənbəyi kimi arıçılığın genişləndirilməsi üçün daha böyük təbii imkanlar yaradır. Bu imkanlar sayəsində arıçılığın inkişaf etdirilməsi kənd əhalisinin gəlirlərinin artmasına və məşğulluğunun təmin edilməsinə töhfə verə bilər.

Ölkədə arıçılığı inkişaf etdirmək məqsədi ilə son illərdə bir sıra tədbirlər həyata keçirilib. Məsələn, bu günlərdə “AzerGold” QSC-nin təşkilatçılığı, Kiçik və Orta Biznesin İnkişafı Agentliyinin (KOBİA) dəstəyi ilə Daşkəsən rayonunda icra edilən “Arıçılıq təsərrüfatının inkişafına dəstək layihəsi”nə yekun vurulub. Layihənin əsas missiyası QSC-nin hasilat işləri apardığı bölgədə kiçik sahibkarlıq ekosisteminin inkişafına, arıçılıq təsərrüfatının ekosahibkarlıq növü kimi təşviqinə və təbii bal istehsalının artırılmasına töhfə vermək idi.

Bundan başqa, cari ildə Kəlbəcər yaylaqlarına 20 mindən çox arı ailəsinin köçürülməsi planlaşdırılır. Kəlbəcər rayonu üzrə 28 mindən çox arı ailəsi Elektron Kənd Təsərrüfatı İnformasiya Sistemində qeydiyyatdan keçib. Bu arı ailələrinin əksəriyyəti Kəlbəcər yaylaqlarına köçürüləcək. Artıq 500-dən çox fermer arıçılıq təsərrüfatlarını yaylaqlara aparmaq üçün Kənd Təsərrüfatı Nazirliyinin elektron portalında qeydiyyatdan keçib.

Bu tədbirlərin nəticəsi olaraq, arı ailələrinin sayında, bal və digər arıçılıq məhsullarının istehsalında və bal ixracında əhəmiyyətli artım müşahidə edilir.

40 ilin arıçısı: Saxta yola əl atmağa ehtiyacım yoxdur

40 ilin arıçısı Yaşar Abilov deyir ki, arı məhsullarına tələbat ildən-ilə artır. Bu məhsulların faydasını görən insanlar tərəfindən sifarişlər çoxalır. Bu da əlbəttə, yaxşı gəlir gətirir. Balın təkcə şəfaverici xüsusiyyətləri ilə deyil, həm də zəruri məhsul kimi insan üçün faydalı olduğunu söyləyən arıçı Yaşar “Youtube” platformasında videolarını paylaşır, izləyicilərini arıçılıq sənətinin sirləri ilə tanış edir: “İki-üç yerə arıları köçürtməklə balın tərkibini zənginləşdirir, onun daha müalicəvi olmasını təmin edirəm. Bu arılar mənə atamdan yadigardır. Ona görə də onları göz bəbəyim kimi qoruyub, inkişaf etdirirəm. Arzu edirəm ki, heç kim xəstələnməsin, amma səhhətinizdə problem olan zaman ən gözəl dərman məhz baldır”.

Arının halallığı və təmizliyi sevən canlı olduğunu bildirən Y.Abilov qeyd edib ki, bu sənət ilə məşğul olan arıçının özü də halal adam olmalıdır: “Çünki arı haramçılığı sevmir. Saxta bal satanların heç biri arıçı deyil. Əsl arıçılar heç vaxt saxta yola getməzlər. Mən hər bir arıya düzgün qulluq etdikdə, 35 kq bal alıram. Çərçivənin birini isə 35 manata satıram. Bu bal mənim bütün tələbatımı ödəyirsə, başqa yola əl atmağa ehtiyac belə görmürəm. Bütün arıçılara üz tutub deyirəm ki, düzgün yolla getsinlər”.

O, təbii balı fərqləndirməyin yollarından da danışıb: “Balın təmizliyini yoxlamaq üçün bir neçə sadə üsul var. Əvvəla, bir stəkan qaynar suya 1 çay qaşığı bal töküb qarışdırıb iyinə baxın. Gülün-çiçəyin ətri gəlirsə, deməli, təmiz baldır. Əgər şirin çay iyi gəlirsə, saxta baldır. İkincisi isə bir qaşıq bala bir neçə damcı yod tökün. Təmiz bal heç vaxt yoda qarışmaz. Məndən sizə məsləhət hər bal satandan yox, tanıdığınız arıçıdan bal alın. Mənə balın xarlaşması ilə bağlı çoxlu suallar verirlər. Deyirlər ki, havalar soyuyan kimi balımız xarlayır. Məni aldadıblar? Əlbəttə ki, yox. Bal kristal hala, xarlamış hala çevrilə bilər. Bu zaman keyfiyyətində heç bir dəyişiklik olmayacaq. Donmuş vəziyyətdə də balı yemək mümkündür”.

“Arı sancması elə də qorxulu deyil. Əsas insanın baş nahiyəsindən sancarsa, təhlükəlidir. Ehtiyatlı olmaq lazımdır. Amma əldən nə qədər sancsa, o qədər xeyirlidir. Kimsə arıçı olmaq istəyirsə, ona arı verə, saxlama qaydası ilə tanış edə bilərəm. Mən istəyirəm ki, müxtəlif rayonlarımızda da arıçılıq inkişaf etsin. Desinlər ki, Yaşar kişi bizə çörək verdi. Təki bu sənət yaşasın və insanlarımıza şəfa versin”, - deyə Yaşar kişi vurğulayıb.

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Regionların sosial-iqtisadi inkişafının tə?viq edilməsi” istiqaməti üzrə hazırlanmışdır

Paylaş:

Baxılıb: 1122 dəfə