Radikallar mitinq keçirdi və ya bir qədər hesablama

Bakı:

13 °C

88 %

5 m/s

Əlaqə

AZ RU EN

Ana səhifə / Siyasət / Radikallar mitinq keçirdi və ya bir qədər hesablama

Radikallar mitinq keçirdi və ya bir qədər hesablama

24.04.2012 [01:48]

Aprelin 22-də Azərbaycan siyasi müxalifətinin “İctimai Palata” adlanan dəstənin Bakıda növbəti mitinqi keçdi. Mitinqin lüzumluluğu, iştirakçıların sayı və təşkilati işlərin səviyyəsi məsələsinə toxunmaq istəməzdim, baxmayaraq ki, müxalifət hakimiyyəti bir qayda olaraq bu məsələlər üzrə müzakirələrə çəkmək istəyir. Demokratik və hüquqi dövlət olan Azərbaycanda müxalifətin kütləvi aksiya keçirməsi normal və adi bir haldır. Əksinə, müxalifətin bir neçə ildə bir dəfə kampaniya kimi dalbadal bir neçə mitinq keçirərək, sonra yenidən uzun müddət susmasının özü təəccüb doğurur.
İştirakçıların sayı məsələsi isə artıq dünya üçün köhnəlmiş mövzudur. İnformasiya texnologiyalarının inkişaf etdiyi müasir dövrdə, hətta kiçik bir qrupun tədbiri belə qısa zamanda bütün cəmiyyətin əldə edə biləcəyi informasiyaya çevrilə bilir. Ona görə də, əsas məsələ say və təşkilati məsələ deyil, kütləvi aksiyada hansı təkliflərin irəli sürülməsidir. Və məhz bu məsələlərə dair də mövqe bildirmək istərdim.
Radikal müxalifət nümayəndələrinin çıxışlarında nə mitinq iştirakçıları, nə də aksiyaya maraq göstərənlər cəmiyyət problemləri barədə hər hansı bir əsaslandırılmış təklif etmədilər. Baxmayaraq ki, müxalifətin digər vəzifələri ilə yanaşı, əsas vəzifələrindən də biri vaxtaşırı cəmiyyətin inkişafı ilə bağlı real təkliflər verməkdir.
Müsavat Partiyasının başqanı İsa Qəmbərin çıxışı bəlağətlə dolu idi. Lakin İsa Qəmbərin Azərbaycanın daxili və xarici siyasətinə professional toxuna bilməməsi, cəmiyyətin hər hansı bir probleminin həllinə dair real təklif verə bilməməsi də aydın oldu.
Digər çıxışçı AXCP sədri Əli Kərimli inqilabçı ritorikadan kənara çıxmırdı. Cənab Kərimli növbəti dəfə istənilən müxalifət liderinə verilən “Hakimiyyətə gəlsəniz nəyi indiki iqtidardan fərqli edəcəksiniz?” sualına avab verməkdən məharətlə yayındı. İxtisasca həkim, AXC-Müsavat hakimiyyəti dövründə MTN zabiti, sonradan Almaniya fondlarının birinin Azərbaycanda nümayəndəsi, indi isə politoloq olan Ərəstun Oruclunun da çıxışı bəlağət və inqilabi terminologiya cəhətcə əvvəlki çıxışlardan fərqlənmirdi. Ancaq rol bölgüsündə onun hansı fikirləri səsləndirmək istədiyi heç kəsə aydın olmadı. “Biz vətənimizin hər qarışını özümüzə layiq bilirik (bunun siyasi mübarizəyə nə aidiyyəti var?)... Hansı güclə, hansı iradə ilə siz dünyaya meydan oxuyursunuz? (söhbət kimdən və hansı meydan oxumaqdan gedir?)... Bu ölkənin sahibi sizlərsiz (məgər kimsə etiraz edir?) Onun çıxışının ən maraqlı yeri isə sonuncu fikridir: “Arzu edirəm, bu tarixdə layiqli yerimizi tutaq” (???)
Digər çıxışlar da bu məzmunda olduğundan onların şərhinə ehtiyac yaranmır. Diqqəti çəkən və münasibət bildirilməsi lazım olan isə mitinqə gətirilən plakatlar idi. Onların bir mənbədə hazırlandığına yəqin ki, mitinq təşkilatçılarının özləri də etiraz etmir. Onlar çıxışçılardan fərqli olaraq konkret mövzuya toxunduğundan, onları birmənalı şəkildə radikal müxalifətin hakimiyyətə gələcəyi təqdirdə onların fəaliyyət proqramı hesab etmək olar.
Beləliklə, plakatlarda Sovet dövründə əmanət bankında vətəndaşların qalan əmanətlərinin rubla manat kursu ilə dəyişməsi tələb edilir. Tribunada duranların buna etiraz etmələri bu iqtisadi tələbi dəstəklərini sübut edir. Yaddan çıxarılır ki, Azərbaycanda dəyişmə kursu keçmiş SSRİ məkanında ən yüksək kursdur və 1 Sovet rublu 17 ABŞ sentinə dəyişdirilir. İndiki kursla əmanətlərin qaytarılmasına bir il ərzində təqribən 1 milyard manat sərf ediləcəyi gözlənilir. Müxalifətin təklifilə isə, bu prosesə təqribən 6 milyard Azərbaycan manatı vəsait lazımdır. Müxalifət əlavə 5 milyardı haradan alacağını və bundan sonra yaranacaq inflyasiyanın qarşısını nə cür alacağı sualına cavabdan qaçır. Yada düşəndə ki, İsa Qəmbər 2005-ci il parlament seçkilərində çıxışında Neft Fondundakı vəsaiti hər kəsə paylamağı təklif edirdi, onların iqtisadi hazırlığı tamamilə aydın olur.
Bir neçə plakatda Bakı şəhərində abadlıq işləri ilə bağlı məcburi olaraq aparılan söküntü işlərinin əleyhinə şüarlar var idi. Əlbəttə, söküntü ağır prosesdir və şəraitsiz də olsa, illərlə yaşanan evdən köçmək çətin məsələdir. Ancaq dünya hələ söküntü olmadan abadlıq işi aparmağın yolunu tapa bilməyibdir. Müxalifətin hakimiyyətdə olacağı halda problemi necə həll edəcəyi isə qaranlıq qalır. Artıq dövrünü başa vurmuş və ya neft buruqlarının yanında tikilmiş evlərin taleyini həll etmədən isə müasir Bakı qurmaq mümkün deyildir.
Və sonda mitinqdəki şüar və plakatların çoxsu xarici dildə, ingiliscə yazılmışdı. Nəzərə alsaq ki, Azərbaycanda ingiliscə az sayda insan bilir, bu çağırışların Azərbaycan cəmiyyətinə səslənmədiyinin fərqinə varmaq lazımdır. Görünür, radikal müxalifət cəmiyyətin onların fəaliyyətində maraqlı olmadığını başa düşür. Bu isə çox əhəmiyyətli bir etirafdır.
Aydın MİRZƏZADƏ,
YAP Siyasi Şurasının üzvü

Paylaş:

Baxılıb: 909 dəfə