Böyük ideologiyanın izi ilə...

Bakı:

22 °C

61 %

5 m/s

Əlaqə

AZ RU EN

Ana səhifə / MEDİA / Böyük ideologiyanın izi ilə...

Böyük ideologiyanın izi ilə...

11.03.2023 [11:15]

Günel ABBASOVA

Hər bir dövlət o zaman güclü olur ki, onun güclü ideoloji əsasları olsun. Bu mənada Azərbaycan dövlətinin bəxti gətirib. Dövlətimizin Heydər Əliyev tərəfindən əsası qoyulan azərbaycançılıq ideologiyası var. Hansı ki, bu ideologiya bütün dünya azərbaycanlılarını bir araya gətirən ənənəyə çevrilib. Azərbaycançılıq ideologiyasının necə güclü bir vasitə olduğunu zaman-zaman öz təcrübələrimizdə müşahidə etmişik. Xalqımızın ən çətin vaxtlarında bir bayraq ətrafında birləşməsində bu idelogiya əvəzedilməz rol oynayıb. Vətən müharibəsində bütün dünya azərbaycanlıları vahid bayraq altında birləşərək öz güclərini düşməni məğlub etməyə yönəltdilər. Hətta bəzi partiyalar belə öz siyasi fikir ayrılıqlarını kənara qoyub, ölkə rəhbərini dəstəkləyən bəyanatlarla çıxış etdilər. Bunların hər birinin əsasında, heç şübhəsiz azərbaycançılıq ideologiyası dayanır.

Qeyd etdiyimiz kimi, azərbaycançılıq ideologiyası təkcə ölkəmizdə yaşayan həmyerlilərimizi əhatə etməklə kifayətlənmir. Həm də müxtəlif xarici ölkələrdə fəaliyyət göstərən, orada məskunlaşan soydaşlarımız bu ideologiya ətrafında sıx birləşir. Azərbaycançılıq ideologiyası həmin ölkələrdə yaşayan azərbaycanlılar üçün bir növ mayak rolunu oynayır. Bu ideologiya onların mədəniyyətimizi, ənənələrimizi daim təbliğ etmələri, yaşatmaları üçün önəmli vasitədir.

Ulu Öndər xaricdə yaşayan vətəndaşlarla görüşlərində bu məsələlərə xüsusi diqqət ayırırdı. Bu məqamda azərbaycançılıq ideologiyasının ən yaxşı təbliğ edildiyi Gürcüstandan söz açmaq yerinə düşərdi. Heydər Əliyev Gürcüstana səfəri zamanı azərbaycanlılarla görüşündən məhz bu məsələlərə toxunmuşdu. O həmin görüşdə tarixi əhəmiyyət kəsb edən ifadə işlədərək Gürcüstanda yaşayan azərbaycanlıların diaspor deyil, aborigen xalq olduğunu vurğulamışdı. Soydaşlarımıza Gürcüstan sizin vətəninizdir, siz də bizim soydaşlarımızsınız və tək deyilsiniz deyərək hər zaman Azərbaycan dövlətinin onların yanında olduğunu qeyd etmişdi.

Gürcüstanda yaşayan və jurnalist kimi fəaliyyət göstərən həmyerlimiz Almaz Nadiroğlu “Yeni Azərbaycan”a açıqlamasında bildirib ki, bu gün də Gürcüstan Azərbaycan münasibətlərinin inkişafı yüksək səviyyədədir: “İllər öncə təməli qoyulan ideologiyanın nəticəsidir ki, bu gün Gürcüstanda yaşayan həmyerlilərimiz özünü bu ölkədə yad kimi hiss etmir. Burada öz adət-ənənələrini sərbəst şəkildə yaşadırlar. Buradakı azərbaycanlıların qədim tarixi, mədəniyyəti, adət-ənənələri var. Telavi rayonunun Qaracala kəndinin 500 ildən çox yaşı var. Laqodexinin Qabal kəndi, həmçinin çox qədim yaşayış məntəqəsidir. Ümummilli Liderimizin diqqət və qayğısı nəticəsində bu gün paytaxt Tbilisidə Mirzə Fətəli Axundzadənin, Nəriman Nərimanovun, Cəlil Məmmədquluzadənin ev muzeyləri fəaliyyət göstərir. Tbilisidəki küçələrin birinə Bakı adı verilib. Daha bir neçə küçə Azərbaycanın görkəmli şəxsiyyətlərinin adını daşıyır”.

Onun sözlərinə görə, hazırda Azərbaycan ilə Gürcüstan arasındakı nümunəvi dostluq əlaqələrinin mövcudluğu dərin məmnunluq hissi doğurur: “Bu gün Tbilisinin mərkəzində və Rustavi şəhərində Heydər Əliyev Parkının salınması, Ulu Öndərin abidəsinin ucaldılması ölkələrimiz arasındakı möhkəm və sarsılmaz dostluğun bariz nümunəsidir. Azərbaycan Prezidenti İlham Əliyev bu gün Ulu Öndərin siyasi kursunu uğurla davam etdirir. Ona görə də inanırıq ki, ölkələrimiz arasında əsrlər boyu mövcud olan dostluq münasibətləri daim yaşayacaq. Heydər Əliyevin xatirəsi isə Gürcüstan azərbaycanlılarının və gürcü xalqının yaddaşından heç vaxt silinməyəcək”.

Gənc jurnalist qeyd edib ki, Gürcüstan mətbuatında mütəmadi olaraq Azərbaycanla bağlı yazılar, materiallar dərc olunur: “Hətta ötən ay Gürcüstanın “Sakartvelos Respublika” qəzeti müasir Azərbaycan dövlətinin qurucusu, görkəmli siyasi və dövlət xadimi Heydər Əliyevin anadan olmasının 100 illiyi münasibətilə silsilə məqalələr dərc etməyə başladı. Azərbaycan Respublikası Diasporla İş üzrə Dövlət Komitəsinin və “Alyans” Gənclər Mərkəzinin “Heydər

Əliyev İli” çərçivəsində birgə layihəsi əsasında qəzet vaxtilə dahi şəxsiyyətlə görüşmüş gürcü ictimai-siyasi xadimlərinin, həmçinin Gürcüstan azərbaycanlılarının müsahibələrini məqalə şəklində təqdim edir. Məqalələrin müəllifi Gürcüstanın əməkdar jurnalisti Quram Qoqiaşvilidir. “Gürcüstan və Azərbaycan xalqlarının dostluğu dünyaya nümunədir” sərlövhəli məqalədə Gürcüstan Parlamentinin keçmiş deputatı Ramiz Bəkirovun fikirlərinə də yer verilib”.

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Azərbaycançılıq ideyasının təbliği - “Heydər Əliyev İli”” istiqaməti üzrə hazırlanmışdır

Paylaş:

Baxılıb: 716 dəfə