Türk dövlətlərinin ali seçki qurumları arasında əməkdaşlıq genişlənir

Bakı:

28 °C

55 %

9 m/s

Əlaqə

AZ RU EN

Ana səhifə / Sosial / Türk dövlətlərinin ali seçki qurumları arasında əməkdaşlıq genişlənir

Türk dövlətlərinin ali seçki qurumları arasında əməkdaşlıq genişlənir

14.05.2025 [23:34]

Türküstan şəhərində (Qazaxıstan) Türk Dövlətləri Təşkilatına (TDT) üzv dövlətlərin ali seçki qurumlarının Məşvərət Platforması haqqında Əsasnamənin imzalanması mərasimi olub.

Qazaxıstan Mərkəzi Seçki Komissiyasının mətbuat xidmətindən AZƏRTAC-a bildirilib ki, tədbirdə TDT üzvü olan Azərbaycan, Qazaxıstan, Qırğızıstan, Türkiyə, Özbəkistanın mərkəzi seçki qurumlarının və bu təşkilatda müşahidəçi statusuna malik Macarıstanın, həmçinin 4 nüfuzlu beynəlxalq təşkilatın – TDT, Ümumdünya Seçki Orqanları Assosiasiyası, Türk Dövlətləri Parlament Assambleyasının (TürkPA), Türk Akademiyasının rəhbərləri, türk ölkələrinin alimləri, Qazaxıstan Respublikası Parlamentinin deputatları və başqaları iştirak ediblər.

Qazaxıstan Respublikası Mərkəzi Seçki Komissiyasının sədri Nurlan Abdirov Qazaxıstan Prezidenti Kasım-Jomart Tokayevin tədbir iştirakçılarına təbrik məktubunu oxuyub.

Qazaxıstan Respublikasının Prezidenti Türk Dövlətləri Təşkilatının 10-cu sammitində irəli sürülən məsləhət platformasının yaradılması təklifini dəstəklədiklərinə görə qardaş ölkələrdən olan həmkarlarına təşəkkürünü bildirib və bu təşəbbüsün təşkilata üzv olan dövlətlərdə seçki sistemlərinin inkişafına töhfə verəcəyinə əminliyini ifadə edib.

“Məşvərət Platformasının müddəalarının imzalanmasının Türk dünyasının mənəvi paytaxtı olan Türküstanda baş tutması rəmzi məna daşıyır. Məsələlərin əhəmiyyətini nəzərə alaraq, “Türk dünyası: seçki sistemlərinin ənənələri, təcrübəsi və inkişaf perspektivləri” adlı konfransın keçirilməsini dəstəkləyirəm. Sözsüz ki, bu tədbirlər ortaq tarixi köklərə malik olan qardaş ölkələr arasında əməkdaşlığı daha da dərinləşdirəcək”, - deyə Qazaxıstanın dövlət başçısı təbrik məktubunda vurğulayıb və məşvərət platformasına səmərəli iş arzulayıb.

Tədbirdə Qazaxıstan Mərkəzi Seçki Komissiyasının rəhbəri qeyd edib ki, açıq mənbələrdən əldə edilən məlumata görə, bu gün Türk Dövlətləri Təşkilatının bütün üzv dövlətlərində 96,5 milyon seçici var və son iki ildə onlar müxtəlif səviyyəli 15 seçki keçirib.

Tədbirdə TDT üzvü olan dövlətlərin mərkəzi seçki orqanlarının rəhbərlərinin - Azərbaycandan Məzahir Pənahov, Qırğızıstandan Tınçtık Şaynazarov, Türkiyədən Ahmet Yener, Özbəkistandan Zayniddin Nizamxocayevin çıxışları dinlənilib, habelə Macarıstan Milli Seçki Bürosunun rəhbəri Attila Nadın təbrik məktubu oxunub.

Paylaş:

Baxılıb: 435 dəfə